علق سيد عبدالحفيظ، مدير الكرة بالفريق الأول لكرة القدم بالنادي الأهلي على عدم مصافحة البعض في إشارة لرئيس نادي الزمالك مرتضى منصور، أثناء تسلم الفريق لميداليات المركز الثاني في بطولة كأس مصر الأخيرة. وقال سيد عبدالحفيظ خلال حديثه عبر قناة الأهلي: «أنا راجل عندي 45 سنة معتقدش أن اللي جاي هيبقى قد اللي راح، مستحيل تعيش زي اللي عيشته، مستحيل توطي دماغك، ممكن ميجيلكش فرصة تانية ترفعها». وأضاف: «مينفعش حد على مدار 4، 5 سنين يتجاوز في حقك وحق أهلك ووطنيتك ولما أشوفك أسلم عليك، ده لو آخر يوم في عمري مش هروح أسلم عليك، الموضوع منتهي». وحقق النادي الأهلي الفوز اليوم الأحد على حساب الجونة بهدفين دون رد في المباراة التي جمعت بينهما ضمن منافسات الأسبوع ال 26 من مسابقة الدوري الممتاز. ووجه سيد عبدالحفيظ مدير الكرة بالفريق الأول لكرة القدم بالنادي الأهلي رسالة خاصة لأحد الإعلاميين بعد الأحداث الأخيرة التي شهدتها الساحة الرياضية في مصر. وقال: «في إعلاميين كتير مش هقول بعتب عليهم ولا حاجة في ناس ممكن ميبقاش عندها خلفية الأحداث بعذرهم، مع إني أعتقد إننا عايشين في مجتمع صغير وكل حاجة بتنتشر فعارفينه، ممكن ناس تلوم عليك وناس لا». وأضاف: «هختص اتنين بالكلام، هختص واحد زي إبراهيم عبدالجواد، على مدار 3، 4 سنين مفيش حاجة ليا مش بيعاتبني فيها، أنا اشتغلت معاك، إيه اللي شوفته مني يخليك تقول حاجة ممكن تبقى بعيد عن الأخلاق». وتابع: «العتاب ده لسيد بس؟.. طب أنا هعاتبك الراجل ده قبل مباراة الكأس بيومين اتنين طلع في التليفزيون للأسف مع واحد أهلاوي، بيقول إن ده واحد متربي مع الحمير هو قال كده، أقسم بالله عمري ما شوفتك وأنا صغير ولا دخلت بيتك، هتربى مع الحمير إزاي وأنا عمري ما شوفتك وأنا صغير؟». وأتم سيد عبدالحفيظ حديثه: «واحد عمال يهز دماغه ويهز راسه ليه مطلعتش يا إبراهيم قولت بعتب على الأستاذ فلان الفلاني إنه يقول كده وإن دي مش رياضة، هو العتاب عليا بس؟».