نفسي أعزمك ياريس.. أنا عارف ياريس إنك بتحب الطعمية السخنة في العشاء والإفطار زينا.. فول وطعمية.. نفسي يجي اليوم وأعزمك وسط الناس الغلابة في بلكونة عالية تنظر فقط علي الغلابة وهما عايشين وراضيين وحمدين وشاكرين ربهم علي الفول والطعمية. ومع أول قطمة للسندوتش أو التغميس بنشوف أسرة صغيرة.. بتحصل علي معاش ضمان اجتماعي، وبتشكر ربنا عليه بس للأسف بيدفعوه للكهرباء كل شهر وبقيت عيشتهم هنية لأنهم زودوا علي الفول والطعمية ما يطلقون عليه بطاطس.. (اتفضل ياريس الطعمية سخنة). طيب إيه رأيك ياريس بدل المعاش.. اديني خدمة شيل المعاش.. اعمل معروف واديني إعفاء من الكهرباء أو المياه وحول مبلغ المعاش للدولة.. كتر خيرك وخير وزارة التضامن.. بص يا ريس علي الأسرة التانية عنده عيال بالمدارس وبيقطع من قوته علشان التعليم والدروس الخصوصية اللي لو الواد مخدش درس يبقي يومه ويوم اللي خلفوه منيل.. لازم الأب يرتشي علشان يكفي الدروس والفول والطعمية وانحرموا من البطاطس للأسف يعمل إيه الأب في التعليم (إتفضل يا ريس الطعمية سخنة). بس يا ريس الأسرة ده ما شاء الله بتاكل كل حاجة في الدنيا عدا الحاجات الأساسية تفتكر ليه يا ريس علشان رابطة الحزام.. اعذرنا يا ريس ثقافة شعبك محدودة.. مش قادرة تفهم الإصلاح ولا التطوير من منظور الدولة لكن اللي يهمهم.. تشبع احتياجاته الأساسية.. مش هاقولك تطوير التعليم.. بقولك إيه يا ريس ما تسميها وزارة التكوين بدلاً من التعليم.. آه اسمنا غيرنا علشان الناس تحس في تغير (اتفضل ياريس الطعمية هاتبرد). اعمل معروف مصدقنا عزمناك.. بس ياريس اتفرج واسمع خطابك جميل جداً.. لو تحقق جميل جداً.. ولو المواطن حس بتغيير يلمسه معلش أنا جلدي تخين. أنا عارف أن في إصلاح ببطء.. لأمتي العمر بيفضل علشان أشوفه مش عارف.. أقترح عليك يا ريس أن تلغي الدعم (اتفضل يا ريس الطعمية ديه مش من الدعم). الحكومة بتقول.. إنها عاملة رصدًا لجميع المحتاجين وبتوفر السلع بالثمن الحقيقي.. وبتدي الغلابة بدله خدمات.. أقصد تخفيضًا أو إعفاء من مصروفات المدارس والدروس الخصوصية هي والكهرباء أو المياه أو إيجار المسكن والله بدعيلك يا ريس. أنا ابني نور سمعته بيقول إيه.. قال عاوز يا ريس يكون رئيس جمهورية مصر العربية.. أقوله إيه احلم ولا أقوله.. بس يا ولد عيب. ذوي الاعاقه يا ريس ولادك دول 10% من السكان.. لو التقدير صح هما فين من برامج الحكومة.. لا يحتاجون أن نفصلهم عن المجتمع.. هتقولي بنعمل قانون أقولك صح بس يا ريس نفعل القانون القديم وندور علي غيره وعايز أقولك.. أنا مشغل كتير منهم بعيد عن القانون والله يا ريس.. بالهناء والشفاء الطعمية السخنة ليك يا ريس وربنا يخليك لينا. إنها رسالة من منير فخري لرئيس الجمهورية السابق.. والقادم أيضاً.. فالوضع زي ما هو ومفيش جديد.