زعم الناشط «الانتيماسوني» سامح أبو عرايس أن اعلان البنك الأهلي ” ماتقوم تطمن على فلوسك ” يعتبر سخرية من مصر . وقال أبو عرايس :” الاعلان ده من الدولة المصرية وسخرية من الصهاينة في أمريكا وقطر وتركيا والبلاد اللي صرفت علشان اسقاط مصر واشعال الثورة بها . الراجل بيمثل أمريكا وقطر وتركيا والدول الممولة للمؤامرة وهو يشبه اردوغان في الملامح ، أول مرة يقوم يلاقي الخرفان أكلت الفلوس ( الاخوان رمزهم الخرفان زي ما احنا عارفين ) معناه ان الاخوان استولوا على فلوس الصهاينة وأعوانهم وفشلوا . وأضاف:” تاني مرة يلاقي صعايدة بيرقصوا وشايلين سلاح وأخدوا فلوسه وده رمز لأن الشعب المصري ضيع الفلوس اللي صرفها الأمريكان على المؤامرة وكانوا بيرقصوا رقص بلدي رمز للشعب المصري العادي في الريف اللي مش متأثر بأفكار الغرب . وتابع:”ثالث مرة يلاقي فلوسه غرقانة في المية وده بيرمز لضياع فلوس الأمريكان والصهاينة اللي صرفوها على سد النهضة علشان يعملوا مشكلة بين مصر واثيوبيا خاصة بعد التفاهمات الأخيرة بين البلدين بما يعني أن هذه المؤامرة فشلت أيضا ” فلوس الصهاينة ضاعت في مية النيل ” . وواصل “عرايس” تفسيره قائلا:” آخر مرة لما يقوم يطمن يلاقي اللي بيطعنه في ظهره وهو رمز لوجود اختراق داخلي في هذه البلاد المتآمرة . ولو تلاحظوا في أول الاعلان تقوم زوجة الرجل باطفاء النار في ” السبرتاية ” بما يرمز لاخماد مصر لمؤامرة 25 يناير ومحاولة اشعال حرب أهلية . وبيظهر الاعلان الراجل بيمص قصب في صورة ساخرة تشير الى فشل المتآمرين . الاعلان بيمسخر اردوغان وباقي الصهاينة وبيسخر من ان الفلوس اللي صرفوها راحت على مافيش . وبالمناسبة دي مش أول مرة مصر تعمل اعلانات ترد على اعلانات الصهاينة . لو تفتكروا السنة اللي فاتت بعد ثورة 30 يونيو كانت في اعلانات ” كفاية بقر بقى ” يعني كفاية اخوان بقى . و ” من النهاردة مافيش حشرات في حياتك ” يعني من النهاردة مافيش اخوان وجماعات متطرفة في حياتك . واختتم تفسيره قائلا:”وأخيرا اعلان الراجل العجوز اللي بيضرب الخواجة على قفاه ويرمز الى أن مبارك صفع أمريكا على قفاها وكان بيقول ” 7 مستويات على البحر ” وترمز الى حضارة 7 الاف سنة وانا شرحت هذه الاعلانات أيامها !!
