على صفحات موقع "فيسبوك" تنتشر الأحاديث عن خطف الفتيات في أنحاء متفرقة من مصر، ما أثار نوبة كبيرة من الذعر، وانتشرت معها سبل مقاومة الخاطفين والتعامل معهم، وقدمت نصائح عديدة عن كيفية تجنب محاولات الخطف وترصد "بوابة الأهرام" أهم النصائح لتتجنبي التعرض للخطف وهي: نظرا لتعدد حالات الاختطاف وفى ظل الظروف الحالية يرجى عمل الآتى: 1- متركبيش تاكسى لوحدك أبدا ولا الصبح ولا بالليل وتحت أى ظرف. 2-المكروباصات متركبيهاش لو كانت فاضية أو كانت كلها رجالة لان حصل اختطاف من مكروباصات وكانت ماشية في الخط، لكن الركاب كانوا كلهم رجالة وتبع السواق. 3- متمشيش لوحدك في الشوارع الجانبية سواء الصبح او بالليل، وطبعا الشوارع الخالية من المارة ابعدى عنها تماما. 4- اتخلى هذه الفترة عن اللبس الضيق. 5-يجب تجنب الذهاب إلى الدروس أو الكورسات بالليل، حيث وقعت حالات اختطاف للعديد منهن، ومن الأفضل لو كانت التلميذة في ابتدائى او اعدادى او حتى ثانوى إن حد يوصلها من أقاربها. 6- حاجة مهمة جدا لازم تتعمل، لازم كل بنت يكون معاها حاجة في شنطتها حماية لها (صاعق كهربائى-اسبراى اللى بيتحط فيه الشطه-لو مش عارفة تشتريه اعمليه انتى في البيت، اشترى زجاجة برفان من أى محل، واعملى المكونات وتكون طبعا حاميه جدا-لو مش عارفة تشترى أو تعملى حاجة من الحاجات دى، ولو وصل الأمر حطى اى مبيد حشري لأن التركيبة بتاعته مؤثرة جدا) ولازم تكونى مستعدة في أى وقت وفي أى لحظة. 7- بالنسبة للتاكسيات، متركبيش مع تاكسى ويكون فيه واحدة راكبة جنب السواق لانها في الغالب بتكون تبعه. 8- الناس اللى بتسافر سواء رجالة أو ستات، حصل إن بيلاقوا على الطريق حد مرمى قدامهم، فبينزلوا يشوفوه، وفجأه يلاقوا ناس طلعت من الجنب، ويسيطروا عليهم، ياريت تخلى بالكوا كويس. 9- احذرى من قياده السيارة بالليل، وأى حاجة تقذف على زجاج العربية إذا كان بيض أو ما شابه حذار إنك تشغلى مساحة الزجاج أو تقفى، أكملى قيادة السيارة لمسافة كافية وتأكدى أنه لا يوجد أي أحد خلفك قبل ما تقفى بالسيارة، لأنه بيتم قذف البيض بهدف تلطيخ زجاج العربية وبينتهى الامر بسرقة العربية أو خطف البنت كمان والموضوع ده تكرر كتير فى مدينة نصر. 10- تم رصد حالات كتير بيتم فيها خطف الشنط من الايدى عن طريق واحد بيكون على موتوسيكل، وخصوصا لما تبقى الشنطة مليانة أو منظرها ملفت، وياريت الكل يأخد باله من اللى معاه فى الشنطة.
