ايه اللي أنا شايفه ده.. الرئيس مبارك في ميدان التحرير وسع يا جدع.. وكمان معاه كل الحاشية.. مفيش حد فيهم غايب.. وكمان رجالة الحزب الوطني محجوزين علي كوبري قصر النيل وشارع القصر العيني وعند ميدان عبدالمنعم رياض رافعين رايات مكتوب عليها "احنا آسفين يا ريس" و"سامحنا يا ريس" و"دول شوية عيال وغلطوا". الريس طلع علي مكان عال وقال: ايه اللي حصل لينا ده يا رجالة. نظيف: أيام سودة وعدت يا ريس وربنا يخليك لينا يرضيك أنا أدخل السجن.. الشعب ده هيبقي لعبتي.. ماشي يا شعب. عز: يا ريس احنا هنضبط كل حاجة وأنا متبرع بسيخ حديد محمي لكل مواطن وهزود طن الحديد 500 جنيه بس. المغربي: يا ريس ابني بيتك ده احنا هنهده ونلزمهم يرجعوا الحديد لعز علشان يسخنه ويبيعه تاني.. وإذا كان عاجبهم. الجبلي: يا ريس احنا هنشغل المستشفيات الحكومية ساعة واحدة فقط في اليوم والعلاج علي نفقة الدولة هيبقي للفقراء إلي الله فقط أمثالنا وجزء منه كمان للحيوانات طرفنا علشان بتوع جمعية الرفق بالحيوان ميزعلوش. سرور: يا ريس الدستور اللي عدلوه ده يبلوه ويشربوا ميته احنا عندنا ناس جاهزة تعمل دستور فلة علشان ابننا جمال يطمئن. ابراهيم سليمان: يا ريس سيب لي ميدان التحرير ده وأنا مخليش 4 أفراد يعرفوا يقفوا فيه. العادلي: يا ريس زي ما حضرتك شايف الأمن المركزي رجع أحسن من الأول وبدل العصايا الخشب بقت كهربا وهنسيب عليهم أمن الدولة يخليهم ينسوا التلات شهور اللي فاتوا. أنس الفقي: يا ريس احنا هنلغي يوم 25 يناير من النتيجة وهنخليه 4 مايو علشان نحتفل بميلاد سيادتك مرتين وده بناء علي رغبة الجماهير. عزمي: يا ريس احنا اتبهدلنا من غيرك يا ريس والفساد في السجن للركب. الشريف: كتير كده يا ريس.. دول اتسلوا 3 شهور كفاية عليهم. وفجأة هب الريس واقفا: يا ولاد متزعلوش أنا عندي أفكار كتير علشان نخلص تارنا وانتم اختاروا ممكن نلم الشعب كله ونرميه في الوادي الجديد وكل يوم الصبح نبعت لهم 4 فناطيس ميه من مخلفات الصرف بتاعنا أو نسكنهم في سينا ونسيب عليهم ولاد عمنا أو نحطهم خلف السد العالي ونفتح عليهم الهاويس وتبقي قضاء وقدر أو نبعتهم يعملوا عمرة علي حسابنا علي بواخر ممدوح اسماعيل.. واكيد السمك هيدعي لينا. وفجأة حسيت بكوع الست حرمنا.. اصحي يا منيل علي عينك معاد شغلك.. ومالك كده يا موكوس عامل زي الفار المبلول ووشك اصفر كده.. انت شفت حلم وحش ولا ايه؟ قلت: مكنش حلم.. ده كان كابوس. بسرعة: اللهم اجعله خير