تعرض أحد الأشخاص خلال تواجده بالعين السخنة في منطقة السويس إلى حادث أليم، إثر التهام سمكة قرش لقدمه أثناء ممارسة السباحة في إحدى شواطئها. وقرر محافظ السويس اللواء أحمد الهياتمي، منع النزول إلى الشاطيء حتى يتم التأكد من حقيقة تواجد أسماك القرش بالقرب من الشاطئ، لافتاً إلى سيقوم بصحبة لجنة من وزارة البيئة لمتابعة الأمر على أرض الواقع. وتداول حساب لشخص يدعى "علاء حمودة" على موقع التواصل الاجتماعي "فيسبوك" 20 معلومة عن بعض الأشياء التي تجذب سمكة القرش، وهي "حسب طريقته" كالتالي: - "مفيش حاجة اسمها "البحر دا مفيهوش قروش".. مفيش بحر على سطح الأرض مفيهوش قروش.. حتى القطب.. فيه قروش.. القروش بتعيش في المياه الباردة.. و الدافئة.. و في كل بحار الدنيا". - "السيدات اللي بتنزل البحر بالميكياج.. و كريمات الجسم.. و الشباب اللي بتحط مزيل عرق قبل السباحة، و كريمات الشمس.. الروائح دي بتجذب القروش و تثير فضولها.. أعتبر البحر زي حمام السباحة.. خد دوش قبل نزول البحر..لو بتتحرق و تلتهب من الشمس تبقي في الحقيقة عندك حساسية معينة.. استشر الطبيب يكتبلك مضاد حساسية مناسب قبلما تنزل الماية.. حايحميك و مش حاتجيلك حروق.. بدل الكريمات نفاذة الرائحة". - "على ذكر حمامات السباحة ومحظوراتها.. البول في البحر زي الدم بالضبط.. ريحته بتشمها القروش على بعد أميال". - "بلاش تعوم في مكان انت مش شايف المياه و أعماقها فيه كويس.. و بلاش تعوم في مكان غير مطروق مفيهوش سباحين". - "القروش ممكن تطلع لك للمياه الضحلة.. زي الصورة كده.. فباستمرار لازم تكون شايف القاع حواليك.. و ماتكونش المياه داكنة جدا أو فيها عكارة رمل". - "مش ضروري تعوم داخل المياه لمسافة طويلة .. دي مش شطارة.. و مش محتاج تثبت حاجة لحد". - "ماترميش اي بواقي أكل في المياه.. حتى لو ساندوتش جبنة.. حتى لو بسكوت.. و لو شفت حد بيعمل دا.. إمنعه... الحاجات دي مهما بلغت تفاهتها بتستدعي اسماك معينة عشان تاكلها.. و القروش بتاكل الاسماك دي.. و بتدور عليها". - "لو اتجرحت لأي سبب أخرج من المياه فورا.. مهما كان جرح صغير.. و للسيدات، أي نزيف "ايا كان مصدره" يمنعك من السباحة". - "ممنوع لبس الخواتم و الدبل و الساعات و الأساور البراقة الفضية". - "إذا شعرت و أنت بتعوم إن في موجة مفاجئة دفعتك من اسفل إلي أعلى.. اخرج من المياه فورا". - "مفيش داعي للطرطشة و إحداث ارتباك على سطح المياه وأنت في عمق.. و ممنوع في جميع الأحوال تغوص لوحدك". - "ممنوع تتعرض لأي شكل من اشكال الحياة البحرية.. و لا تحاول تلمسها أو تستفزها.. و لو لقيت كائن بحري ميت بجوارك اخرج من المياه". - "لما تلاقي لافتة ممنوع السباحة.. أو العلم مرفوع.. ماتنزلش المياه.. مش شطارة برضه.. و لو بتعوم وحارس الشط أو رجل الإنقاذ صفر لك.. اخرج فورا". - "ماتحاولش تعوم بالقرب من مراكب الصيد أو الصيادين". - "بلاش الهزار المرح بتاع -انا باغرق/ الحقوني قرش - عشان وقت الجد ماحدش حايساعدك". - "ماتنزلش للسباحة أو الغوص على الإطلاق في مكان ماتعرفوش". - "لو أمسك بيك قرش فعلا.. حاول تمسك عينه أو خياشيمه.. ساعتها يتركك فورا.. اعرف شوية عن طبيعة المكان اللي رايح تصيف فيه.. و ابحث عن أنواع القروش الموجودة و الحياة البحرية الخطرة". - "ماتدخلش بطفل صغير لمكان عميق.. لو مصمم ادخل و خاطر بحياتك لوحدك". - "ابعد عن السباحة في مداخل القنوات و المياه المفتوحة زي ما تكون مثلا في رحلة يخت و تنزل تسبح حوالين اليخت.. ابعد عن الحيد المرجاني". - "في حيوانات أخرى غير القروش تبدو مسالمة زي الدلافين و السلاحف.. "الغلاسة" عليها ممكن تخليها تقتلك بسهولة تامة.. السلحفاة البحرية ممكن تبترلك اصبع أو اتنين.. أعتقد إنك يمكن مش حاتبقى سعيد بدا أوي".
