يدخل المريض حجرة طبيب الأمراض الجلدية.. يسلم على الطبيب.. يجلس امامه.. يسلمه تذكرة الكشف الموضح بها اسمه..ثم يدور هذا الحوار: الدكتور: أهلاً أستاذ عبد العليم..مشكلتك ايه؟
المريض: ابداً يا دكتور انا كويس جداً.. لكن عندي مشكلة كبيرة جداً.. حالة هرش بتجيني وتخليني آكل جسمي أكل وبالذات هنا ( يشير الى منطقة الصدر)...لكن ما بتجينيش في كل وقت...بتجيني في وقت محدد وموقف واحد ومكرر كل مرة
الدكتور: امتى بتجيلك؟
المريض: لما اقابل واحد متدين او أتعامل معاه واعرف انه متدين او حد يكرر كلمة الدين في حضوري .. اسيبه واقعد آكل في جسمي وده بيخليني دائماً منفعل جداً وبيحطني في مواقف صعبة ومواجهات مستمرة
الدكتور: انت ملحد
المريض: لأ ...لكن ضد ان الدين نحشره في كل حاجة في حياتنا..كمان انا ليا بالموجود والمحسوس اما الغيبيات فلا أؤمن بها ابداً...ومقتنع ان العلم فقط هو الطريق ولا طريق غيره..
الدكتور: آه تمام تمام...مشكلتك واضحة وعلاجك معروف..اتحملني شوية واسمعني كويس
المريض: اتفضل
الدكتور: مشكلتك مش في جلدك ..مشكلتك في قلبك..كل بني آدم ربنا خلقه حطله برنامج في قلبه يعني بلغة الكمبيوتر ( صتبله) برنامج في قلبه اسمه الدين..انت عطلت البرنامج ده وشغلت برنامج تاني اسمه العلم بالرغم من ان برنامج العلم اللي انت شغلته ده الدين بيهتم بيه جداً وبيحث عليه جداً جداً.. انت وقفت على باب الدين وعرفت ان ده باب اسمه الدين لكن ما دخلتوش وما عرفتوش وماحسيتوش وما فهمتوش..دخلت باب العلم وعمال تلف فيه ليل ونهار ولما يصادفك فيه حاجة توديك لباب الدين بترميها على طول مش عايز اي حاجة تفكرك بالدين وعلى فكرة الحاجات دي بتقابلك كتير جداً...لما تقابل المتدين او تتعامل معاه او حتى ييجي المتدين او الدين في ذهنك لازم تهرش عشان الدين والمتدين بيحركوا برنامج الدين عندك واول ما يتحرك بتهرش...وعلى فكرة اللي بيحصل معاك ده بيحصل مع ناس تانية الدنيا واخداها شوية او كتير بس مش بالشكل اللي بتوصفه طبعاً.
المريض: طيب والحل يا دكتور؟
الدكتور: ما توقفش على باب الدين جرب تدخل وتعرف وتحس وتتذوق.. فكر وحلل واربط زي ما بتعمل في العلم..وزي ما بتشغل دماغك خلي قلبك شغال..جرب تقرأ قرآن..جرب تصلي..جرب تصوم..جرب تذكر ربنا..جرب وشوف.
المريض: بقلك يا دكتور باهرش من الدين.. بآكل في جسمي باقطعه من الهرش.. عايزني افتح بابه وادخل واعمل اللي بتقول عليه ده.. انت عايز تموتني؟!
الدكتور: لأ عايز أحييك..عايز أحييك يا استاذ عبد العليم..لو مش حتقدر تعمل كدة خلاص روح شفلك مكان تعيش فيه ما فيهوش دين ولا متدينين ولا اي حاجة تفكرك بالدين..وطبعاً لو لفيت الكون كله المكان ده مش حتلاقيه..تعرف ليه.. لأن ببساطة الدين جواك وفي كل حتة فيك.. حتروح منه فين.