هاجم الملحن الفنان عمرو مصطفى، اليوم السبت، الإعلامية سلمى صباحي نجلة المرشح المحتمل للرئاسة "حمدين صباحي"، عبر تدوينة له ب"الفيس بوك"، قائلاً: عزيزتي سلمي صباحي أنت عارفة أني مبحبش بابا.. ومش عارف هو بيشتغل إيه.. وأغنية "بشرى خير" لحني علة فكرة.. وطبعاً لحني تبقى "تحيا مصر" فاهمة ولا الفهم بطيء زي بابا . ومن جانبها وجهت "سلمى"رسالة عبر تدوينة لها ب"الفيس بوك"، قائلة : مش عزيزي عمرو مصطفى .. معلش مقدرش أقول عزيزي لحد مش عزيز عليا فعلاً! ليه بتجر شكلي!! دانا لسه بشكر في الغنوة!!..أنا عارفة إن الغنوة لحنك وعارفة انك مؤيد للسيسي، وعارفة إنك مبتحبش حمدين وواثقة إنك مابتحبوش "عن جهل" زي بالظبط مانت مش عارف بيشتغل ايه "عن جهل"، وزي ما بتقول وبتردد كلام كتير جدا "عن جهل" برضه .. بس ده مالوش أي علاقة بأن الغنوة فعلاً عجبتني. وتابعت: الفن بالنسبالي أنقى وأرقى من التوجهات والاختلافات والغنوة كلام قبل ما تكون لحن ومانكرش إن اللحن جميل اللي شبه كل ألحانك المنحوتة عجبني برضه.. انت معروف عنك من أيام الجامعة أصلاً انك "نحيت" شاطر بصراحة .. دي حاجة معروفة في الوسط كله مش أنا اللي اكتشفتها حتى اسأل أي حد!!. وأضافت: في كل الأحوال أنا شايفة إن الانتخابات مش مفروض تخسر الناس بعض، لكن عموماً متحاولش تخسر حد بكلام مالوش معنى، أنا ليا أصدقاء بحترمهم جداً منهم أيمن بهجت قمر هو مؤيد للسيسي لكن عمر ده ما خلانا نجرح في بعض ولا نهين بعض لأن أنا مؤمنة إن كل واحد حر في اختياره طالما عارف هو بيختاره ليه ..وكلمة تحيا مصر مش بتغيظني على فكره!! ف كل الأحوال تحيا مصر طبعاً بغض النظر عن مين الرئيس .. كده كده تحيا مصر بناسها مش برئيسها.