ايه البدلة الجميلة دى اللى انت لابسها ياسى السيد وفين طربوشك كفى الله الشر..انت خلاص يا خويا قررت تغير جلدك وتبطل لبس الجلاليب البلدى والطرابيش؟ لا ماهو انا مش سى السيد اللى انت عارفاه يا أمينة ! اسم الله على عقلك ياخويا.. كان بدرى عليك السهايمر ههههههه الله يحظك اسمه زهايمر يا ولية مش سهايمر ياخويا سيبك من الشكليات دى وقولى تقصد إيه يعنى انك مش سى السيد؟ مش عارف اجيبهالك ازاى يا أمينة بس أصلى الحكاية ومافيها ان ده اللى بيسموه الذكاء الاصطناعى ! أحب على يدك ياسى السيد كلمنى على قد عقلى ولا اكمنك يعنى متنور و بتفك الخط تتأنعر عليا ! انتى مسمعتيش حاجة خالص عن الذكاء الاصطناعى..اومال قاعدة طول اليوم قدام التليفزيون بتهببى إيه ياولية؟! عايزنى اطبخلك من أكل التليفزيون يا سى السيد؟ على الأقل استفيد حاجة من قعدتك قدام التليفزيون طب بس الأول فهمنى حكاية الذكاء الابصرطناعى ده دى حاجة جديدة كده طالعة فى العالم كله يا أمينة تقدر تخلى الواحد منا يبقى واحد تانى فى لمحة عين! قصدك شغل عفاريت يعنى ياسى السيد وكده؟! لا مش بالظبط يا أمينة بس اللى قدامك ده مثلاً سى السيد معمول عن طريق حاجة اسمها الشات جب بى تى ! حرام عليك يا سى السيد هو انا عرفت ياخويا الذكاء المصطناعى ده لما تقولى شاش بى جى تين ؟ ههههههه الله يحظك يا أمينة تين ايه بس وخوخ ايه، بصى هو واضح انه صعب عليا أخليكى تفهمى الموضوع لكن الحكاية ببساطة دلوقتى ان الذكاء الاصطناعى ده ممكن يخليكى واحدة تانية كنتى تحبى تكونى مكانها! عايز تفهمنى مثلاً ان البتاع الاصناعى ده ممكن يخلينى مثلا زى زبيدة ولا جليلة العوالم بتوعك؟ ماهو انتى عمرك ما تفلحى يا أمينة طول ما انتى حاطة زبيدة وجليلة فى دماغك ومع ذلك قربتى تفهمى! طب و بسلامتك مثلا بعد ما دخلت المكنة دى ولبست البدلة وقلعت الطربوش فاكر ان ده ممكن يخليك مثلا نور الشريف ولا محمود ياسين ولا حتى أحمد عز؟ لمى لسانك و افهمى بقى احنا لازم نساير العالم ونستفيد من الذكاء الاصطناعى ده، عارفة مش انتى ساعات بتكونى محتارة تطبخى ايه؟ يووووه كتير ياسى السيد وبيكون نفسى اعملك الأكل اللى بتحبه من غير ما تزهق منه ولا منى ! اهو لما تكونى فى الحالة دى ممكن تدخل على الشات جى بى تى وتقوليله عايزك تفكرلى فى اكلة حلوة يحبها سى السيد وكمان تقولى اعملها ازاى؟ أنا مش محتاجة الحاجات دى فى الطبيخ ربنا يخليلنا الشيف شربينى والشيف حسن ونجلاء الشرشابى.. احنا خلينا فى حكاية انى ممكن آلاقى نفسى واحدة تانية.. إيه رأيك يا سى السيد نخلى اللى بتقول عليه ده يخلينى أوربية اتفقنا «تعالى معايا اهو نفتح الموبايل وننزل تطبيق الشات تى بى جى وغمضى عينك وانا هدخل كل المعلومات عنك واقوله عايز أمينة بس تكون حاجة أوروبية شكلاً وموضوعاً ! خلاص أفتح يا سى السيد؟ فتحى يا أمينة وتعالى بقى بصى شوفى نفسك فى المراية بقيتى اهو أحلى من كل الأوروبيات شكلا.. تعالى بقى نختبر المضمون و قوليلى..بتحبينى يا أمينة؟ أوف كورز طبعا بحبك يا سى السيد. الله اكبر واضح ان الذكاء الاصطناعى اشتغل معاكى. ايوه يا سى السيد الذكاء الاصطناعى نادانى خلاص! طب تتمنى إيه دلوقتى عشان احققهولك؟ أتمنى تنئلع من قدامى وتغور من وشي وتبطل مياصة يا سى السيد علشان ألحق أعملك الغدا!
