«ظهور تدريجى للإضاءة على الفور.. جورج يمسك بمفرش يضعه على إحدى التخت ثم يضع عليه فازة بها زهور.. يحرك حبلاً فى الخلفية فتنزل ستارة رسم عليها بخطوط سريعة فرقة موسيقية أو مجموعة عازفين.. وموسيقى جاز خافتة.. ينحنى جورج أمامها وهو يكتب فى نوتة وهمية.. ينصرف..» عايدة: لما حكيت لك أخبار البلد.. ماكنتش عاوزاك تكتئب كده.. طارق: يعنى.. بس صدقينى.. وده مش كلام للاستهلاك المحلى.. أنا حاكون سعيد أكتر لما تكلمينى عن أخبارك. عايدة: أخبارى هى أخبار البلد.. طارق، أنا كذبت عليك لما قلتلك حصل لى حادثة.. أنا ماحصليش حوادث.. كل ده «تشير إلى إصاباتها».. من آثار فسخ الخطوبة.. طارق: قصدك إيه.. اتعرضتى لتعذيب؟ عايدة: لأ.. ولا حد جه جانبى.. أنا اتعرضت لعملية تهذيب فى المدرسة.. بمجرد ما أشيع خبر فسخ خطوبتنا.. مدرسة الرياضة رجعت تانى.. طارق: وبدأت تضربك..؟ عايدة: مش لوحدها.. بدأت أنضرب فى كل المواد.. ومن كل المدرسين.. كان فيه مدرسين بيتنقلوا مدرستنا مخصوص عشان يضربونى.. كل الأجزاء اللى اتحذفت من مقرر الرياضة رجعت تانى.. وفوقيها رياضة بحتة على رياضة ذرية.. على مش عارفة إيه كمان.. طارق: مش ممكن.. مش معقول.. عايدة: فعلاً.. مش ممكن ومش معقول.. بس حصل.. «يدخل جورج ممثلاً دور الجرسون.. يبدأ فى وضع أطباق وهمية على المائدة ثم يخرج.. يبدآن فى تناول الطعام» عايدة: مدرسة الجغرافيا ست بنت حلال قوى.. هى كمان انضمت للصف وقعدت تضربنى.. تضربنى بالنهار وتجيلى البيت بالليل لابسة ملاية ومغطية وشها. طارق: ليه؟ عايدة: عشان تعيط وتقول لى سامحينى يا بنتى.. متهيأ لها لو ماضربتنيش.. حايعتبروها من عناصر الثورة المضادة.. طارق: فظيع.. عايدة: بدأت تحصل لنا مضايقات غريبة.. المية ماتطلعلناش.. فى الدور الثانى.. وتطلع لكل الأدوار اللى فوقينا.. فاتورة التليفونات جت لنا وفيها مكالمات زيادة بثلاثة آلاف دينار.. حتى الكمبيوتر اللى بيحسب المكالمات ركب موجة النفاق.. أبويا راح يجدد رخصة السيارة.. دفع ألف دينار مخالفات زيادة.. كل ما يركن السيارة فى مكان ييجى الونش يشيلها.. يسيب اللى قدامها واللى وراها وياخدها هى.. طارق: إنتى بتجسمى الأمور قوى يا عايدة.. مش جايز تكون دى كلها صدف سيئة.. عايدة: احتمال.. على العموم أنا باحكى لك اللى حصل.. طارق: وبعدين.. عايدة: ما استحملتش.. سبت المدرسة.. قعدت فى البيت.. تانى يوم طلع قانون يمنع البنات من ترك الدراسة.. وجه وزير المعارف بنفسه رجعنى المدرسة.. بالمدرعات.. طارق: بالمدرعات؟ عايدة: مش عارفة إذا كانت مدرعات ولا سيارات مصفحة.. أنا كنت عند خالتى.. راح محاصر المنطقة وفتشها بيت بيت.. لحد ما لاقانى.. صدفة سيئة دى كمان؟ «طارق لا يستطيع الإجابة» عايدة: بعت لك جوابات كتير.. واسترحامات وشكاوى.. طارق: ماو... عايدة: «مقاطعة».. ماوصلتكش.. وأنا باكتبها.. عارفة إنها مش حاتوصلك.. ودلوقت أنا مش باطلب منك إنك تصدقنى.. أو ماتصدقنيش.. أنا باطلب منك إنك تحمينى.. مش بصفتى كنت خطبيتك.. فى يوم من الأيام.. لأ.. بصفتى مواطنة فى نظام أنت مسؤول عنه.. ومن حقى أعيش حياتى فى هدوء دون مضايقات على الأقل، لإنى مش من عناصر الثورة المضادة.. ومش مشتغلة بالسياسة أصلاً.. طارق: عايدة.. أنا آسف لكل اللى حصل.. وأؤكد لك إنه مش حايحصل تانى.. عايدة: حاتصدر بيان رسمى؟ طارق: لأ.. بيان شرعى.. حاعمل الحاجة اللى كان يجب أعملها من سنة. يالله بينا.. عايدة: على فين؟ طارق: على السفارة بتاعتنا هنا فى جنيف.. حانكتب كتابنا.. من صلاحيات السفير إنه يكتب كتابنا.. (يدخل جورج) جورج: من حسن حظكم يافندم إن المأذون بتاع بلدكم موجود فى جنيف.. بيتعالج.. وعندى فكرة إنه معزوم على العشا فى السفارة (ينظر فى ساعته». يعنى ممكن تلحقوه.. (يغمز له بعينه ويرفع أصبعه علامة التأييد.. يخرجان فى سعادة) المشهد الثالث (الفصل فى الأكاديمية.. كاباكا يدخل بخطوات بطيئة.. يتعثر فى سيره.. يستند إلى الجدران.. يبدو عليه أنه فى حالة ضياع شديد وكأنه فقد أعز ما يملك فى لحظة.. أو كأنه تعرض لصدمة عصبية مروعة) (بعد لحظات يدخل جورج مسرعا) جورج: كاباكا.. تأكد أن كل مشكلة فى الدنيا لها حل.. ولا يهمك.. ماتضايقش نفسك.. هى صحيح مصيبة.. ومصيبة كبيرة قوى.. أول مرة تحصل فى التاريخ.. بس ممكن نتصرف.. (كاباكا يبتسم فى فرحة ثم يتحول وجهه إلى مسرح لانفعالات شتى.. يكتئب ثم يبتسم، يكلم أشخاصا دون أن يصدر عنه صوت.. ضائع تماما.. يدخل البروفيسير) البروفيسير: جورج.. الامتحان بعد عشر دقايق.. الأممالمتحدة بعتت الأسئلة..؟ جورج: أيوه.. بس فيه مشكلة خطيرة جداً.. البروفيسير: خير؟ (يشير لكاباكا) البروفيسير: ماله؟ جورج: حصل له شىء مؤلم.. البروفيسير: إيه؟ جورج: حب يعمل حركة إعلامية دولية قبل الامتحان.. حب يثبت إنه استفاد من الدراسة وأنه بقى ديمقراطى.. البروفيسير: من حقه.. وبعدين؟ جورج: سمح للمواطنين بالخروج من البلد.. بدون تأشيرة خروج.. البروفيسير: برافو.. كويس قوى.. وبعدين؟ جورج: شعبه كله خرج.. القرار طلع تمانية بالليل.. وسبعة الصبح ماكنش فيه مخلوق فى البلد.. (كاباكا ينظر له فى ابتسامة سعيدة وبلهاء) البروفيسير: بعد الامتحان مباشرة فيه حفلة التخرج.. الخبر ده لو وصل للناس.. الفرح بتاع حفلة التخرج حايتحول لمأتم.. ويبقى أسوأ دعاية ضد الأكاديمية.. طارق: وهو ده خبر يستخبى؟.. كل الجرايد والمجلات النهاردة بتتكلم عن الحكاية دى.. المقال الرئيسى فى التايمز تحت عنوان «خرج ولم يعد».. فى الجارديان المقال الرئيسى تحت عنوان «الرجل الذى فقد شعبه».. البروفيسير: مش قصدى الخبر ده.. قصدى خبر انهياره. لازم العالم كله يعرف إنه مش نادم على القرار ده.. وإنه سعيد بيه.. وإنه واثق إن شعبه حايرجع له تانى.. وإن الديمقراطية عنده أهم من الحكم.. وأهم من وجود شعبه..
