تعرف ... إن أغرب حد صاحب ليا شفته في المراية أعجب خلطة عرفتها في كتاب طلاسم ملوش قراية حواليه ألف حاجز كتاب حير الفلسفة وجنن السيكولوجيا وخلى المنطق يقف عاجز مانا من الربكة بقيت تركيبة ماهيش راكبة تاخدني العزة والجبروت فوق الانسانية رتبة أو حتى اتنين لكني ضعف متجسد وماشي على رجلين عايش لنفسي رغم اني حموت من غيرك ولا مستني ولا عايز منك غير خيرك ويكون جزاتك تدوق عذاب فوق ما تتحمل مانا صورة ساعات بتكدب وكتير بتتجمل لو متشوهة الضحك على نفسي ده طباعي وأقولك شاركني اكدب عليا وزيد في خداعي واديني حجج ومبررات مقنعة كل يوم نبدل في الأقنعة وقوللي شكلك حلو وانت لابسه لكنه هو اللي لابسني كما العفريت أو الجني اوعاك تقول مريض لأ .. لأني أنا المرض نفسه غصب عني لأنني برود متناهي وحقد آيد قلبي وافق عقلي رافض قراري خدله موقف محايد مابين شوية ملاك وشيطان رجيم ما بين طفل ساذج وبواقي شيخ حكيم في وسطهم كياني تاه وعملت من نفسي إله لي حق أدخلك جنة أو نار جحيم وناسي اني زيك وجايز قبلك حمشي عالصراط المستقيم فتسألني اللي عاوزه في دنيا محسوبة عليك أيام بتسألني وانا محتار وأنا نفسي أكبر علامة استفهام بتسألني اللي عاوزه واللي روحك ليه محتاجة أقولك محتاج كل شئ وعايز كل حاجة وبكله وجميعه عايز أفوز مانا اتخلقت عشان أعوز عايز ايه؟ سؤال صعب جوايا عشش وبات ازاي أجاوب وأنا نفسي مخلوق من الرغبات عايز ايه؟ سؤال حعيش عمري كله أقوله بعلو صوتي ولما ألقى اجابة تبقى نهاية الحياة وموتي وتملي بهرب من السؤال لماضي راح وبكرة جاي وبنسى يومي في ايديا شفت أنا غريب ازاي؟ بنسى أغلاها هدية وناسيك وناسي نفسي وناسي عالم متوهني وناسي سؤال ملاحقني ولا تقوليش ده جنان رسمي عشان النسيان ده اسمي لأني كيان غامض بلاوع وبتلامض بلبس قناع الملاك وأنا الخطيئة وأنا حقيقة خداعة وكدابة وترجع تسألني؟ متسألنيش لأن أنا نفسي سؤال ملوش اجابة