القارئ عزيز جمعة يكتب: صرخة شهيد

بعد دول مين راح يعيش؟!
من رفح، سينا، العريش
كل نقطة دم منهم
نبّتت جوانا جيش
***
أيوه دُول خيرة جنودك
هُمَّ دُول عودِك..وعودِك
زرْعِتِكْ..حلمك..وجودك
احضني ولادك يا مصر
***
هُمَّ دول ف الشدة ضهرك
اقبلي يا عروسة مهرك
قلبهم شريانه نهرك
هُمَّ دُول تاج كل عصر
***
مهما كات أوقاتنا صعبهْ

انتي جوه قلوبنا كعبهْ
مستحيل هتكوني لعبهْ
طول ما فيه ف الجو نسر
***
حوّطي على كل جندي
ما تهابيش الريح وعاندي
ما اتولدتش بيه وافندي
عدّي طول ما ف عمري عمر
***
دول دهب ف النار يلالي
لا ليكي ضعف وخوف ولا لي
حلم واحد ف العلالي
مستحيل ينزللصفر
***
دوسي أدّي الأرض أرضي
مدي ضد الريح وصِدّي
عمر ما الصوت راح يصدّي
طول ما فيه ف الحلق مُرّ
***

كل حاجه ف روحي عنك
مش هعيش ممسوخ لإنك
حته مني وحته منك
مش هعيش ورا حرف جر
***
شبِّكي إيدك ف إيدي
قيدي نارك فيّا قيدي
لو هموت بفديكي عيدي
الشهيد طول عمره حُرّ
***
قولي ليه كرهوا المموَّه
اللي عاش حر ومفوَّه
قال كفاية ضمير مشوَّه
قال كفاية الخيط يكرّ
***
دمي فوق أراضيكي زينه
طمّني العين الحزينه
ما تخافيش مِ ابن الذين
اللي عايش جوه شر
***

ناوي يسرقنا الحرامي
جاي يقتلني ف صيامي
اشرب الدم اللي حامي
مش هتاخد منها شبر
***
مش هانخّ ومش بطاطي
للي عاش عمره احتياطي
واللي باع برخيص وواطي
واللي مش هنشوفله قبر
***
عيش شريد وطريد لجهلك
سيب تاريخ ملعون لأهلك
واحلف ان الله ندهلك
وانك الحاكم بأمر
***
اللي باع أرضه برخيص
بس قول ف الدين يهيص
نخلهم كان طرح صيص
انحراف وقالولنا فكر

***
صدَّق المسكين وسلِّم
إنه صار مفتي ومعلِّم
وانه جاي بعد اما كلِّم
ربنا وهيبقى خضر
***
وانهشايف الناس غلام
صك كفري معاه تمام
دمي عنده مهوش حرام
لأ كمان والجنه أجر!
***
يقتلونا وقالوا غزوة
مش هسيبك طيش ونزوة
جيش بلادي أساس وعزوة
نار هتحرق أي غدر
***
زرْعْ واكْل السُّوس جُدوُره
كله أَدَّىَ برافو دُورُه
التاريخ أثبت حضوره
شعب رافض أي حَجْر
***
دوس عليهم أرض بور
خلي طرح الصيص يغور
فكرهم ضلمه وماخور
جاي بعد الضلمه فجر
***
زغردي يا امَّا النهارده
قلتي بشهادتي اني هارضى
بصي لقلوعي اللي فارده
مش غنا ومواوويل وشعر
***
دمي اهو ع الأرض سايل
يسلم الكف اللي شايل
اللي يابني عمل عمايل
اللي مالي قلوبنا فخر
***
تسلم الروح اللي لبِّتْ
تسلم الإيد اللي ربِّتْ
واللي فوق التبَّهْ تبِّتْ
واللي نبِّتْ دمه جمر
***
أرضي دين مش للمزايده
بينا أرض مفيش محايده
خدها من قلب الصعايده
اسم واحد هو مصر
***
اسمى أحمد ولا مينا
مسلمين أقباط حمينا
واسألوا عن أرض سينا
يا ما شافت ألف نصر
***
مش هسيب ولا لحظة تارك
كل يوم عايش بنارك
اسكني عيوني اللي دارك
وابني ليكي ف قلبي قصر
***
موت على الأرض اللي شالْتك
ورِّي للجبانات بسالْتك
هي دي بلدك رسالْتك
احنا واحد مش لكَسْر
***
دوس عليهم دول بواقي
مرتزق مأجور تلاقي
يسلم البطل الفدائي
اللي شالنا ف وقت عسر
***
لما قالوا نبيع ف غيبتك
تسلم البطن اللي جابتك
دمك السايل إجابتك
أرض حره ومش لأسر
***
واللي باعك يوم بخسّه
لسه حقك باخده لسه
ما تخافيش ابن الأبالسه
عاش خيانه ومات بكفر
***
شوفي دا المنسي اللي عاهد
يسلم البطل المجاهد
اللي شهِّدْنا المشاهد
للرجوله ف عز ضهر
***
تسلم الإيد اللي شالت
اللي وقت سكوتنا قالت
اللي دمه ف أرضي سالت
الف قهر وألف نهر
***

ياللي حضنك عاش يسعهم
ياللي كان وجعك وجعهم
ياللي صعب كتير وداعهم
واللي عاصر قلبي عصر
***
سقفه للبطل اللي وفَّى
اللي حطك جوة كَفَّهْ
وحط روحه ف تاني كَفَّهْ
للي زارع أرضه صبر
***
سقفه للواد اللي مجدع
اللي علَّى الصوت وأبدع
اللي رافض أرضه مطمع
ولا يركع منها شبر
***
للي رافض أي ذلّه
واللي جاب كل الأدله
إنّ حبك عنده ملَّه
وانه قدم عمره شكر
***
عيشي حرة عظيمة دوله
طول ما فيه ولادك عتاوله
ما تخافيش سمسار مقاوله
ما تخافيش من أي مكر
***
كله لجل عيون بهيَّهْ
اللي ساكنة القلب هيَّهْ
مش هتبقي ف يوم هفيَّهْ
عيشي منصورة وعفية
واسلمي من كل شر



عزيز جمعة
صرخة شهيد
شهداء الوطن
مكافحة الارهاب