يا مفطومين ع الأجنبي عايزين نبي بيعرف سياسه ودين عايزين نبي بطعم المطر والطين ..... يعرف يبوس الشمس بجبينه .... وان نام يمدد روحه ع القطرين يا ساده يا صحاب الدماغ اللولبي ........................... عايزين نبي ........... والأنبيا بيقولوا مش فاضيين ما كنتش حيّ ما كنتش ماشي طاقة ضيّ ............ بتعبّي المداين نور ما كنتش كلمه بتحاول .......... ترمّم قلبك المكسور ما كنتش نخله بتجرب ... تبوسك فوق حيطان الدور ما كنتش وردتين نايمين ..... وفاردين حلمهم عصفور ما كنتش سيف ...... ما كنتش طيف ... ما كنتش للغلابه رغيف ....... ما كنتش ع الجناين سور ما كنتش شهريار بالزور .........ما كنتش شهرزاد خايفه ولا كرباج في إيد مسرور ............ يغمّي عيونك الشايفه ولا ضحكة وجع هايفه ف طريق مسدود ولسه أمي الفقيره هناك ................. بتتمخّض وأنا المولود وأبويا بيقرا وِرْد الصبح .................. ويقول "ربنا موجود" أطول الأرض وأتّاوب ........... وأنام علي صدرك المفرود تزغرط ستي وتبسمل ........... وترقي ف سبْعها المحسود وتغرز عود في عين الطين ........... وتغرز في الهوا ميت عود رقيتك زي ما بيرقي النبي الناقه رقيتك من خُطي إبليس ومن عين بنت حرّاقه ومن كل العيون اللي ما بتصلّيش رقيتك م القلوب السود رقيتك من خيطان الخيش من الواقفين و م القاعدين ومن قلّة ضمير الصين و م البنت اللي فاتحه الشيش رقيتك من عيون الدون و م الآفه أم ست عيون ومن بيّاعة الكمّون و م الحقد اللي في الحرافيش رقيتك من خُطي الملعون ومن دقّة إيدين الهون وظلم معاويه والمأمون ومن زحمة طابور العيش وأعيش واقف وأنا جوايا .............. ميت مارد وميت سياف وميت بركان بيستنظر ............. يهيج علي سكتك ويخاف أعيش واقف وأنا مصمم ............... أغمس فرحتك لو حاف أعيش بردان وقلبي لحاف ........... وروحك منبعي الصافي أحبك وأرسمك بيت شعر ............... بس الشعر مش كافي برغم إني ...... ما كنتش حيّ برغم إنك ما كنتيش مرّه طاقة ضيّ ............... بتطبطب علي كتافي ولا كنتش عشان خاطرك .............. قصيده بِتِدِّي أوصافي ولا اتوضيت من الجنه ................ ولا من سلسبيل دافي أنا اتيممت بترابك ........... وصليت في الميدان حافي
