لا كدة أنا بدأت أقلق بجد، كله كده بيتحقق معاه ويتطس 15 يوم فتح كلام، أنا قلقان بجد، أنا صحيح كنت بقول فيه شوية تأخير، وكمان من كتر الملفات اللي اتفتحت للكل وكمية الأتهامات والبيانات اللي فيها، والنائب العام البروسيسور بتاعه تعبان والميموري عالقد فكان مهنج أغلب الأوقات، علشان كده أول ما شم نفسه كل الأبليكيشنز أشتغلت في وقت واحد، يعني كله أتحقق معاه وخد 15 يوم ترويق، بس خايف ليكون تفسيري ده ضحك عالعقول، ونصحى في يوم نلاقي المحاكمات أتعملت وكله خد براءة، وساعتها يا حلو مش هتقدر تتكلم، أنا بريء وبحكم محكمة ولسه طازة، أو يتحاكمو في الدرا ويطلع حكم يتنفذ على أبو جلامبو والبشوات يكونو أتسلكو من البلد، حد يا جدعان يطفي النار دي بجردل ميه ويطمنا، عايزين ناس تروح تشوفهم في السجن عالحقيقة وتتابع الموضوع، أنا عندي إنهم ما يتحاكموش ويهربو من الأول أهون من إنهم يتحاكمو صوري وياخدوا براءة، بالظبط زي ما كانو بيمثلوا علينا تمثيلية الديمقراطية والانتخابات، كان أشرفلهم أنهم يقولو لا يا عم شطبنا مفيش ديمقراطية، بدل ما يضحكو علينا ويطبخوها .