السلام عليكم، أخباركم إيه يا أحلى موقع.. بقالي زمان مابعتلكمش.. فيه موضوع لسه حاصل من ساعة لازم آخد رأيكم فيه علشان تقولوا لي أعمل إيه.. علشان بجد أنا مش عارفه أعمل إيه. ابن خالي عنده 9 سنين أو 10، أنا مسجلاه عندي على الفيس، ولما اتكلمت معاه عرفت إنه مش عارفني وبيقول لي معلومات كتير عنه غلط، تقريبا كل حاجة، عايش فين وسنّه ودراسته وأهله.. كل حاجة، وأنا بدأت أعمل زيه علشان مايعرفنيش، وقلت في الآخر هاقول له. لقيته النهارده بيكلمني على الفيس وقال لي إنه عايز يشوفني ويعمل معايا علاقة جواز، قلت له عايز تتجوزني يعني؟ قال لي لأ سكس، أنا اتصدمت لما قرأت الكلمة وقلت له مش عيب اللي إنت بتقوله؟ قال لي لا إحنا أصحاب، قلت له هما الصحاب بيعملوا مع بعض كده؟ ماردش عليّ، قلت له ماتتكلمش معايا تاني، قال لي أنا آسف وقفل. أنا دلوقتي مش عارفة أعمل إيه.. أقول لمراة خالي علشان أنا ماينفعش أتكلم معاه؟ هو أكيد هيتحرج مني، هو الولد الوحيد على 3 بنات، يا ريت تقولوا لي أعمل إيه.. وشكرا ليكم.
engy
صديقتنا العزيزة.. يمكن الموضوع مفاجأة ليكي، بس المفاجأة الحقيقية إن السن ده فعليا بقى له احتكاك كبير بالإنترنت، وأنا شفت بعيني إنهم بيتراسلوا بإيميلات إباحية، وخصوصا في المناطق الشعبية، ولما بيكونوا داخلين من إنترنت كافيه ولّا حاجة أو بيكونوا متأمنين من عيون الأهل ومن العقاب. من وجهة نظري إنك لازم تقولي لمامته وإن مامته تقول لباباه، بس قولي لهم إنهم مايفكروش إزاي يعاقبوه قد ما يفكروا إزاي يقوّموا تصرفه؟ الأول لازم يعملوا رقابة على الوقت اللي بيقعد فيه على الإنترنت وعلى الكمبيوتر، وفيه برامج كتير بتمنع أصلا المواقع الإباحية، وأفتكر مش طبيعي إن طفل في السن ده يعمل شات مع شخص غريب، فلما يشوفوا حاجة زي دي لازم يتعاملوا معاها.. وشايفة إن الأب يتكلم معاه، لأنه من نفس الجنس، ولازم الأب يقعد معاه ويسمعه ويسأله ليه؟ مش بس يعاقبه وخلاص. والأهم من كده إنهم يخلقوا له حاجات تشغل وقته، ودلوقتي حضرني موقف كنت شفته في السوبر ماركت، كانت أم ماشية بتتسوق مع بنتها سنها حوالي 4 سنين. والبنت كل ما أمها تلتفت ترفع فستانها وتبين نصها التحتاني (في علم النفس الأطفال في السن ده بيكونوا ميّالين لتصرفات مشابهة) المهم أمها أخدت بالها فقالت لها عيب يا بنت.. لكن البنت كانت بتستمر خصوصا لما تلاقي ولاد في سنها حواليها.. راحت الأم جابت علبة خفيفة من على الرف.. وراحت قالت لها ممكن تشيلي دي معايا؟ فالبنت خدت العلبة وحضنتها وبقت بتتفاخر بالمسئولية قدام الولاد التانيين. طبعا لو الأم كانت ضربت البنت أو زعقت لها كانت صرخت وماكانتش اتحلت المشكلة بالسهولة دي، أنا رأيي إن ولد عنده 9 سنين ممكن جدا يشارك في عمل حاجات كتير من مسئوليات البيت، وممكن يتعلم حاجات جديدة أو تحاولوا تحطوه في دايرة نشاطات في مكتبة أو مركز شباب أو نادي، لازم تلاقوا له اهتمامات تانية تجذبه عن دايرة الجنس والتفكير فيه، خصوصا إنه لسه صغير أوي عليه، أومال لما يكبر هيعمل إيه! تحياتي.
