بقلم سيد الحاج يارب تكون بخير .. وياريت تقرا الموضوع .. كويس .. وللآخر طبعا انت متفق معايا اننا رجالا ونساء الهنا واحد بغض النظر عن الديانة . وطبعا انت متفق معايا ان الله هيحاسب الرجل والمرأة نفس الحساب . أكيد فيه حاجات بسيطة اتحرمت على المرأة واحلت للرجل وايضا حاجات اتحرمت على الرجل واحلت للمرأة زى الملبس خاصة فى الديانة الاسلامية وزى تعدد الزواج و .. الخ . لكن كلامنا عن الافعال الخطأ والمعاصى اللى بتحللها لنفسك وتحرمها على المرأة على سبيل المثال ليه بتنظر للبنت المدخنة انها غير مؤدبة مع انك بتعمل نفس الغلط وعارف انه غلط !! مش باقول انها تدخن زيك لكن بقول ان ده غلط سواء ولد او بنت سواء راجل او ست .. من حقك تمنع اختك عن التدخين .. لكن الأولى انك تمنع نفسك .. التدخين مش هيضر صحتها ويقويك .. أكيد الضرر بيلحق بالاتنين بغض النظر عن الجنس .. الغلط غلط سواء ولد أو بنت ليه بتنظر للبنت اللى بتتأخر لبعد الساعة 10 انها بتعمل غلط مع انك بتسهر برة لاتنين تلاتة الفجر وممكن تبات للصبح والله أعلم بتعمل ايه .. ممكن تكون سهران مع شلة .. بتشرب .. بتعاكس .. ب...... استغفر الله العظيم . وترجع زى الباشا . هو ده مفهوم الرجولة !! معتقدش .. وزى ما بتغلط برة ممكن هى كمان تغلط .. وجوة !! ليه ماتكونش قدوة حسنة ليها ؟ ماهو الحرام عليها اكيد حرام عليك .. ليه ممكن ترتكب جريمة لو لقيت رسالة حب من شاب لاختك مع انك عامل علاقات مع طوب الارض وبتتباهى انك مشيت مع دى والبعض بتوصل بيه البجاحة انه يتفاخر انه نام مع دى ودى ودى !! بيحصل وأكتر .. ليه بتحجر على أقل حقوقها وانت بتبيح لنفسك اللى مش من حقك .. ماهى اللى انت بتعمل علاقة معاها لها أخ وأب واهل .. هتقولى معرفوش يربوها هقولك زى ما استفغلتهم ممكن اختك تستغفلك .. ما انت مش فاضيلها من علاقاتك أصلا .. دا غير الافلام الجنسية اللى انت بتشوفها وغير وغير .. ليه ماتكونش قدوة حسنة ليها بدال ماتكون مخبر ورقيب وقاضى وجلاد الخلاصة ..ان العيب عيب وان الحرام حرام سواء على الرجل او المرأة .. وبدل ما تنصب نفسك اله عليها .. خليك قدوة
