دعا المستشار وليد شرابي، عضو حركة قضاة من أجل مصر، ب"سخرية" إلى عدم النزول في يوم 3 يوليو والاكتفاء بالجلوس في المنزل وشرب الشاي ومشاهدة مباريات كأس العالم وبعض الافلام. وقال شرابي ، صباح الجمعة، عبر حسابه الشخصي على موقع "فيس بوك" "إياك تصدق الناس اللى عايزه تنزل يوم 3 / 7 أنت ريح فى البيت وإشرب شاى وشوف كأس العالم وإتفرج على فيلمين، لكن وأنت بتعمل ده خليك فاكر إنت كنت عامل إزاى يوم 30 / 6 / 2013 ، خليك فاكر إن الكهرباء لو كانت بتقطع ساعة فى اليوم و ضحكوا عليك وقالوا لك إنها بتروح غزة دلوقتى يا مسكين مش لاقيها ومحدش بيسأل فيك". وأضاف "شرابي" "وخليك فاكر إن الكهرباء كانت موجوده ورخيصة ودلوقتى مش موجودة وغالية ، وخليك فاكر إنك كنت زعلان جداً علشان كنت بتقف فى طابور البنزين لكن دلوقتى مش حتلاقى تشتريه ، وخليك فاكر إنك نزلت وشلت الضباط على أكتافك !!! لكن دلوقتى بتدعى عليهم فى الكمين وتدعى إن ربنا يسلم قفاك منهم".
وتابع "خليك فاكر إن الجنيه خسر جنيه من قيمته أمام الدولار وحضرتك بتغنى تسلم الأيادى ، وخليك فاكر شكل رغيف العيش كان إزاى أيام الرئيس مرسى وبقى إزاى على إيد العسكر ، وخليك فاكر إنك كنت واقف أمام قصر الرئيس مرسى وهتفت بسقوطه وروحت بيتك مبسوط وسعيد ومش خايف والنهارده بتقف زى الألف قدام أمين الشرطه علشان انت مش عارف ممكن يعمل فيك إيه".
وواصل "شرابي" حديثه عن مبررات عدم النزول للشارع، قائلا "خليك فاكر إن كان عندنا حاجه إسمها صناديق الإنتخابات لكن دلوقتى ما فيش غير صندوق واحد السيسى بيحط فيه صوته ، وخليك فاكر أن كان عندك رئيس عايز يحافظ على البنات وبقى عندك رئيس أنصاره بيغتصبوا البنات ، وخليك فاكر إن كان عندك رئيس عايزنا ننتج الغذاء والدواء والسلاح وبقى عندك سيسى ماعندوش غير مافيش ، وخليك فاكر إن المانجو فى عهد مرسى كانت أرخص من بطاطس السيسى".
وقال "خليك فاكر إن الرئيس اللى كنت ثائر عليه علشان تعزله ما طلعش طيارة ملك علشان يشحت منه ، ولا لبس جاكيت حرس رئيس روسيا علشان يرضى يقابله ، ولا فتح الباب ووقف زى الخدام لمذيعة إسكاى نيوز ، ولا قعد مع كيرى وسابه يحط رجله فى وشه ، ولا باع أراضى البلد للإمارات ، وخليك فاكر إن الكُتاب اللى كانوا بيقولوا على الريس مرسى أنه فاشى وديكتاتور دلقتى مش عارفين يكتبوا حاجه وبيقولوا علشان مش مسموح لنا".
ومضى شرابي بالقول "وخليك فاكر إن العالم الإسلامى فرح بفوز الرئيس مرسى بالرئاسة وإن إسرائيل فرحت بوصول السيسى للرئاسة ، وخليك فاكر إن الرئيس مرسى لم يجور على حق قاضى والقضاه قالوا عنه أنه فى حرب مع القضاء !!! لكن العسكر فصلوا 15 قاضى ومافيش قاضى قادر يقول بم ، طيب فاكر لما مشيت معاهم وهما بيهتفوا ( بيع الثورة يا بديع ) أهه بديع إشترى الثورة ودفع فيها روح إبنه وأخد ثلاث أحكام أعدام علشان مش عايز يبيع الثورة".
واستمر "شرابي" في حديثه قائلا " خليك فاكر إن الرئيس مرسى كان دائماً يقول دم الشهداء فى رقبتى والسيسى قال إن دمهم هو إللى وصله للحكم ، طيب إنت فاكر العسكر قتل كام واحد فى رابعة والنهضه والحرس الجمهورى والمنصة ورمسيس و6 أكتوبر و25 يناير ؟ طيب فاكر قتلوا كام صحفى ؟ أعتقلوا كام طالب جامعة ؟ إغتصبوا كام بنت فى السجن ؟ أصابوا كام واحد بالرصاص الحى ؟ طيب إنت عارف فى كام دكتور جامعة معتقل ؟ عارف المستشار محمود الخضيرى بقاله كام شهر فى السجن ؟ إسأل نفسك شفت إيه وحش من الشيخ حازم صلاح أو الدكتور سعد الكاتتنى أو المهندس أبو العلا ماضى أو الأستاذ عصام سلطان أو الدكتور محمد البلتاجى أو .. أو ... أو ؟".
واختتم بالقول "لو حضرتك ضميرك مستريح وعارف إن 30 / 6 كانت ثورة مش إنقلاب وكل ده مأثرش فيك ولسه فاهم إن العسكر بيفكروا فى مصلحتك ومش عرف ترجع راجل زى لما كنت عامل نفسك يوم 30 / 6 .. يبقى أقعد فى بيتك يوم 3 / 7 و إوعى تنزل مع الأحرار ، وهدى نفسك يوم 3/ 7 وريح بالك وصلى على النبى !!! أه بالمناسبة هو أنت ممكن تصلى على الرسول صلى الله عليه وسلم من غير ما تدفع الغرامة ولا لأ ؟؟؟ ومتنساش تسلملى على الحرب على الإرهاب .
