( المواطن الغلبان حسن حصاوى يُغشى عليه من حين لآخر، وعندما يفيق لا يفهم ما حدث حوله من تغيرات ولكن أحيانًا يجعل من يسمعه هو الذي يغشى عليه). (الشاب السلفي يجد حصاوي جالسا مهموما يكاد يكلم نفسه) السلفي مالك يا حصاوي ؟ شكلك مش مظبوط. حصاوي قلقان وخايف. السلفي من إيه؟. حصاوي من بكره. السلفي غريبة. أنا شايفك مبسوط دايما ومتفائل باللي جاي. إيه اللي جرى؟ حصاوي اللي جرى لسه بيحصل وهيحصل ويزيد ويكتر وإحنا ولا هنا. السلفي أستغفر الله العظيم .اللي هيجري بكره في علم الغيب. حصاوي ونعم بالله. لكن دا مش معناه أننا نقعد مستنين الغيب لحد ما ييجي على غفلة، وبعدين نلطم عل خدودنا ونقول يا ريت اللي جرى ما كان، أنا قصدي نعمل حساب بكره من دلوقت. السلفي طب مش تفطمني. حصاوي إحنا عددنا بيزيد كل طلعة شمس بالآلاف من المواليد. السلفي الله أكبر. أنت عايزنا نحسد نفسنا؟.ثم دي حاجة بتاعة ربنا. حصاوي يا ريت لما نحسد نفسنا نضمن أن عددنا ما يزدش كتير، وعلى الأٌقل دلوقت. السلفي أخص عليك يا راجل. دا على رأي المثل بيقول الكترة تغلب الشجاعة. حصاوي أبدا الواقع بيقول أن العلم هو اللي يكسب الشجاعة، وإحنا تعدادنا بيزيد بفظاعة. ودا معناه أننا نبني كل يوم مدارس ومستشفيات ونخلق وظايف للناس عشان يشتغلوا ويعرفوا يأكلوا العيال اللي بتزيد كل يوم. يا أما نسيبهم يشحتوا في الشوارع أو يطلعوا لصوص وبلطجية ونصابين ومرتشين. السلفي العيل بييجي برزقه. حصاوي ولما يبقوا ست وسبع عيال رزقهم هيتوزع عليهم أزاي؟ السفلي كل واحد بياخد نصيبه. ما حدش بياخد نصيب غيره. حصاوي أفهم.اللي بيجيوا عيال كتير هما الفقرا والغلابة.وبكده الفقرا دول هم اللي بيزيدوا. السلفي إياك تكون عايز تحدد النسل. حصاوي بلاد كتير حددت النسل زى الهند والصين مثلا وهما دلوقت حالهم أحسن من حالنا.والصين بالذات حددت لكل أسرة يخلفوا عيل واحد بس. السلفي حرام عليك. دي العيال عزوة. حصاوي لما العيال يبقوا جهلاء تبقي مش عزوة, تبقي خيبة قوية.منين الدولة توفر لهم كل وسائل الحياة المعقولة البسيطة حتى؟.دا إحنا علينا ديون متلتلة. السلفي مش من حق أي حد يحدد النسل. دا حرام. حصاوي الحرام أنك تجيب عيال وما تقدرش توكلهم أو تعالجهم أو تعلمهم أو تجوزهم وتخلق لهم وظائف وأعمال. الحرام أنهم يهجوا علي بره عشان يلاقوا شغل وكتير منهم بيحاول يسافر تفليته ويتقبض عليهم أو يموتوا في المراكب وهما رايحين.أو يشتغلوا عبيد أو جواسيس على بلادهم أو يشتغلوا إرهابيين. السلفي ما تحاولش تقنعني.تحديد النسل حرام. حصاوي بلاش تحديد النسل. لكن ع الأقل ممكن الحكومة تدي ميزات للأسرة اللي ما تخلفش كتير عشان تقدر تعلمهم وتربيهم وما ينحرفوش. ولا نحط في الفصل الواحد ميتين وتلتميت تلميذ؟. السلفي تحديد النسل حرام قطعا. ودا آخر كلام عندي. حصاوى وهو اللي متخرج من الثانوية بخمسين في المية من حقه يخش الطب أو الهندسة أو أي كلية من كليات القمة؟. السلفي لا طبعا. حصاوي مش العلم بتاعه يديه ميزة عن الباقين؟. السلفي جايز. حصاوي وكذلك اللي يخلف أقل ياخد ميزة عن الباقين. السلفي لأ لأنه ممكن يتجه إلي علوم الدين، وإحنا عندنا بندرس لهم الدين بمنتهى الإخلاص عشان يطلعوا مؤمنين صالحين، وينشروا الإسلام في كل ربوع الدنيا. حصاوي أه قول كده بقى؟. ومين بقى اللي أداكم الرخصة دي؟. السلفي إحنا السلفيين. حصاوي ودي جامعة؟. السلفي دي الجامعة الأهم من أي جامعة أخرى.تحب تدخلها؟. حصاوي في الحقيقة أنا بفاضل بينهم وبين الإخوان. لكن دلوقت غيرت رأيي وبفكر التحق بجامعة داغش!. (السلفي يغشى عليه) هرش مخ 1 رحمة السجن مصرع قياديين في حماس متهمين في قضيتي تهريب مرسي من السجن ومذبحة رفح. مش كانوا يسلموا نفسهم لمصر ويعيشوا لهم سنتين تلاتة في السجن.! 2 إعادة الانتخابات الاتحاد الأوربي يعلق مساعداته المالية لمصر حتى انتخاب البرلمان .طب أفرض ما عجبهمش اللي يفوزوا في الانتخابات, نعيدها تاني ؟! 3 طاقية الإخفاء في وزارة الكهرباء عدة موظفين وراء انقطاع التيار. لكن المشكلة أنهم كانوا طيلة عام كامل يلبسون طاقية الإخفاء!. 4 محكمة المفتي إذا حكمت المحكمة على مبارك وأعوانه، هل نرى مفتي الجمهورية يرد المحكمة؟! 5 سبب التفجير من الطبيعي أن يفجر الإخوان أبراج الكهرباء لأنهم تعودوا أن يعيشوا في ظلام!.. 6 حماس على طول أعلنت حماس أنها انتصرت في الحرب الأخيرة، يبقى منطقي أنها تجدد الانتصارات على إسرائيل حتى تفنيها!. 7 أول بند بحسب كلام مشعل الإخواني أول بنود التصالح مع إسرائيل يكمن في فتح معبر رفح المصري!.
