في حالة مأساوية جديدة تذكرنا بحادث الشباب الذين لقوا حتفهم أعلى قمة سانت كاترين منذ عامين بسبب تجاهل قوات الإنقاذ نقف اليوم عاجزين أمام أمواج البحر التى تذكرنا بقيمة الفرد فى أعين السلطات التى وكانها أقسمت ألا تغيث مضطر أو تنقذ روح شاب.! في أحد شواطي مدينة العجمي بمحافظة الإسكندرية ومنذ منتصف الأسبوع المنصرم تلهث أسرة مصرية بسطيه خلف السباحين والغواصين المأجورين لتأجيرهم وحثهم على العثور على جثة أبنهم صاحب العشرين عاماً بعد تخاذل قوات الإنقاذ البحري والقوات البحرية القريبه جداً من الشاطئ على القيام بواجبهم الوطني والإنساني قبل المهني. "عبد الرحمن درغام" هو شاب لم يتجاوز عقدة الثانى وطالب بالفرقة الثالثة بكلية الهندسة ويشتهر بنشاطة فى المجال الخيري كما يشهد له كل من عرفه ، ذهب في رحلة بحرية مع أصدقائه على أحد شواطئ الإسكندرية ولكن الله قد أختاره دون الجميع لتبدأ قصة معاناة الأهل في البحث عنه. بداية القصة ويروي "إبراهيم منسي" صديق "درغام" وأحد الذين كانوا معه يوم الحادث في شهادة له على صفحته الشخصية على موقع التواصل الاجتماعى "فيسبوك" فيقول:( كان يوم عادي ونزلنا هزار ونتسابق اللي نفسه أطول وهكذا وكنا واقفين في الميه عند نص حاجز الصخور بالظبط. فبعد الهزار والضحك اللي كنا فيه لقيت الشمس غيمت والميه سقعت والجو تلج ف قولتلهم أنا طالع بره ي جماعه كلهم قالولي استني خمسه كمان ف استنيت معاهم بتاع نص ساعه كده وقولتلهم خلاص هطلع ف عبده قالي استني اخر خمسه كمان (وهيا دي الخمسه اللي حصل فيها اللي حصل) ف قولتلهم هطلع خلاص ف انا ضهري للشاطئ وباصص عليهم ويدوب رجعت تقريبا خمس خطوات ولقيتهم بيصرخو ويزعقو ويقولو احنا بنغرق بجد الحقونا ف بدون تفكير وستر من ربنا اني بعرف اعوم رحلتهم بس والقران معرفتش امسك حد خاااالص وكانو جمبي بس ينزلو ويطلعو ومش عارف امسك حد خااالص وكنت ف حاله هوس. ف طلعت ع الشط وفضلت وانا طالع ابلغ الناس اللي حولينا ومحدش اتحرك لييييه ... عشان كله خايف علي نفسه. ف طلعت ع الشط لبتوع الانقاذ والجي تي سكي اللي هو موتوسيكل الميه بس المفتاح مكنش موجود لمده نص ساعه تقريبا ف قعدت اشتم واقل ادبي عليهم ومفيش فايده وف نفس الوقت كان عبدالوهاب النازي ويوسف النجار عبدالرحمن درغام ف الميه وشايفهم بينزلو ويطلعو ومحدش راضي ينزل من العالم ولاد (...) بتوع الانقاذ لولا ان واحد منهم دخل لوحده بعوامه واحده بس. طب وهل العوامه دي هتنقذهم هما التلاته ؟؟؟!! المهم دخل المنقذ دا واخد يوسف وقعده علي الصخور وراح لعبد الوهاب فضل معاه لحد م عبدالرحمن درغام اختفي مره وحده. وكان كل دا المفتاح بتاع موتوسيكل الميه مجاش وانا عمال اشتم فيهم. لحد م جه جي تي سكي تااني من شاطئ ابعد وطلع عبدالوهاب النازي الاول وكان شكله جسمه ازرق خالص ومتلج ع الاخر وعينه مفتوحه ع الاخر وبيضاا ومبيتحركش ورجع حاجات كتير بيضا وف الاخر رجع دم. كل اللي واقفين اتصدمو من شكله وقالو خلاص ده مات والحمد لله اتكتبله عمر جديد وواحد ضغط علي صدره وبدا يكح وشربته شويه شاي سخن. وكان بتاع الجي تي سكي طلع يوسف ع الشط بس يوسف كان بيتحرك الحمد لله والاسعاف اخدتهم وكانوا بيدورو علي عبدالرحمن ومش موجود خالص اختفي ازااي دا كان هنا ومحدش اهتم. وروحت معاهم علي مستشفي النخيل والمستشفي مفيهاش اي تجهيزات واخر قله ادب ومكنش فيه غير اكسجين بس المهم اتحطو الاتنين ع الاكسجين لحد م اسعاف جت اخدتهم ووديناهم علي مستشفي تانيه ف قالولنا مبنقبلش الحالات دي. ف طلعنا علي مستشفي العامريه العام واتحطو ع الاجهزه وفاقو والحمد لله واتصلنا باهاليهم لحد م جم وبعد كده طلعت مع اهل #بدالرحمن ع العجمي شاطئ النخيل وكان عبد الرحمن اختفي تماما. وفرق الغطس بيقولو متقدرش تنزل عشان بليل طب وانتو لازمتكو ايه يا ولاد (....) فيه واحد مطلعش تحت الميه مستنيين الموج يهدي عشان يعرفو ينزلو ). الضمير الحكومي.. مات وبالرغم من أن الأعمال التى تمس الجانب الإنسان يكن أصحابها ذوات أخلاق رفيعه وروح عالية تجعلهم يسارعون للأداء بواجبهم على أتم وجه دون إنتظار شكر أو دون النظر إلى العائد والمصلحة وهذا ما لم يؤكده الشهود ولا المجهود. فمن ناحيتها أكدت "سارة درغام" شقيقه "عبد الرحمن" أن فرق الإنقاذ تقاعصت فى أداء واجبها وهذا يؤكد شهادة صديقة "منسي" حين أدعى فريق الإنقاذ أن "المفتاح ضايع". وقالت "سارة" عبر صفحتها الرسمية على موقع التواصل الاجتماعي "فيسبوك": (محدش معبرنا وربنا ..كل الكلام علي الفيس أنهم بيتحركوا ويدوروا وبيكثفوا مجهوداتهم والله ولا شفناهم ...كله كلام. حتي الوسايط جبنا من لولاءات وعقيد ووصلنا للزمالوطي نفسه اللي ماسك المنطقة الشمالية ولا عمل حاجة بردوا هما عاوزنا نجيب وسايط منين يعني يقولولنا ولله عاوزنا نوصل للوزراء ولا عاوزينه يبقي ابن وزير علشان يتحركوا.! هل صعب علي القوات البحرية أنها تنزل تمشط المياه وتدور مابين الصخور ولا هو كتير علينا واحنا منستهلش؟؟!!! يقولولنا والله هو مش ده الجيش اللي بياخد من ضرايبنا لو ماتحركش علشانا هيتحرك علشان مين يعني؟؟!!! هو خير بلدنا رايح لمين؟؟ الأجهزة والمعدات والضفادع البشرية مخزننها لمين ؟يقولولنا والله. لو هما عملوا اللي عليهم ودوروا بما يرضي الله وملقهوش خلاص والله احنا راضيين الحمدلله ودي هتبقي أرضه ومستقره اللي ربنا اختارهاله بس نعمل اللي علينا بدل الإحساس بالعجز وقلة القيمة إحساس "العجز وقهر الرجال" اللي بنتعوذ منه في أذكار الصباح والمساء ..صعب ياخونا وربنا صعب .. صعب لما نقعد اتنين وتلات وأربع علي المياه مستنيين فرج ربنا وان المياه تحدفه علي الشط هنا أو يبان في أي حته ..بداية من الخميس لما رضوا نجيب خاص بس حسينا أننا بنعمل حاجة بس برضوا الكل بيقول الموضوع عاوز الجيش يتحرك ..القوات البحرية هي اللي عندها إمكانيات أنها تلاقيه إن شاء الله. وأنا أخويا لا مات في مظاهرات ولا أي حاجة سياسية ده كان بيتفسح مع صحابه واحنا مش بنقولوهم يخرجوهلنا حي دحنا عاوزين ندفنه هل ده كتير علينا؟؟ احنا مش عاوزين بس يطلعوا عبدالرحمن احنا عاوزين الشط يتقفل أو يشوفولهم صرفة في الصخور هما بلسانهم بيقولوا ميت 32واحد علي الشط يوم شم النسيم وبيموت كل سنة 150ده كلامهم بيقولوهلنا ويكأن الموت حلاوة وبيوزعوا علي الناس افضلوا ادعوا واتكلموا وافضحوهم ومنسكتش غير لما يبقي فيه فعل علي الأرض ويارت الكل يشارك علي هاشتاج #أين_جثة_عبدالرحمن_درغام هنا وعلي تويتر ومحدش يصدق أي كلام غير منا لو في حاجة مش هنخبي والله. معاك فلوس.. هتعيش فيما أكد والد "عبد الرحمن" ل"الشعب" أنه حتى اللحظة لم تستخرج جثة نجله وأن كل من يشارك في عملية البحث حتى اللحظة هم فلاق من المتطوعين أو المدفوعين الأجر وسط غياب لفرق الإنقاذ البحري وإمكانيتهم المتطورة التى تسهل فى عملية التمشيط. فيما أكدت "إسراء درغام" إبنة عم "عبد الرحمن" أن هناك قنوات فضائية قد أجرت معهم عدة حوارات مع اطلاق وعود بالمساعدة وتوصيل صرخاتهم للمسؤلين لكن لا حياة لمن تنادي فكتبت: (التلفزيون جه صور معانا في البيت و قالنا الحلقه هتتذاع قبل رمضان بيوم قولنا طب وايه لازمتها بقي انكم تصوروا احنا عايزين الحلقه تتذاع في نفس اليوم عشان المسؤلين يعرفوا انهم اتفضحوا و يتحركوا شويه و يعملوا حاجه قالوا انتوا ليكم ان المشكله بتاعتكم تتخل خلال يوم او يومين. الكلام دا حصل يوم الجمعه و انهارده الاحد و محدش اتحرك و لا عبرنا و لا عملنا حاجه كل اللي هما عملوه انهم ملوا مكان حلقه و خلاص لكن محدش بعتلنا اي حاجه و لا حتي الكلام اللي نازل ان القوات البحريه بدأت تتحرك كل دا كذب اقسم بالله كل الغواصين اللي بيجوا يا اما متطوعين يا اما علي حسبنا المسئولين و الدوله مبعتتش حاجه. المشكله اننا عايزين القوات البحريه و الجيش هو اللي يتحرك عشان المكان اللي عبدالرحمن غرق فيه كله صخور ف اللي هينزل بأسطوانة اوكسجين ممكن الاسطوانه تتخبط فالصخور و تتفجر و الناس مش متأمن عليها من الحكومه عشان كدا محدش بينزل و يدور و القوات البحريه كمان عندها جهاز يعرف فين مكان الغريق يعني لو هي اتحركت خلال ساعه عبدالرحمن يكون طلع لكن نقول ايه حسبي الله و نعم الوكيل في البلد الزباله اللي احنا عايشين فيها اللي ابسط حق للانسان اننا عايزين ندفنه. انتم متخيلين القهره اللي والد عبدالرحمن فيها انه كل يوم بيخرج بكفن ابنه و يرجع من غيره متخيلين انه والدته كل يوم عند الشاطئ مستنيه ابنها يطلع. #عاوزين_جثة_عبدالرحمن وتحت هذا الوسم "الهشتاج" انطلقت اعديد من الدعوات على مواقع التواصل الاجتماعي المختلفه للضغط على القوات البحرية وفرق الإنقاذ للتدخل السريع وانتشال جثة عبد الرحمن بل وإغلاق الشاطئ "المميت". وكتبت "سارة درغام" مرة أخرى فقالت: (احنا اتبلغنا بالغرق يوم الاتنين وجرينا علي هناك وعملنا محضر وطلعنا علي الشط بس محدش رضي ينزل بحجة أننا بالليل والموج العالي وقالولنا استنوا للصبح فاكتفوا بتمشيط الشاطئ والشواطئ المجاورة وسبنا أرقامنا لطوب الأرض من غفر السواحل.. تاني يوم خرجوا الفجر وراحوا الباشوات الغطاسين ذلوهم عقبال ماجم..ويتصلوا بهم ويتصلوا بالنجدة لحد ماجم الساعة 11يزعقوا وبيقولوا أنتم مش بلغتم خلاص..ليه بتتصلوا كل شوية؟!!! وبيتساءلوا احنا ايه ضمنا ان البلاغ مش كاذب لازم يعدي 24ساعة علشان نتأكد! طب يعني صحابه اللي كانوا بيغرقوا معاه وفي المستشفي دول مش دليل ان البلاغ حقيقي! والموج كان عالي ومرضيوش ينزلوا..طب ياباشا أنتم المفروض مدربين تشتغلوا تحت أي ظرف..طب هنحاسبكم كأنكم خاص بعيد عن الحكومة..قالوا أنهم خايفين خصوصا أنهم لو حصلهم حاجة مفيش تأمين علي حياتهم..طب ياباشا حتي لانش وانزلوا دوروا رفضوا وقالوا لازم تصريح من المخابرات!!! مخابرات إيه..عقبال مانجيب تصريح هنكون خلاص الله يرحمنا..طب احنا هنجيب ناس من برا تنزل علي حسابنا..رفضوا بردوا بحجة ان المكان ده بتاعهم ومحدش بيشتغل فيه غيرهم ومش هيسمحوا ان ده يحصل !!! طب العمل ياخونا ؟؟ قالوا الأربع الموجة هتهدي إن شاء الله وبالفعل هادت ومكانش فيه نسمة هواء يقوم الباشوات بينزلوا يغطسوا من غير أنابيب تنفس ومن غير عدة !! طب ازاي يعني؟ في غواص بينزل من غير أنابيب تنفس ! كانوا بيدوروا من علي وش المياه وضيعوا علينا اليوم منهم لله بحجة ان المياه متعكرة طبعا الحمدلله الدنيا هايجة علي الفيس وده خلي الدنيا تتحرك شوية واستسمحوا ووافقوا نجيب غواصين من برا وأول يوم فعلا يبدأوا في عملية الإنقاذ كانت الخميس ودول بقي ماشاء الله نازلين بلبسهم ومعداتهم ودوروا ورا الصخور بس الموجة علت تاني للأسف احنا غالبا عارفين ان عبدالرحمن مابين الصخور محشور وده علي حسب كلام متخصصين من رواية أصحابه.. وطبعا بسبب هوجة الفيس راحوا بتوع الإنقاذ المدني واتخانقوا مع أمي والنساء وبيقولوهم فضحتونا وقطعتوا عيشنا وبيمنوا علي ماما أنهم نقذوا الولدين وان دي مش وظيفتهم هي وظيفتهم بس التبليغ بيبعتوا اشارة ان في حد بيغرق والغطاسين هما اللي بيجوا ينقذوا ..الغطاسين اللي جم تاني يوم الساعة 11!!! لأ ومش كده كمان وبيقولها مهو في 32واحد غرقان هنا يوم شم النسيم ليه محدش من أهلهم عملوا اللي أنتم عملتوه ده ؟؟؟؟!! وقالها ان الشط ده شط موت !! طبعا ماما مسكتتش وقالتله يتقفل هو ليه مفتوح وقامت نادت في الناس امشوا من هنا ده شط موت غرقان هنا 32واحد يوم شم النسيم قوموا روحوا فزعق وقالها أنا مش بقولك علشان تعملي كده! لأ دول كمان بيحملوا ماما مسئولية ان أخويا لسه مظهرش وأنها تقعد دقيقة مابينها ومابين ربنا وتدعي من قلبها علشان يظهر أمي طبعا عطيته محاضرة ان الدعاء له 3طرق يايستجاب ياربنا بيدفع بها عنك ضر تاني يابتتشال ليوم القيامة..وان مثلا هل ينفع واحد يدعي أنه ينجح ويدخل الامتحان من غير مايذاكر ؟ فالدعاء سبب وأنكم تأدوا وظيفتكم سبب لا يغني واحد عن الأخر.. المشكلة في الشط بقي هي الصخور محطوطة بطريقة غلط فخلت من جواها غرف وسراديب الناس بتتحشر فيها ومحدش عارف يدخل مابين الصخور عاوزة ناس متدربة تدريب عالي اللي هما القوات البحرية روحنا سعينا في موضوع المخابرات علشان اللانش وعلشان الجيش يتحرك تخيلوا سبب رفض الموافقة علي استخراج تصريح للانش؟؟ أنهم مش ضامنين احنا هنعمل ايه تحت المياه ماممكن نزرع حاجة ولا نهرب مخدرات ! طب نعمل ايه طاب ..ايه الحل؟ لا شئ .. طب انزلوا أنتم اتصرفوا طاب ده تعجيز كده!! جرينا علي أماكن كتير المنطقة الشمالية القائد الكبير مش موجود ومرضيوش يخلونا نقابل حد لحد ماربنا كرمنا بواسطة وقالنا أن هنا أخرهم هنعمل شكوي وهينظروا فيها ولو وافقوا عليها بتروح البحرية في رأس التين فنطلع علي هناك أفضل..جرينا علي هناك لقناهم عارفين الموضوع بس قالولنا لأ روحوا مخابرات رأس الحدود روحنا وخدوا البيانات ووعدونا هيتحركوا الجمعة بالمراكب يدوروا عليه في المياه وهيدوروا مابين الصخور ..ولا شفناهم انهارده امبارح وانهارده الناس اللي بتشتغل ياعلي حسابنا ياجايين متطوعين ربنا يكرمهم طبعا عاوزين واسطات أعلي فأعلي واحنا كلمنا كذا حد وربنا ييسر بس لسه الموضوع عاوز ضغط والفيس وسيلة ضغط قوية جدا الحمدلله فيارت الكل ينشر ويتحرك واللي يقدر يساعد بواسطة يساعد وأه متستغربوش أننا حتي في الموت بقي في وسايط علشان احنا طول ماحنا في البلد دي هنشوف العجب وتخيلوا بقي ان دي دورة حياة كائن مصري غرق مفيش اجراءات نعملها غير الدعاء والوسايط ان الجيش يدخل ..واحنا مش عاوزنهم بس ينقذوا عبدالرحمن وغيره من المحشورين مابين الصخور لأ احنا عاوزين الشط يتقفل بدل ماهو مقبرة ووضع طريقة أدمية للتعامل في حالات الغرق في الشواطئ الأخري بدل الهبل ده مش كفاية وجع المصيبة والفقد لأ كمان وجع العجز أننا مش عارفين ننقذ ابننا ونستره تحت التراب ونكرمه بدفنه ..يارت الكل يتحرك ومنسكتش يارب المستضعفين لا تخذلنا).
