فتاة اسكندرانية وما أدراك و خفة ظل بنات بحري، أصابتها لعنة الموهبة فى جسدها البديع، صاحبتها أعراض الابداع تاركة العديد من الآثار الأسرية ، فقررت الهروب بحثا عن متنفس لهذا الفن المكبوت، لتبدأ رحلتها فى محراب الفن كراقصة .. ثم مونولوجست تدندن «أنا زينات المصرية.. أرتيست ولكن فنية.. أغنى وأتسلطن يا عينيه.. تعالى شوف المصرية» وأخيرا فنانة تنتزع عرش الكوميديا من احنك الرجال ! مضت «صاحبة العصمة» فى «شارع الحب» وعملت «تمر حنة» بحثا عن «ابن حميدو» فلم تجد سوى «حلاق السيدات» ولآن «الستات مبيعرفوش يكدبوا» عملت «الآنسة حنفى» وبعد مجهود شاق ختمت مشوارها ب «بنت اسمها محمود».... aونتيجة عشقى الدفين بها وولعى بفنها قررت السفر على جناح الخيال ومحاورتها لمعرفة المزيد عن تفاصيل حياتها ، لكنى اخترت ظاهرة « العنوسة « التى تفشت فى الآونة الأخيرة كقضية تؤرق المرأة المصرية فى هذه العصور الثورية لنتناقش بشأنها على اعتبارها العانس الأشهر فى تاريخ السينما المصرية .. وفتحت تابوه الذكريات ، فى حالة دردشة مع الست زينات ، لأقدم لسيادتك عزيزى القاريء بعض الضحكات من زمن فات واتيح لجنابك عزيزتى القارئة الاستماع لنصيحة اشهر العانسات .. داعية االله ان يلهمنى الثبات والتحلى بالرزانة والسكات حتى لا ينقلب هذا الحوار الافتراضى الى مداعبات وضحكات منثورة هنا وهناك ... اتفضلوا معانا ... مساء الخير يا ست الستات؟ سالخير عليكى يا حبيبتى وعلى كل حبايبك بيقولوا عليكِ أشهر العانسات.. رغم ان معلوماتى تؤكد على ان حضرتك تزوجتى ثلاث مرات. فما رأيك فى هذا الكلام؟ ضحكت بصوت منتعش ثم قالت: عانس يعنى ايه!! راجل ولا ست اصل العنوسة اليومين دول بقت على الجنسين، وبعدين الواحدة مننا ممكن تتجوز عشر مرات وتظل عذراء . يعنى فعلا حضرتك تزوجتى 3 مرات؟ جواز الندامة يا حبيبتى، اتجوزت اول مرة وانا عندى 15 سنة واتطلقت بعد سنة واحدة وطلعت من المولد بلا راااااجل ألم تنزعجى ممن أطلق عليكِ لقب أشهر العوانس؟ ابتسمت قليلا ثم مصمصت على شفتيها قائلة: كتاكيتو بنى.. وانزعج ليه.. ما هم قالوا عليا برضه بنت بلد وجدعة وورقة الكوميديا الرابحة... وبعدين هم معذورين طالما المخرجين دايما بيطلعونى عانس طروب لماذا كنتِ دائما تقبلين تلك الادوار؟ = فرنت ضحكاتها وهى تقول: كل اللى يجيبه ربنا كويس، احنا كنا عاوزين نشتغل يا بنتى هو احنا كنا هنفاصل يعنى! وبعدين ومالها العانس هو انا كنت وحشة ولا كنت وحشة! فقاطعتها بسرعة: لأ طبعا حضرتك جميلة الجميلات؟ ابتسمت قائلة: ربنا يجبر بخاطرك، ما هو مادام انا مش وحشة يعنى يبقى الكلام ده مش كويس فى حق الرجالة بقى هما يعنى اتعموا فى نظرهم . هل فعلا كنتِ مغرمة بالفن وقدمتى له الكثير لدرجة أنكِ صممتى بنفسك الوسادة الخالية فى فيلم « شارع الحب «عشقا فى حسب الله السادس عشر»، بالاضافة الى قبعتك الشهيرة المرصعة بكل مل تيسر من الورود والاكسسوارات فى فيلم « فايق ورايق « مع شادية ومنير مراد؟ آه طبعا كنا بنشتغل بحب وتلاقى الواحدة مننا عاوزة تجيب كل ما عندها من غير طمع أصل على أيامنا ماكنش فى «تسعيرة» زى اليومين دول وكمان كنت عاوزة اطلع احلى عانس فى مصر انما دلوقت تلاقى المخرج مطلع العانس «خنشورة» وكركوبة وده غلط لان فى بنات كتير زى القمر وما ركبوش قطر الجواز مش هو اللى فاتهم يعنى لو كانوا قابلوا راجل ملو هدومه زى حسب الله حسبوللى كانوا عملوا المستحيل عشان يتجوزوا وكل واحدة منهم تصحى الصبح تلاقى جنبها راجل قيمة وسيما وتقول له «نوم العوافى يا عريس متعافى يا أسطى فى المزيكا وخلافه «انما مفيش عرسان من أصله ، هيتجوزا تأدية واجب يعنى؟ لا طبعا.. الا الزواج لازم يكون بالاتفاق يا أستاذتنا ، لكن العنوسة ارتفعت بشكل كبير فى مصر فى الآونة الآخيرة حتى وصلت الى 9 مليون فما هو رأى حضرتك؟ هتلاقى الرجالة المعنسين اكتر من الستات ! فعلا.. نسبة الفتيات 48 % والرجال 52%.. لكن رغم هذا ليس على الرجال حرج بينما الجميع يلوم على الاناث بلا مبرر فما هو رأى حضرتك؟ رفعت احد حاجبيها ولوحت بكفيها قائلة : هى دى محتاجة كلام.. هيتجوزوا ازاى فى الغلا والكوا ده، يعنى كل شاب من دول محتاج يجى مليون جنيه عشان يعرف يجيب شقة وشبكة وفرح والذى منه، لكن أنا شايفة البنات زى الفل ولا يهمهم من كلام الناس . ماذا تقولين للمتحرشين؟ انسان الغاب طويل الناب وكيف تردين لمن يسخرمن العانسات ؟ يا خريج الحديقة يا وارد افريقا ما هى نصيحتك للبنات؟ ولا يهمكم ده حتى مش كويس على عقلكم الباطن ولا نفساويتكم.. كل واحدة تضحك للدنيا وتلبس قبعة حلوة وتدندن «انت فين يا سبعى يا جملى.. يا مستبد يا سادس عشر» ، يعنى الواحدة لازم تجوز راجل «صح» يا اما قلته أحسن وساعتها ترفع شعار «عانس.. وافتخر»، وده طبعا أحسن ما تقعد تتجوز وتتطلق وتقوم من حفرة لدحديرة ومن كف لكف وتجرجر وراها كتيبة عيال . ما هو أكثر المواقف الطريفة فى حياتك ؟ يوه جتك ايه فكرتينى بموقف لا يمكن أنساه أبدا، لما كنت مطربة – متستغربيش – أصل أنا غنيت ورقصت ومثلت يعنى سبع صنايع والبخت ضايع، المهم يعنى كان عندى نمرة بقدمها ولما طلعت كان الملحن مجهز لى اغانى ويشاء القدر ان المطربة فتحية احمد حاضرة فى الصالة بتتفرج على البروجرام, اول ما غنيت الاغنية الاولى ضحكت فتحية ولما دخلت على الاغنية التانية.. سهمت ، لكن بعد الاغنية التالتة لاقيتها قدامى على المرسح ونازلة فى ضرب وفين يوجعك، أتارى الأغانى دى كلها بتاعتها وانا معرفش انها موجودة وبتشوفنى وفى اول اغنية افتكرت انها تحية لها لكن بعد كده فهمت انى لطشتهم منها. ما هى اكثر الاشاعات التى أغضبتك؟ انا عمرى ما زعلت من اى اشاعة فى حياتى، لكن بعد ما مت طلعوا عليا انى يهودية، وطبعا كل اديان ربنا حلوة، لكن ابقى يهودية ازاى يا ناس وانا اسمى زينب محمد سعد، اما زينات صدقى ده اسم الشهرة واخدته من صديقة عمرى خيرية صدقى .
