الراجل المصرى.. # إنسان متصالح مع نفسه.. مش بيركز مع ستاتس صحابه ولا بياخد الكلام على نفسه.. ولا ليهم فى جو الخرزة الزرقا والحسد والعين.. لو العربية اتدشدشت ما يقولش أصل محمود ركب معايا وحسدنى.. ولا هيفضح محمود واللى جابه ويجرسه على الفيس بوك.. زى ناس نعرفهم كويس. # ما تسأليهوش أسئلة محرجة زى: تحب تيجى معايا عند ماما واللا تنزل تخرج مع صحابك؟؟ بينى وبينك السؤال ده ما يتسألش.. إجابته لا يختلف عليها راجلين على وجه الكوكب ده. ومش هفسر أكتر من كده.. يا رب تكونى فهمتى. # لو بتعمليله تاج ومش بيعبرك.. إوعى تحرجى نفسك تانى.. بطلى جو ال5000 مينشن.. مش هيرد.. طلعيه من دماغك واعملى تاج ل«دينا» صاحبتك هترد فى ثانيتها. # مفيش راجل بيفهم التحوير بتاعنا.. اللى هو إنت مش بتخرّجنى خالص.. وانت مش بتحبنى. هيقولك ما انا خرّجتك يوم الخميس 2 يوليو سنة 2015 الساعة 8 بالليل ورحنا سينما وكلتى من كنتاكى دينر بوكس وجبت لك كولسلو.. فخليكى دوغرى. # لو قلتى لجوزك: مالك؟ وقالك: ولا حاجة.. سيبيه براحته.. هو مش زينا بيعوز حد يتحايل عليه بدل المرة ألف.. هو بجد مش عايز يتكلم. # الرجالة مالهمش فى جو التصوير كل دقيقتين بتاعنا ده.. هو لو اتصور بيبيقى من غُلبه.. وعشان تنزلى من على ودنه.. مش عشان حب التصوير فجأة. # بلاش سيلفى مع راجل.. مش هتعجبك النتيجة.. مش هيعمل بوز البطة ولو عمله هيبقى بوز الديناصور.. بلاش أحسن. # مفيش راجل بيحب المفاجآت.. الرجالة مش بتحب الورد.. الرجالة مش بتحب جو العيد ميلادات ولا أى احتفالات.. الكب كيك بيعصبه. # الراجل مالوش فى جو الاسبرايز بارتى ولا إنك تجيبي له تورتة ويهفّ فى الشمعة.. ومفيش راجل بيحب يجيب دباديب ولا يتجاب له دباديب. # مفيش راجل بيحب الرغى.. مش هييجى يقولك كلت إيه وشربت إيه وعملت كذا فى الخروجة.. دى حركاتنا احنا. بالنسبة للرجالة، الحمد لله ده أجمل رد لكل حاجة.. كلهم كده.. مش هيفرق مع راجل إن منّة حامل أو إن ميار سابت شغلها.. أو ضربت مديريتها وجابتها من شعرها.. كل ده بالنسبة له هذى. # أيووون.. خروجة صحابه أجدع عنده من الخروج مع صحباتك المتجوزين واجوازهم مليار مرة.. تعايشى وبطّلى زن. # الرجالة مالهومش فى التواريخ.. فاكر أول يوم اتقابلنا كان كام ميلادى؟ وأول يوم اتخانقنا كان كام هجرى؟ وكنت لابس إيه لما قابلت بابا أول مرة. الديتيلز دى بتصيبه بالإعياء وممكن يفشكل الجوازة كلها.. هو مش فى امتحان ثانوية عامة. # جوّ «أصل مامتك ومامتى وخالتك وخالتى وأختك وأختى».. آخرته حاجة من الاتنين.. يا هيسيبلك البيت ويطفش.. يا إنتى هتعيّطى لحد ما جفونك تبألل وتباتى عند مامتك يا فالحة.. ف بلاش منه. # أكل مامته أحلى من أكلك ومن أكل 10 زيك.. دى من الثوابت الكونية زى الشمس بتشرق من المشرق كده.. ما تتعبيش نفسك وتحرقى سعرات على الفاضى. الرجالة أبسط مما تتخيلوا يا جماعة. إحنا اللى تفاصيلنا كتير بزيادة. عرفتوا بقى يعنى إيه الرجالة من المريخ. كوكب دمااااااااااغ. ملحوظة لزم التنويه عنها.. مش شرط كل الصفات دى تتجمع فى كل راجل.. فيه راجل فيه صفتين بس أو تلاتة.. مش بقول إن كل الرجالة كده.. بس لو اتجمعت كل الصفات دى فى جوزك يبقى ده حظك بقى يا بنت المحظوظة. الكلام السابق كتبته ببراعة الأستاذة سارة الذهبى على موقعها على «الفيس بوك» فنقلته بتصرف.
