فؤاد حداد أصحى يا نايم وحّد الدايم وقول نويت بكره إن حييت الشهر صايم والفجر قايم أصحى يا نايم وحّد الرزاق رمضان كريم مسحراتي منقراتي في غيط حراتي طَرَح كلام آه يا سلام أنا قلت آيه ورميت شقايا فى الغيط نقاية طرح كلام آه يا سلام خلعت بابي ورميت شبابي في الغيط حبابي طرح كلام آه يا سلام وأدور مغمّى واسقى بدمّى الغيط يا عمّي طرح كلام آه يا سلام كدا القوافى تقول أوافى كدا طوافي طرح كلام آه يا سلام كدا قلبي وافِي للي انكتب لي يا ليل عوافِي والمشي طاب لي
والدق على طبلي ناس كانوا قبلي قالوا فى الأمثال: "الرجل تدب مطرح ما تحبّ"
* * * وانا صنعتى مسحراتى فى البلد جوال حبّيت ودبّيت كما العاشق ليالى طوال وكل شبر وحتّه من بلدى حتّه من كبدى حتّه من موّال: حته من بلدى حته لأم أولادى بنيت لها عشّ بعيدان الأمل و رموش كان قلبى فاعل يغنى فى المقاوله دى ويقول شكرت العواذل اللى ما بيرموش ويقول شكرت العواذل اللى يرمونا ما كنتش اضرب ضلوعى لولا آلمونا ولا أضرب المونه أبنى لأم أولادى اصحى يا نايم وحّد الدايم