ايوه احنا شعب. يعشق الفرعون .ويتمنى التراب .اللى بيمشى عليه .اى فرعون .واذا جالنا واحد مش كده .بنقول عليه: ده ..لا مؤاخذة على اد حاله. يعنى بالبلدى كده : خيخة! والعادة دى قديمة قوى معانا .ومش من عقد ولا عقدين .دى مرض والعياذ بالله. مستوطن فى جتت المصريين .من سبعتلاف سنة وانت طالع .وزمان قوى ايام الفراعنة .نسينا كل شئ .عمله الفرعون .من استعباد. وشرا عبيد من هنا وهناك .وعمل بالسخرة و و و و..افتكرنا بس تارخه .وحروبه وجوزاته وطلاقاته .اللى خلدنهالوا برده ..على المعابد .وفى المتاحف. ومش بس كده .وكمان احتفظنا بجتت الفراعنة .ال ايه: مومويات .مع ان اكرام الميت ..دفنه !واستمر حالنا زى ماهو لغاية.. ماجالنا مماليك وانكشارية .ومرتزقة.. من بلاد الواق واق .وبلاد تركب الافيال .ومعاهم كلهم. نسينا الاسية .والغلط اللى ركب كل دول ..من ساسهم لراسهم .فى ابسط حقوقنا .وما افتكرناش برده .الا اعمالهم الخالدة .هنا وهناك؟ وجه الكبير قوى الاصلى :محمد على باشا .وباع واشترى فينا .بالغالى مرة. وبالرخيص مرات ومرات .وبرده نسينا له القتل والدبح .والرمى من فوق القلعة.. وافتكرنا بس ..انه مؤسس مصر الحديثة؟ وجه ناس وناس :اتراك وشركسة .وقالك دول زى الفل .وولاد ناس .وملوك وملكات على حق ربنا .وبعدين طردناهم شر طرده .وال ايه دول الفساد بعنيه .ونهبوا ثروات البلد؟! وجه الاحرا رالضباط .من طين مصر. وقالوا لك :احنا المصريين بحق .واحنا اللى ردينا لمصر هيبتها .وفرح الناس .وهللوا وقالك: مصر رجعت تانى لينا. وافتكروا برده من الفرعن .انه كان راجل حر.. ابن حر. وانه حررنا من الاستعمار. والتبعية واسس للطبقة الوسطى .والتصنيع و و و و.. نسينا برده انه دخل الناس السجون .وفين يوجعك وانه ورطنا فى وكسة اليمن. ونكسة ال 67 .وانه مات ..واحنا مهزومين . وجه الراجل المؤمن وبامانة حرر الارض .وكالعادة افتكرنا له ده .وانه كان قائد للحرب والسلام .ونسينا زى عادتنا انه اول من ادخل اللصوص .من الباب الملكى ..اللى كان اسمه: الانفتاح .وانه كان دايما يقولك :اللى ما اغتناش فى عهدى .عمره ما حيغتنى .واتضح اننا زدنا فقرا. وزادوا هما غنى ؟ وان عنق الزجاجة .اللى كان دايما .بيقولك عليه اننا .. حنخرج منه .مش موجود اصلا؟! ونسينا برده ان الفرعون ده. كان السبب .فى نفش اخوان البعدا لريشهم .بعد عقود فى السجون .وجه عمنا مبارك وبالامانة الراجل .فى اوائل عهده. كان بما يرضى الله.. بس تعمل ايه فى المدام .والولاد. والشلة البايظة. واتباع وبطانة الفرعون ؟! اما اخونا مرسى . فده عجينة غريبة عجيبة. من فرعنة الجماعة .ولنا حكم مصر.. ولكم الخضوع .والحمد لله .. انه ما اتفرعنش كتير .وما لحقش ودلوقتى فى فرعون جديد .والحق انه قد يكون مية مية .بس ولا مؤاخذة البطانة بتاعته ..مش ولابد. وحتسيئ للراجل .وحتضره . بس الغريب : ان مصريين كتير. عجباهم القصة ..وبداوا يطلقوا على الراجل .القاب مش بتاعته .زى :الملهم والقائد والزعيم.. و و .من اولها كده اول القصيدة كفر. ارحمونا .وارحموا الراجل. اذا كان ناوى .يشتغل بجد .وبحق وحقيق ؟وبلاش وحياة ابوكم. الجملة اللى بقت زى اللبانة. فى بقكم ..حريم. قبل رجالة : كلنا بنحب السيسى ..بس السيسى .بيحب مين ؟