ف الخوف.. سدّق أي شيء ممكن يحصلّك ف الحلم ماتسدّقش غير نفسك ف الحلم.. اختار ظروف ماتشبهلكش خالص واثبت لها انك ف أي دور ممكن تبقي البطل وبدون جيوش ممكن تعيد اتزانك وتبدأ من جديد.. تقطف ورد من كل الجناين وبتضرب ف الحياه شلاليت لحد ماتقولك حاضر وأول شمس ليك بعد الشروق.. ست بيت ه تكون ف حضنك وأمّا تشتاقلك تقول : النور جفاني ف الحلم.. كل الحلول وارده وبدون فلسفه وزنك تقيل بس طيرانك خفيف لو حبّيت كده تقدر ساعتها تشوف الدنيا بشكل غير اللي انت متعوّد عليه.. تحضن كل اللي راجعين م السفر متعشمين ف الدفا زي حد كنت مستنيه من زمان وجالك (طعم الحياه من غير حبايب مر والعيشه ماتهونشي).. لما يبقالك فيها ناس بيحبوك وأنت عاملهم زي النياشين علي كتافك وهما عاملينك شجره وليها ضل ف الحلم.. دخولك ف قلبي زي الخروج منّه سهل وبسيط جداً وعادي.. بس ده من باب الشياكه ف الرد لمّا حد يسألني.. بقول: كانت قصّه خلصت الحصّه والعيال روّحوا والتاريخ واقف ما بين التُخت بيراجع المنهج علشان لمّا ييجوا العيال بكره ميلاقوش أخطاء وأنا بجري وراك ومش طايلك وقلبي واخد كل سوكسيه الجمهور ف قلّة الحيله وعنيكِ سوق مفتوح وأنا كنت داخل أشتري - بس الزمن - فارض إتاوه.. ع اللي طالعين م الحلم بشوية فرح!!.