رغم جمال اللغة العربية الفصحي, إلا أن اللغة العامية( بتخليك) تشعر بأن المعني سهل الفهم وقريب من قلبك, ولأنني أطرح حديثا دار بيني وبين أكثر من شاب, وهو البنات عايزه تتجوز ليه؟ شعرت أنه من الأفضل أن تكون اللهجة عامية,( علشان) الفكرة توصل للقارئ البسيط في كل مكان..وتعالوا نشوف الموضوع إيه؟ علي مدار هذا العام وبحكم عملي سمعت قصص الشباب في الحب والزواج, وطبعا العامل الاقتصادي عائق أساسي بيخلي قصة الحب تفشل, وهنا محدش يقدر يعلق, والبنت لو سابت الشاب اللي بتحبه عشان الماديات, معذورة, لأننا في مجتمع شرقي بتحكمه عادات وتقاليد ودين, وفتح بيت والذي منه أمر صعب فعلا, وحل المشكلة دي في تسهيل متطلبات الزواج من قبل الأسرة بعيدا عن التعقيدات. بس العجيب لما تلاقي شاب بيحب بنت, وبعد فترة يسيبها, ولما تسأل عن السبب تزعل, لأن هو شايف البنات كلها بتاعت مصلحتها, يعني من الآخر عايزة تتجوز أو حتموت علي الجواز..وإن البنت بعد ما بتستجيب لطلباته بيدخل الشك جواه وبيحتار يا تري البنت دي كويسة ولا لأ..وهنا ردي كان مختلفا, فتفسير طلب البنت للجواز إنه مصلحة, وإنها راح تعنس من غيرك, وأنك أنت اللي راح تحل عقدتها, تفسير خاطئ ومرفوض, ويدل علي كم الإعاقات الفكرية الي بيعاني منها المجتمع. لأن أي اتنين بيحبو بعض من الطبيعي أنهم يحسو بعد فترة من العلاقة إن العاطفة أو الإحساس( بينهما) بدأ يأخذ مسارا أخر, بمعني الرغبة في العناق وما شابه ذلك من انفعالات لا دخل لنا فيها هي بتيجي تلقائي نتيجة الحب بين الطرفين. وزي ما البنت بتحس بده, أنت كمان عزيزي الشاب بتحس كده وأكتر, والعواطف ربنا أوجدها فينا كلنا. إذن طلب الزواج هو رغبة في ممارسة حقكم في التعبير عن عواطفكم بشكل شرعي بعيد عن الحرام والخوف..ولأن البنت مش حتقدر تقول لك عايزة أحضنك أو..أو...بتقولها بشكل يتناسب مع أخلاقيتنا وديننا وتربيتنا, امتي نتجوز؟ لكن سيادتك عايزها تتجاهل انفعالاتها الطبيعية وتضغط عليها, رغم إن ربنا أوجدها فينا من غير إرادتنا, وهو أمر لا يخص فئة دون الأخري باستثناء المرضي النفسيين. والمصيبة إنك بتعاقب اللي بتحبها بذنب الانفعال التلقائي وأنت بتعاني منه زيها وأكتر, خاصة لو في منبه قوي زي الحب ومع شخص محبب للقلب, الفرق إنك عايز( تقضيها) تحت مسمي الحب, وهي عايزة تتجوز في النور, بس أنت بدل ما تفهم كلمة( جواز) تعبير مجازي المقصود منه علاقة شرعية تفرغ الطاقة العاطفية بينكما, بترجم ده( مصلحة وخوف من العنوسة). وإذا استجابت البنت لطالباتك فده معناه أنها مش كويسة..طبعا هي غلط لأن عندنا دين وعادات محفورة جوانا, ولازم تكون البنت واعية..بس قبل ما تكون البنت مخطئة يا تري أنت عملت إيه خلتها تستجيب لك؟..يعني البنت لو مش كويسة هي اللي راح تبدأ قبل انت ما تطلب, لأنها عايشة بحريتها زيك, ومش بيفرق معاها حاجة..أما لو بنت محترمة استجابت لرغبات من تحب تحت إصراره, فأكيد هناك ذئب حرك عواطفها وزن علي ودنها. والإحساس بطبيعته تلقائي لا يحتاج علما كبيرا, والدليل الحيوانات مين بيعلمها؟ الغريزة أوجدها الله فينا كلنا, وهي محرك قوي وأساسي لإحساسنا وبشكل تلقائي..ومادام أنت مش عارف اللي حركك وحرك اللي بتحبها تجاهك, الحب ولا الغلط؟ يبقي بلاش تضحك علي بنات الناس تحت مسمي الحب, عشان كم الإعاقات مايكترش كفيانا بجد. وياريت تكون فهمت صح البنات عايزة تتجوز ليه؟ كلية الآداب جامعة الإسكندرية
