لكل أم تجد صعوبة في نوم أطفالها، إليكِ حلا سحريًا للأخذ بيد طفلك إلى عالم الأحلام والنوم الهاديء.. «شيماء عبدالعال» تقدم مجموعة قصص يومية تساعدك على ذلك: حدوتة النهاردة ... «جنى والمشط» كان يا ما كان كان في زمان بنت جميلة و امورة اسمها جنى، لكن عيبها الوحيد أنها مش بتحب تسرح شعرها، كان كل يوم لازم مامتها تطلب منها أنها تسرح شعرها أول ما تصحي من النوم، لكنها كانت بترفض وتقولها لا يا ماما أنا مش عايزة أسرح شعري مش بحب المشط. وكانت جنى بتأخد المشط تخبيه في أوضتها تحت السرير وتقول لمامتها منا قاعدة في البيت مين يعني اللي هيشوفني و تجري تلعب بالالعاب بتاعتها، لحد ما باباها يجي من الشغل ويشوف جنى قاعدة بتلعب وشعرها منكوش، يفضل يقولها مسرحتيش شعرك ليه النهارده تقوله برضه مش بحب اتسرح، كانت مامتها بتسرح لها بالعافية لما يجوا يخرجوا وتقعد جنى تعيط وتصرخ ومامتها بتسرحلها. و كانت أول ما تنزل الشارع تفضل تشد في التوك من شعرها لحد ما شعرها يتنكش تاني، كان باباها وماماتها بيتكسفوا جدا من شكلها وهي شعرها منكوش، طبعا شكلها بيبقي احلي بكتير وهي مسرحه شعرها ومتساوي، ومامتها اتكلمت كتير معاها ان البنت الجميلة النظيفة لازم شعرها يبقي متسرح علي طول وجميل لكنها مقتنعتش. قعدت مامتها تفكر في حل لحد ما اتوصلت لفكرة وهي انها تقص لجنى شعرها عشان يبقي قصير ويبقي سهل علي جنى تسرحه حتي لوحدها، ولما قالت لجنى علي الفكرة دي رفضت وقعدت تعيط وتقولها لا ياماما بلاش، شعري هيبقي قصير وشعر اصحابي البنات طويل وكدة هيبقي شكلي زي الولاد، وفضلت جنى على الحال ده فترة طويلة مش بتسرح شعرها غير لما تخرج مع مامتها وباباها وبالعافية كمان وفي يوم من الأيام وجنى قاعدة بتتفرج علي التليفزيون، رن جرس الباب فتحت مامتها لاقت قرايب بابا جني جايين يزورهم و يطمنوا عليهم، رحبت بيهم وقالتلهم اتفضلوا. دخلوا ولما شافوا جني قاعدة وشعرها منكوش اتخضوا ومعرفوهاش اصلا وسألوا مامتها هي مين البنت اللي شعرها منكوش دي؟ ردت مامتها وهي مكسوفه وقالتلهم دي جنى بنتي يا جماعه، قرايبها استغربوا وقالولها ايه معقول دي جنى داحنا معرفنهاش، اصل اول مرة نشوفها وشعرها منكوش شكلها غريب اوووووي. كل مرة كنا بنشوفها مسرحه شعرها وحاطة توك جميله، جني حطت وشها في الارض واتكسفت جدا من نفسها مكنتش تعرف ان شعرها المنكوش بيغير شكلها لدرجه ان قرايبها ميعرفوهاش، مقدرتش حتي تسلم عليهم و جريت علي اوضتها وطلعت المشط اللي كانت بتخبيه من مامتها عشان متسرحلهاش وقعدت تسرح لنفسها وتساوي شعرها وحطت توك جميلة وخرجت عشان تسلم عليهم. فرحوا كلهم بجنى وسلموا عليها و باسوها وبعد ما الضيوف مشيوا راحت جنى لمامتها وقالتلها انا اسفه يا ماما علي الاحراج اللي سببتهولك وسببته لنفسي انا كنت مكسوفة جدا من نفسي، شكلي دلوقتي قدامهم هيبقي ايه يا تري هيقولوا عليا بنت مش نظيفة ومش بتسرح شعرها وبتقعد منكوشة في البيت مش بتسرح غير لما تخرج للشارع. مامتها قالتلها انا قولتلك الكلام ده كتير اننا لازم نسرح اول ما نصحي من النوم عشان شكلنا يبقي نظيف وجميل لنفسنا كمان مش عشان الناس اللي بتشوفنا حتي لو قاعدين في البيت لكن خلاص اديكي اتعلمتي. ردت جنى وقالتلها فعلا يا ماما اتعلمت اني لازم احافظ علي نظافتي واني يكون مظهري جميل جوه البيت وبره البيت.