استغربت جدا من حرص المسؤولين في حديقة الحيوانات بالجيزة على منع المصورين والصحفيين من متابعة ونقل الحريق الهائل الذي شب هناك ، وسألت نفسي : ايه المشكلة .. حريق زي اى حريق بيحصل .. بجملة الحرايق اللي مالية البلد والكوارث اللي قاعدة تنزل على دماغنا من ساعة الإخوان ما حكموا مصر .. يا سلام .. وهو يعني حريق الحديقة حيكون أسخم من حادثة قطر البدرشين ولا العمارة اللي وقعت على دماغ سكانها في المعمورة ؟ ولان المسألة دي مش داخلة دماغي وبما اني صحفي عجوز و" دؤرم " ، حبيت اعرف ايه الحكاية بالضبط وليه محاولة التكتيم الشديد ده على حادثة ، كل الخساير فيها خساير مادية .. يعني مفيش لا مؤاخذة حمار مات ، ولا أسد انجرح ، ولا قرد جاله كساح ، ولا فيل " خس النص " من الخضة.
وعرفت الحقيقة بعد مارحت الحديقة تاني يوم الحريق .. دخلت عادي زي اى واحد بيقطع تذكرة ويدخل.. واقتربت من جبلاية القرود .. بما ان القرود أقرب الحيوانات للإنسان .. مش بيقولوا الانسان اصله قرد ؟ .. يعني بيحبوا اللت والعجن والرغي .. وعايزين جنازة ويشبعوا فيها لطم .. وناديت على قرد منهم واسمه " ميمون " .. فجاء مسرعا وقد أغريته بكام صباع موز وكيس سوداني مقشر ودار بيني وبينه هذا الحوار الطويل .
سألته : هو ايه الحكاية بالضبط ؟ فرد مستفسرا : حكاية ايه؟ فقلت له : جرى ايه يا عم القرد .. حنلف وندور على بعض .. قصدي الحريقة اللي حصلت .. هى زي ما بيقولوا بسبب عقب سيجارة .. ولا بفعل فاعل؟
.. التفت القرد ميمون حوله بعد ان اخذ مني الموز والسوداني وقال : انا حاحكي لك الحدوتة كلها .. بس متجبش سيرتي لحد .. كأنك مشفتنيش فقلت له : ماشي .. كلام رجالة .. والله ماحجيب سيرتك ابدا فاقترب من أذني وهمس : الملك هو اللي عملها سألته : ملك مين ؟
رد : ايه الذكاوة دي ياعمنا .. هو فيه كام ملك في الحديقة.. غير الأسد طبعا.
قلت : أيوه أيوه .. تقصد ملك الغابة .. طيب وايه اللي خلاه يعمل كده .. ولصالح مين يولّع في الحديقة؟ رد : احنا كلنا خلاص فاض بينا .. البرد قتلنا ومفيش اى وسيلة ندفى بيها .. وكمان بقينا لا مؤاخذة زيكم .. مش لاقين ناكل. قلت مبتسما : لأ .. انت بتهرج! فقال : والله العظيم بتكلم جد .. القرد الواحد مننا بياكل في اليوم خمسة كيلوا موز وكيلو سوداني على الأقل. قلت : يا نهارك اسود .. ده انت تجيلك تخمة وتموت رد بغيظ : موتة تاخدك وتاخد اللي جابوك .. الملافظ سعد يا بني ادم قلت : اسف معلش .. بس خمسة كيلوا موز وكيلوا سوداني كتير اوي رد : وانا يعني بدفع حاجة من جيبي .. إدارة الحديقة هى المسئولة عن اكلنا وشربنا قلت : ماشي .. ايه بقى اللي حصل؟
قال : بقالنا يجي 7 شهور .. كل قرد في اليوم ياخد موزتين مفيش غيرهم و10 حبات سواداني بالعدد سألته : واشمعني من 7 شهور بالتحديد؟
قال : بيقولوا فيه رئيس جديد للبلد جه .. والأمور بقت مطينة بطين قلت : بس انتوا مالكم برئيس جديد ولا قديم .. فارقة معاكم في ايه ؟ قال : ليه هو احنا مالناش حقوق .. انت مسؤول تأكلني وتعالجني وتحافظ عليا لحد ما ربنا يفتكرني ؟ قلت : المهم مين اللي قالك ان فيه رئيس جديد .. وكانت ايه المناسبة ؟ رد : مدير الحديقة .. رحت لحد مكتبه وقلت له ايه الحركات النص كم دي .. الموزتين دول لا مؤاخذة " ... " .. مش تبعتهم ليا عشان اكلهم! قلت ضاحكا : طيب ما انت قليل الأدب صحيح .. ده كلام برضه تقوله للمدير بتاعك؟ قال : أمال اقوله ايه يعني .. اخده في حضني وابوسه.
سألته : طيب المدير رد عليك وقالك ايه؟ رد : قاللي اقتصاد البلد واقع بعد محمد مرسي مابقى رئيس .. والأسعار بقت نار بعد الجنيه مامسحوا بكرامته الأرض والدولار الواحد بقى يشتري منه عشرة .. بيني وبينك انا مفهمتش حاجة منه .. مال أمي انا ودين ام الجنيه .. نزل ولا طلع .. اشفهمني انا في الكلام ده .. ياعم انا عايز اكل واعيش .. المهم قلت للمدير دي مشكلتكم انتم مش مشكلتنا .. لو مش قادرين تأكلونا .. كنتوا بتخلفونا ليه .. قصدي بتشترونا ليه ، وفاتحين الجنينة للناس رايحة جاية تتفرج علينا .. وهنا رد المدير - والكلام لسه للقرد - وقاله هو فين الناس دي .. هو حد معاه قرش عشان يجي ويدفع تذكرة .. ما احنا كنا بنعتمد على دخل الجنينة من زوارها ، خصوصا في الاجازات والأعياد عشان نصرف عليكم ونأكلكم .. دلوقتي الناس مفلسة " مش لاقية اللضى " .. اعمل ايه يعني .. اصرف عليكم من جيبي .. وانا لاقي أأكل عيالي لمّا حأكلكم انتوا .. انشالله ماطفحتوا .. هو انا كنت خلفتكم ونسيتكم. يُكمل القرد : خرجت من عند المدير بيني وبينك دمي " فاير " من الغيظ .. الراجل هزأني وضربني على قفايا .. فرحت جري على الملك بتاعنا ، الاسد طبعا احكي له اللي حصل .. لقيته هفتان وبقاله يومين تقريبا ما اكلش وروحه هو كمان في مناخيره مش طايق دبان وشه .. وعرفت منه ان راح قبلي للمدير هو كمان عشان حكاية الأكل اللي نقص بدرجة مخيفة .. انت عارف الاسد بياكل كم كيلوا لحمة في اليوم .. يجي عشرة كيلوا .. تصدق من 7 شهور بقت وجبته نص كيلوا في اليوم.. قال ايه عشان اللحمة بقت غالية نار ومفيش في ميزانية الحديقة فلوس من يجي 7 شهور. قلت له : انت كل ما تتكلم تكرر من 7 شهور من 7 شهور .. انتوا كمان حترموا الحمل على الرئيس الجديد .. قال يعني مكنتوش عارفين تودوا الأكل فين من كتره قبل كده! قال : انت بتقول فيها .. اقسم لك بالله .. كانت الأمور ماشية عادي.. بناكل وبنشرب .. ثم وهو يضحك .. و" بنهرش كمان"! قلت : حلوة " بنهرش " دي .. على كده عندك كام عيل .. قصدي كام قرد؟ قال : خمسة في عين العدو .. تخيل بقى لمّا تشوف ابنك حيموت على " موزاية " واحدة ومش لاقيها تفتكر تعمل ايه؟ قلت : طيب خلينا في الأسد .. لمّا رحت لحد عنده قلت له ايه؟
قال : حكيت له على كلام المدير السخيف .. وعرفت انه سمع نفس الكلام السخيف ده منه .. وعمل اجتماع مع الاسود اللي زيه والنمور ، وقرروا يعلنوا احتجاجهم بطريقة عملية ويوصلوا صوتهم لأعلى راس في البلد .. وكانت الحكاية دي هى الحريقة اللي انت شفتها وسمعت عنها .. وعلى فكرة ده بس كارت ارهاب وممكن نصعد الأمور بعد كده اذا استمر الحال على ماهو عليه. سألته : حتصعدوها ازاى يعني .. حتولعوا في المدير مثلا ؟ فرد : لأ .. حاجة اكبر من كده بكتير .. الاسد قال ان سمع عن الثورة بتاعتكم اللي فات عليها سنتين وكأنها محصلتش .. " اذا كنا احنا اتأثرنا بيها .. الله يكون في عونكم انتم ".. عشان كده عمل اجتماع موسع لمناقشة إمكانية المشاركة معاكم يوم الجمعة لتوصيل صوتنا احنا كمان للحاكم بتاعكم .. وقررنا اننا ننزل ميدان التحرير ونرفع شعار : لمّا الحيوانات خرجت من هدومها .. اما البني ادمين يعملوا ايه؟! سالته : كلكم حتنزلوا ؟ رد : لأ طبعا مش كلنا .. انت عارف الزرافة مثلا رقيقة وحنينة وملهاش في اللبش ده .. والفيل ابو زلومة حركته تقيلة .. فاللي حينزلوا معاكم الاسود والنمور وفصيلة القرود. سألته : طيب الاسود والنمور عادي .. بالعكس عايزينهم .. انما ايه لزمة القرود؟ رد : ده احنا لينا لزمة ونص مكان .. احنا قررنا نتنطط على الشجر اللي في الميدان عشان نبقى كاشفينه من جميع مادخله .. وكمان حنطلع اسطح البيوت .. وعايز اشوف كلب واحد من اللي بيقولوا عليهم قناصة .. عليا الطلاق لو شفته حا " ... "! سألته : والحمير فين امال؟
رد : الحمير دول مخهم جزمة .. معجبهاش كلام الاسود والنمور .. اتاريهم ولاد اللئيمة بيجيلهم أكل مخصوص .. زيت وسكر وبرسيم بالهبل .. وقام حمار منهم وقال للأسد .. انتوا نازلين تعترضوا على إيه .. ما الاشية معدن وميت فل وعشرة .. قام الاسد زغر له بعينه وقاله خليك في نفسك .. احنا اساسا مش عايزين حمير معانا .. ياحمار يا ابن الحمار. سألته : والحمار عمل ايه ؟ رد : جاب واطي على طول سألته : طيب وهما ناويين يعملوا ايه يوم الجمعة؟ قال : هما مين ؟ قلت : الحمير طبعا فرد : حيحتفلوا باليوم ده مع نفسهم سألته : في الحديقة برضه؟ فرد : دي والله معرفهاش .. بس اكيد الأوامر لسه مجتلهمش من فوق!!
