استمعت النيابة لأقوال فايز عبداللطيف فايز، سائق حافلة نادى الزمالك فى يوم 15/2/2015.. وجاء نص الاستماع إلى الأقوال كالتالى: ■ ■ سؤال سائق حافلة نادى الزمالك فايز عبداللطيف فايز 15/2/2015 اسمى فايز عبداللطيف فايز عبدالهادى، السن 64 سنة. س: ما هى تفصيلات حدوث الواقعة محل التحقيق؟ ج: اللى حصل إنى طلعت بلعيبة الزمالك من فندق ميرديان المطار بعد الساعة 5م بحاجة بسيطة، ووصلنا قرب استاد الدفاع الجوى وأول ما وصلنا كانت الدنيا زحمة وعربية الشرطة اللى كانت معايا قالوا لى فى مدرعة هتيجى تاخدنا وساعتها اتلم مجموعة كبيرة جداً من الجماهير حوالين الأوتوبيس وفضلوا يخبطوا عليه ويقولوا «متلعبوش الماتش» وهناك بعضهم رفع تذاكر وقعد يقول: «مش راضيين يدخّلونا»، وبعدين عمر جابر وحازم إمام طلعوا لهم جنبى وقعدوا يشاوروا لهم ويقولوا لهم: مش هنلعب الماتش، وفضلنا واقفين لحد ما جت مدرعة الشرطة، وضربت غاز، فالناس جريت فى الصحراء واللعيبة اتخنقت من الغاز، وعمر جابر أغمى عليه وبعدين نزلوا لهم كلهم من الأوتوبيس، وفيه بعضهم ركب مدرعة الشرطة، وفى ناس جات معايا فى الأوتوبيس منهم عمر جابر وبعدين مشينا ورا المدرعة لحد ما دخلنا الاستاد وجالنا رئيس النادى، وقال لنا إنهم لازم يلعبوا الماتش، وهما قالوا له إحنا تعبانين، فقال لهم: لازم تلعبوا إنشالله تتغلبوا وبعدين نزلوا غرفة خلع الملابس، وعمر جابر قال للكابتن إسماعيل يوسف: أنا مش قادر ألعب، وجسمى بيترعش ورجلى مش شايلانى. س: وما رد فعل الجهاز الفنى واللاعبين حيال ذلك؟ ج: هو عمر جابر وحازم إمام قعدوا يشاوروا للجماهير، وقالوا إنهم مش هيلعبوا الماتش، وكابتن إسماعيل يوسف قال: «خلاص مش هنلعب الماتش». س: وما هو الحوار الذى دار بين رئيس النادى واللاعبين آنذاك؟ ج: اللعيبة قالوا له إنهم تعبانين من الغاز ورئيس النادى قال لهم لازم تلعبوا المباراة حتى لو هتتغلبوا.