كان كابوسا فظيعا فقد اقتحم اربعة رجال أشداء مكتب الكاتب الكبير حنتيرة الاناضولي والبسوه بالعافية القميص الابيض وحملوه الى سيارة اسعاف تحركت به باقصى سرعة إلى مكان مجهول !! -عليا النعمة لأوديكم في ستين داهية!! انتو مش عارفين انا مين؟؟؟!! -انت تخرس خالص!! يا مجنون ياعيان في مخه يا مانخوليا! -يا جماعة انتو اكيد غلطانين في العنوان!! انا حنتيرة الاناضولي!! عارفين مين هوه حنتيرة الاناضولي؟؟؟ -طبعا عارفين كويس انك الزفت الاناضولي! هوه احنا شاربين بانجو والا شايفنا ماشيين نخبط في الحيطان!! -طيب واخديني كده ورايحين على فين ؟؟!! -انت تكتم النفس وتخرس خالص يا مانخوليا يا عتيد الاجرام!!! وفور وصولهم الى مصحة السح الدح امبو للامراض النفسية والعصبية تم تشكيل لجنة رباعية لفحص حالة حنتيرة الاناضولي بعد توضيبه ... -دول كام يا ابني ؟ -خمسة وخميسة يا بيه في عين اللي ما يصلي ع النبي!!!! -طيب والنهاردة ايه في ايام الاسبوع؟؟ -الاربع يا سعادة البيه...ربنا يجعل ايامك كلها زي القشطة واللبن الحليب!! -وانت يا ابني اسمك ايه في يومك ده اللي مش فايت ؟؟ -محسوبك حنتيرة الاناضولي...خدام البهوات الكبار الشهير ب جيمس بوند !! -لاااااااده انت فعلا طلعت مانخوليا ع الآخر!! ودوه عنبر نمرة خمسة!!! -ياناس انا مش مجنون!! انا عاقل !!! عليا الطلاق لو ما سبتوني ارجع الجورنال ح أوديكم في ستين داهية!! وهنا قالت احدى الممرضات: ما يمكن يا دكتور ابوالليف يكون عاقل ومش مجنون! فرد عليها الدكتور ابو الليف: يا بنتي ده بيستعبط وسايق الهبل ع الشيطنة!! ولو مش مصدقاني أنا ممكن أوديكي معاه عنبر نمرة خمسة عشان تتأكدي بنفسك!!! -لا وعلى ايه يا دكتور !!! انا عندي عيال عايزة اربيهم!!! وفي عنبر نمرة خمسة عاش حنتيرة الاناضولي أسوأ ايام حياته فقد تناوب على ضربه عتاولة المجانين ناهيك عما صاحب الضرب من اهانات أخرى.... -انا بس عملت ايه في دنيتي ياربي؟ ده ما كانش مقال كنت ناوي اكتبه! -بتقول ايه يا مجنون يا عيان في مخه يا مجرم ؟؟؟!! -ولا حاجة يا سعادة الباشتمرجي! انا كنت بادعيلك!! -ياااااد ده انا سامعك بوداني دول وانت بتبرطم زي الجماعة المهابيل اللي مخهم طاقق!!! -ابدا والله انا كنت باقول ربنا يعلي مراتبك كمان وكمان وتبقا مدير المصحة!! والا اقولك يارب ياخدوك وزير صحة!!! وبعد التماسات عديدة قدمتها اسرة الاناضولي تقرر عرضه على لجنة جديدة لفحص حالته... -انت عارف يا اناضولي انت محجوز هنا ليه؟!! -طبعا سيادتك عشان المقال الزفت اللي كنت ح اكتبه واقول فيه ان الدنيا ربيع!! -عال قوي!!! واضح ان مخك ابتدا يصحصح من جلسات الكهربا والذاكرة ابتدت ترجعلك ! -البركة في سعادتك يا دكتور انت والبهوات الدكاترة !! بس سايق عليك النبي تخرجني من هنا!!!! -صبرك عليا يا ابني!! هوه دخول الحمام زي خروجه؟؟؟ وياترى عارف المقال بتاعك عمل فيك كده ليه؟!! -أهو ده يا بيه اللي أنا مش عارفه ! ده انا كنت لسه ح اغنى في المقال واقول الدنيا ربيع والجو بديع !! لقيت الدنيا اتطربقت على نافوخي!!!!! -خلاص يا أناضولي يبقا لازم تقعد معانا شوية لغاية ما تعرف سبب دخولك المصحة!! -طيب ما تفطمني يا سعادة الدكتور ينوبك ثواب؟؟؟!! -وهيه الحاجات دي برضه ينفع فيها تفطيم!!! ده انت راجل قديم في الكار وعارف كل حاجة!!!!! وهكذا تقرر استمرار حجز الاناضولي نظرا لخطورة حالته.. -طيب ما تشوفوا لي يا بهوات عنبر تاني غير عنبر نمرة خمسة ينوبكم ثواب... دا انا اتهريت ضرب!!! -يا ابني ده ارحم عنبر عندنا!! بس لو عايز تتنقل منه مافيش مشكلة !!! احنا يهمنا راحتك!! -ابوس جزمتك يا دكتور ابوالليف تنقلني من العنبر الملعون ده!! -بس كده!! غالي والطلب رخيص!! ودوه عنبر نمرة ستة!! وفي العنبر الجديد الذي يضم ألفين مجنون اكتشف الاناضولي ان عنبر نمرة خمسة كان جنة مقارنة بالجحيم الذي ذهب اليه .. -يا ناس ابوس ايديكم طلعوني من هنا ورجعوني العنبر الاولاني.. .انا مخنوق والله العظيم مخنوق!!! يارب خدني وريحني من العالم اللي مخها طاقق دي!!! -اصحا يا اناضولي!! مالك بتخترف كده زي المهبول؟؟ هوه انت رجعت تهلوس تاني وانت نايم؟؟ -الكابوس!!! نفس الكابوس الملعون بتاع كل يوم!! انا خلاص يا زيزي قربت أتجنن!! -تاني عنبر نمرة خمسة والمصحة ومقالة الدنيا ربيع؟؟ ما قلتلك تبطل حبوب الهلوسة اللي بتبلعها قبل ما تنام؟؟؟ -ماهو من غير الحبوب دي مش ح يجيني نوم ...واديكي شايفة الكابوس اللي بيطلع لي كل ليلة زي العفريت ويطير النوم من عينيا !!! انا خلاص يا زيزي مخي ضرب !!!!! -طيب قوم يا حنتيرة اشرب لك كوبايتين لبن دافي!!! يمكن اعصابك تهدا وتقدر ترجع تنام! -انا خلاص اعصابي تلفت!!! كل يوم باشوف نفس الكابوس وبعدين ياخدوني على مستشف المجانين !! انا خايف يا زيزي الحلم ده يتحقق بصحيح!! -يا حبيبي ما تخافش انت علاقتك حلوة بالناس اللي فوق !!! ولا يمكن يعملوا فيك كده أبدا!! -يا زيزي انتي مش عارفة الناس دول ماسكين عليا ايه؟؟؟؟؟ وممكن يعملوا فيا ايه!!؟؟ -ازاي بس وانت مقطع نفسك عشانهم لغاية ما صحتك راحت ....ومخك اتلحس!!!! -هوه حد عارف يا ولية... ايه اللي ممكن يحصل بكرة!!؟؟ أديكي شايفة بنفسك اللي بيجرا حوالينا !!! وفي اليوم التالي ذهب حنتيرة الاناضولي الى مكتبه بالجريدة حيث شرب جردل قهوة استعدادا لكتابة مقاله اليومي.... -استعنا ع الشقا بالله!! تفتكري يا حلاوتهم ممكن اكتب عن ايه النهاردة ؟!! -ما تكتب سيادتك مقال عن حلاوة الدنيا وجمالها ..ويا سلام كده لو يكون عنوانه : الدنيا ربيع والجو بديع! -إلا المقال المنيل على عينه ده!!! ده مقال ممكن يتفهم غلط واروح في ستين داهية!؟؟ -ولا غلط ولا حاجة!!! ده سعادتك لو كتبت ريان يا فجل!!! الناس كلها ح تشيلك على اكتافها شيل!! انت ناسي سعادتك الخدمات اللي قدمتها للبلد!!!! -يوووووه دي حكاية قديمة يا باتعة وماحدش يعرف عنها حاجة!! يعني كان لازم تفكريني بالذي مضى!!!!! -ازاي الكلام ده؟؟!! ده سعادتك أخطر من جيمس بوند!!!! ومفروض يعملولك تمثال في مدخل الجورنال!!!! -يا باتعة كلامك ده خلا دماغي يسخن والطاسة تشتغل!!! انا خلاص ح اكتب المقال ده ...بصراحة فكرته تجنن!!! واهي فرصة ادلع فيها البهوات الكبار والعن سنسفيل ابو المواطنين الغلابة اللي واجعين دماغنا!!! -طيب ما تكتب حتة كمان في المقال عن حلاوة المستقبل وجماله!!!! -والله فكرة!!! واقول ان بكرة ح يكون احسن من النهاردة!!!!! واننا بعون الله ح نكون اقوى من الدنيا دي كلها!!! وح نبقى قوة ما يغلبها غلاب!!!!! وفجاة اقتحم اربعة رجال أشداء المكتب والبسوا حنتيرة الاناضولي بالعافية القميص الابيض وحملوه الى سيارة اسعاف تحركت به باقصي سرعة الى مستشفى المجانين!!!