إنسان متصالح مع نفسه.. مش بيركز مع ستاتس صحابه ولا بياخد الكلام على نفسه.. ولا ليهم فى جو الخرزة الزرقا والحسد والعين.. لو العربية اتدشدشت ما يقولش أصل محمود ركب معايا وحسدنى.. ولا هيفضح محمود واللى جابه ويجرسه على الفيس بوك.. زى ناس نعرفهم كويس. - ما تسأليهوش أسئلة محرجة زى تحب تيجى معايا عند ماما والا تنزل تخرج مع صحابك؟ بينى وبينك السؤال ده ما يتسألش.. إجابته لا يختلف عليها رجلان على وجه الكوكب ده ومش هفسر أكتر من كده يارب تكونى فهمتى! - لو قالك مابيحبش السوشى أو التشاينيز أو الهندى أو أى حاجة.. ما تحاوليش.. ومش هيحبها لو كلها من إيدك برضه.. هتترمى.. خليكى فى الخضار باللحمة.. سهل ولذيذ. - لو بتعمليله تاج ومش بيعبرك.. إوعى تحرجى نفسك تاني بطلى جو ال 5000 مينشن.. مش هيرد.. طلعيه من دماغك واعملى تاج لدينا صاحبتك هترد فى ثانيتها. - لو قولتى لجوزك مالك وقالك ولا حاجة سيبيه براحته. هو مش زينا بيعوز حد يتحايل عليه بدل المرة ألف.. هو بجد مش عايز يتكلم. - الرجالة مالهمش فى جو التصوير كل دقيقتين بتاعنا ده.. هو لو اتصور بيبقى من غلبه.. وعشان تنزلى من على ودنه.. مش عشان حب التصوير فجأة. - بلاش سيلفى مع راجل.. مش هتعجبك النتيجة.. مش هيعمل بوز البطة ولو عمله هيبقى بوز الديناصور.. بلاش أحسن. - مافيش راجل بيموت فى الزيارات العائلية زى ما انتى فاكرة.. دى مجاملات. - مافيش راجل بيحب المفاجآت.. الرجالة مش بتحب الورد.. الرجالة مش بتحب جو العيد ميلادات ولا أى احتفالات.. الكب كيك بيعصبه. - الراجل مالوش فى جو السربرايز بارتى ولا إنك تجيبيله تورتة ويهف فى الشمعة.. ومافيش راجل بيحب يجيب دباديب ولا يتجابله دباديب. - الراجل ممكن ما يركزش لو حاجة مش نضيفة.. بس كله كوم والعربية كوم.. اعتبرى نفسك قاعدة فى حضانة أطفال رضع ولو قدرتى تلبسى كيس بلاستيك فوق الجزمة البسى.. هيحبك أووووى.. إوعى تاكلى أو تشربى فيها.. برضه هيحبك أوووووى. - الراجل وهو مهاجر ممكن يحط هدومه كلها وجزمة فى كيس بلاستيك من بتوع كارفور.. انتى اللى بتاخدى الوزن كله.. ما تحوريش. فلو طالعين الساحل ممكن يكون حاطط لبسه فى جيب البنطلون.. انتى اللى ممرمطاه فى الشنط والشيل والحط. - أيووون.. خروجة صحابه أجدع عنده من الخروج مع صحباتك المتجوزين وأجوازهم مليار مرة.. تعايشى وبطلى زن. - الرجالة مالهومش فى التواريخ.. فاكر أول يوم اتقابلنا كان كام ميلادي؟ وأول يوم اتخانقنا كان كام هجري؟ و كنت لابس إيه لما قابلت بابا أول مرة.. الديتيلز دى بتصيبه بالإعياء وممكن يفشكل الجوازة كلها.. هو مش فى امتحان ثانوية عامة. - الراجل مش بياخد باله إنك صبغتى شعرك إلا لو كان شعرك اسود وبقى أورانج أو فوشيا.. لكن لو صبغتى بنى بندقى ولا هيعبرك من هنا لقرن جاى.. انتى نفسك مش ملاحظة الفرق يا بايخة.. اعترفى. - الراجل عنده اللى يصحيه من النوم من المحرمات.. ولو فكرتى تصحيه يبقى لسبب قهرى.. بتولدى مثلا.. غير كده استنى.. كلها 16 ساعة ويصحى من القيلولة بتاعته.. الدنيا ما طارتش. - جو.. أصل مامتك ومامتى وخالتك وخالتى واختك واختي أخرته حاجة من الاتنين.. يا هيسيبلك البيت و يطفش.. يا انتى هتعيطى لحد ما جفونك تبألل و تباتى عند مامتك يا فالحة.. فبلاش منه. - ما تغلطيش فى صحابه ولا فى قعدة القهوة.. الحاجات دى ريد لاين..توقفى عندها وستوووب يا أمووورة.
