ألقي الشاعر كرم فصاد هذه القصيدة ضمن باقة من أشهر قصائده الوطنية والغنائية في امسيته الشعرية مع الشاعر الكبير عبدالستار سليم، أحد كبار رواد فن الواو في مصر، بجامعة عين شمس، ضمن فعاليات مؤتمر "الشباب والتنمية البشرية". "مكتوب على باب الحياة" لو قالوا بَعدك راح أعيش زى أمَّا كَُّنا ف قُربِنا أنا مش حاعيش لو حتى حلفوا بربِّنا ما تصدقيش بَعدك خلاص القلب مقطوع الخلاص والشوك خنق كل الزهور على دربِنا وكمان طرح عناقيد ألم من دمعِنا راح الربيع وأخد فى إيدُه كل غنوه تضُِّمنا بَعدك خلاص مابقاش خلاص غير الخريف طول السنة حتى الخريف.. مخنوق بصوت السوسنة وإنتِ ..... وانا متغربين والفرقة آه بتهزِّنا متبعترين مابين هناك وما بين هِنا وكأننِّا ع الجرح كُنا مفطومين طول عُمرِنا والحُزن ده ماعرفش غيرنا وزَيِّنا يادى الجراح يادى الجراح اللى ما عرفت غير طريقنا وحُضننا يا أم العيون فيها ألف حاجة ومحتاجاتْ عدَّى اللُقا وأخد معاه كل الأمان والذكرياتْ ولا سابش حتى عُمر جاى ولا عُمر فاتْ وخَِدك هناك وف حُضن تانى وساب هِنا قلبى اللى معصوب بالبُكا دمعُه اشتكى ف كل الحالاتْ حاضن حنينُه وغُربِتُه قافل بيبان القلب ع الحُب اللى ماتْ وف طيف وشوش كل البناتْ شيِّع حنين كل الهوى ف صوت السُكات ولفين حا صاحبك يا ألم ولإمتى هافضل.. أبكى ع العُمر اللى فاتْ ولإمتى يكتبنى القلم .. بُركان آهااااات . يا أم الحنين لو تعرفي قلبي الحزين بيغنِّى قصة فُرقُِته ف غنوة نجاة : ( ما أحلى الرجوع إليه ) طول السنين لسه بيفرد حُضنُه ليكِ ويَّا كل الذكريات أما اللى أصعب م الأنين يا عُمري بكرة يكون بدونِك فرصة هايلة للشتات إحنا السبب أيوه السبب وحِلمنا حلم كبير قوى مش قدِّنا حلم انكتب على كل نقطة ف دمِّنا حلم اللُقا رغم البعاد ونطوف بلاد وتلمِّنا ونعيش سوا من غير ميعاد والفرحة تسبق ضِلنا وإيدينا تفضل مشبوكين والدنيا تصبح ملكِنا ويَّا الصحاب ولا ميت كتاب يقدر يفسَّر حِلمنا ولكل بخت وله صحاب بس اللى كان من بختِنا قِدر الزمان من غير حنان وقام بسيفه وشقِّنا ولكل عاشق له نصيب وكان نصيبنا ف جَرحِنا وتصدَّقى من غير بُكا وبألف آه إحنا اتظلمنا ف حُبِّنا شيَّعنا قصة عُمرِنا من غير حداد من غير عديد بس الأكيد كل اللى كان مكتوب لِنا مكتوب على باب الحياة : الحلم أكبر مننِّا. شعر: كرم فصاد الكاتب الصحفي والشاعر كرم فصاد أثناء أمسيته الشعرية بجامعة عين شمس الكاتب الصحفي والشاعر كرم فصاد والشاعر الكبير عبدالستار سليم الكاتب الصحفي والشاعر كرم فصاد والشاعر الكبير عبدالستار سليم الكاتب الصحفي والشاعر كرم فصاد والشاعر الكبير عبدالستار سليم الكاتب الصحفي والشاعر كرم فصاد والشاعر الكبير عبدالستار سليم
الكاتب الصحفي والشاعر كرم فصاد والشاعر الكبير عبدالستار سليم
