أكيد الأطفال فى كل زمان ومكان بيحطونا فى موااااقف باااايخة..وخصوصا الطفل المصرى..اللى بيتميز بأنه لا يقبل الأمور على علاتها كله كوم ولما يسألونا أسئلة ملهاش إجابة كوم تانى...مش عارفة ليه إفتكرت فيلم "محاكمة على بابا" للرائع يحيى الفخرانى..لما إبنه تجادل مع المدرسة فى قصة على بابا والأربعين حرامى...القصة اللى بقالنا سنين بنسمعها ونقول: الله..جميلة..من غير مانفكر لحظة فى السؤال: ليه على بابا لما لقى الفلوس ماودهاش للبوليس وأخدها لنفسه؟ وحسيت فى لحظة أن الطفل المصرى عنده قدرة على التفكير أكبر من سنه أو ربما أصغر من سننا لدرجة أنه يستطيع الدخول إلى مناطق تعجز عقولنا "التخينة" عن الوصول إليها ياترى ممكن أى حد فيكم يجاوب الأسئلة دى؟؟!!!..والله انا ماعرفتش!! -ماما..هى الرسالات السماوية مش كلها بتدعو لعبادة الله؟ -أيوة أكيد -طب ليه بقى احنا مش بنقرأ فى الانجيل والتوراة كمان؟ خدوا عندكم كمان...شوية أسئلة عمولة من منهج تانية ابتدائى.. -طب ممكن كل واحد يختار الدين اللى يعجبه؟ -طب ربنا مانزلشى القراّن على كل الأنبياء ليه؟ -اشمعنى سيدنا نوح ماعندوش كتاب؟ -هيه ايه الأسماء اللى علمها ربنا لاّدم؟ -الرسول هاجر المدينة..طب المدينة ليه مافيهاش كفار زى مكة؟ -طب همه قوم نوح ماعندهمش سفن زى اللى صنعها سيدنا نوح علشان يركبوها؟ -يعنى كل اللى بيغرقوا ربنا مش بيحبهم؟ --طب وربنا ماغرقشى الكفار فى مكة ليه؟
