المذيعة فى أحد الشوراع الرئيسية لمنطقة شعبية فى الجيزة ، تبتسم وتقترب منها الكاميرا وهى تقول بصوت مبحوح ومعانا عم دهشورى وهو من سكان المنطقة هانسأله ، وظهر فى الصورة دهشوري الصعيدى الفقير الذى لاتحتاج كثيرا حتى ترى فقره يطل عليك من عيون مكسورة وملابس رثة وعمة «دابت» وطال عمرها ، قالت نانى مذيعة الفضائية المشهورة «قولى يا عم دهشورى ايه أهم أمنياتك فى العام الجديد ، وأستطردت وأهم ملاحظاتك عن السنة الماضية «، أصر دهشورى أن يمسك بالمايك فى تحد للمذيعة وكأنه اراد أن يبعدها عن الكادر ، وبدأ كلامه منفعلا تشعر وكأنه يلقى خطابا من منصة مؤتمر ووسط جمع من الناس بصى يا ست هانم أن كل ما أتمناه في السنة الجاية أنها تكون سنة الغلابة ، انا نفسى المؤتمر الأقتصادى ينجح ..!! حرصت نانى على التعليق وجذبت المايك منه وحضرتك عارف المؤتمر الأقتصادى كمان ، نهرها بنظرة غضب وقال : طبعا يا ست أنا أعرفه اذا كان المؤتمر ده معمول علشانى انا اللى تعبت وأنا اللى ابنى « جاعد « فى البيت مش «لاجى» شغل ، وبنتى مش «لاجية» عريس كل اللى فى سنها حالهم يبكى ، احنا اللى شلنا هم البلد ودفعنا التمن ، لما ينجح المؤتمر هاتدور العجلة والمصنع اللى ورانا هايشتغل وابنى هايرجع يروحه وبنتى هاينصلح حالها وأنا هارجع أمسح العربيات فى الشارع وألاقى حد يمد أيديه بحسنتى . صمت دهشورى لحظة وقال بالنسبة للسنة اللى فاتت أنا بحمد ربنا انها فاتت وخلصت وكفاية عليها كده ، أخذت نانى أطراف الحديث من دهشورى وقالت مندهشة وكأنها رأت كائنا فضائيا أنامن خلال البرنامج بوجه التحية لعم دهشورى ووعيه بقضايا الوطن ، ابتسم دهشورى وقال بصوت مرتفع بدون مايك أنا عندى وعى بقضايا الغلابة ، والوطن كتروا فيه المطحنونين ! قُطع الأرسال بفاصل لإعلان عن منتجع سياحى فى شرم الشيخ !
