صباح الفل. اية رأيكم ندردش خمس دقايق فى موضوع الاستفتاء دة بس من غير فلسفة؟ ماشى؟ طيب صلوا بينا على النبى, غليك أفضل صلاة يانبى. دلوقتى القيادة العليا جابت لجنة جديدة تعمل تعديلات فى الدستور عشان اللجنة اللى قبلها كان جايبها مبارك, حلو؟ حلو. قامت اللجنة الجديدة عملت شوية تعديلات عشان اللى عايز يرشح نفسة للرياسة ومعاها شوية حاجات تانية, زى الفل. وجم قالولنا يوم 19 ياجماعة الاستفتاء على المواد دى عشان نخلص بقى ونخش على مجلس الشعب ومجلس الشورى وبعدهم الرياسة ونسلم السلطة ونرجع بقى نشوف شغلنا, عداكم العيب. يس استنى انا عندى سؤال بعد اذنك, انتو لية ماعملتوش دستور جديد زى مالراجل اللى فى التلفزيون كان بيقول؟ مافيش وقت؟ طب مافيش وقت لية لامؤاخذة هو احنا مسربعينكم؟ طب مانطول بالنا كدة ونعمل واحد جديد شياكة كدة حتى يبقى شكلنا حلو قدام العالم, وبعدين أساسا الواد أحمد جارنا بيقول مافيش سبب للسربعة أساسا دة حتى انجلترا عمرها ماكان عندها دسنور أصلا, وبعدين ماحنا ممكن نشتغل عادى يعنى وانتوا بتعملوا الدستور ولا دة لة علاقة بالشغل عندنا فى الغيط؟ ماعلينا أصل الواد أحمد جارنا دة بيتفلسف كتير بس بصراحة كلامة خوفنى قال اية لو الناس وافقت عالتعديلات ودخلنا بسرعة فموضوع مجلس الشعب حيبقى كلة اخوان وحزب وطنى, طب اخوان ماشى بس هوة لسة فى حزب وطنى؟ قال اية بيقول طبعا وكمان البلطجية بتوعهم موجودين , يانهار مش فايت. وبعدين انا مش عارف الاخوان دول بيقولوا اية اساسا بس عندنا لما بنلعب ماتش فى الجرن الفريقين بياخدوا وقت يسخنوا مش فريق يسخن والتانى يتاخد على مشمة كدة, دة كلام أحمد جارنا برضة خد بالك, يبقى كدة ماحدش سخن غير فريقين بس طب وهوة ينفع كدة؟ قمت أنا سألت الواد أحمد جارنا, يعنى انت قصدك نروح نقول لأة؟ قام قالى ولا كدة برضة, يوة حيرتنى ياعم أحمد طب لية؟ قالك لو قلنا لأ يبقى القيادة العليا يا حاترجع للدستور القديم زى ماهوة ونروح ندور على جمال راح فين ونجيبة تانى يا حتعمل تعديلات تانية ياحتعمل دستور من أول وجديد, يوة طب ماكان من الاول. رجعت سألتة, طب ياعم أحمد هم منين متسربعين ومنين حايرجعوا يعملوا كل دة تانى ويضيعوا وقت؟ قام ضحك ضحكة خبيثة كدة وقاللى ,شوف ياسيدى لو قلنا لأ للتعديلات أول احتمال لو رجع جمال ودة مش ممكن طبعا بس اذا حصل ادينا فى القيادة ماجيناش ناحيتة وماهوش زعلان مننا, ولو عملوا تعديلا ت تانى اهو لو فية حد لاسمح اللة عندة حاجة كدة ولا كدة يلحق يظبط نفسة ماحدش عارف الناس بتعرف كل حاجة مستحبية ازاى, ولو عملوا دستور جديد أهو منها نكسب وقت وبالمرة نعمل اللى الناس عايزينة. أنا بصراحة اتلخبطت وكنت شوية وحالطم على وشى, بس قلتلة أنا ياعم أحمد حاتكل على اللة وحاعمل اللى تقولى علية, قام قالى انة عن نفسة حايروح يوم الجمعة التحرير يقول لأ للاستفتاء اساسا ولو فضلوا مصممين يعملوة حاروح برضة يوم السبت وأقول لأ عشان ماسيبش فرصة للى عايزين يصطادوا فى المية العكرة ويقولوا نعم ويدخلوا بسرعة على مجلس الشعب ومنة عالحكومة وكمان عشان انزل التحرير بعد كدة واقولهم انا عايز دستور من أول وجديد وانتم مشرفينا استنوا معاناكام شهر كمان وبعدين اعملوا مجلس رياسة وسيبوا الراجل الجميل شرف يشتغل ونرجع الشغل زى زمان واحسن وكمان سنة لما الفرق كلها تسخن نعمل بقى الدورة الرمضانية براحتنا. ربك والحق كلامة زى الفل , مش كدة ولا اييييية أحمد عبد المقصود محرم