أم طالع حبابي عينيها الأم دايما طالع حبابي عينيها.. أيها الرجال، فيه وصف أحسن من ده ليومنا احنا الستات الغلابة المساكين.... بذمتكم فيه واحد عمره فكر أن مراته من صباحية ربنا وهي بتورررررررر زي النحلة.....بذمتكم بذمتكم عمركم ما حسيتم إن الستات دول سبع صنايع، سبعة ايه قولوا سبعميت صنعة.... سواقة.... تلاقوها منبه إلكتروني....تلاقوها دكتورة نفسية... تلاقوها طباخة....تلاقوها مدرس خصوصي.....تلاقوها حنجرة اوبرالية....تلاقوها فاشين ديزاينره....تلاقوها ميتر دو أوتيل....تلاقوها هاوس كبينج....تلاقوها فرد أمن....تلاقوها دكتورة....تلاقوها و خلونا نعمل تجربة معملية فذة تثبت كلامي: حطوا اسم أي ست تعرفوها ( أم....زوجة...ابنة....اخت... زميلة عمل...قريبة) جانب أي شيء يعمل في الدنيا حتلاقوا أي من الستات دول ممكن يسدوا في أي مهنة..... فلو سمحتم ساعدوني أيها الرجال في الحملة الجديدة: سبع صنايع والبخت مش ضايع....مش ضايع...خدتوا بالكم من مش ديه.... أهي المش ديه هي مفتاح الحملة... أيها الرجال الأعزاء خلوا الوضع كما هو عليه....خلوا الصنايع كلها علينا وانتم عليكم بس تعدلوا لنا بختنا.....حد يسألني ازاي يعني الراجل ممكن يعدل بخت الست.... كلمة حلوة ممكن تعدل البخت... وردتين مممكن يعدلوا البخت... هدية بسيطة ممكن تعدل البخت... طبطبة حنينة ممكن تعدل البخت.... كوباية نسكافيه الصبح جنب السرير ممكن تعدل البخت.... مرة في الأسبوع شيل مسئولية توصيل العيال لتمارينهم ممكن تعدل البخت.... غدوة برة منغير مناسبة مممكن تعدل البخت... انك تشكر فيها قدام الناس حركة جميلة مممكن تعدل البخت.... أكيد كل واحد فيكم أيها الرجالة عنده مفتاح بخت الستات في حياته لذا استخدموها....و صدقوني لو قلت لكم أن بمجرد ما بخت الست بيتعدل بتظبط كل اللي نحوها....