سألنا "فاكرين أول يوم فى امتحانات الثانوية العامة"..الإجابات: ودى حاجة تتنسى

بدأ طلاب الثانوية العامة فى العد التنازلى للساعات التى تفصلهم عن أول امتحانات الثانوية العامة، التى يعرف الجميع خصوصيتها الشديدة فى مصر، فهى القادرة على إصابة كثير من الآباء والأمهات بأمراض السكر والضغط، بالإضافة إلى الحالات النفسية التى تؤدى إلى انهيار كثير من الطلاب، وتعتبر الثانوية العامة فى مصر من الغرائب والعجائب، بسبب تعامل الآباء الغريب معها، فيعتبرها الطلاب ال"بعبع"، ويتعامل معها المسئولين فى وزارة التربية والتعليم بمنطق "غرام وانتقام"، ولذلك لا يوجد شخص مصرى لا يتذكر أول امتحان فى الثانوية العامة.
وشارك اليوم السابع المصريين ذكرياتهم وسألهم "ذكرياتك إيه مع أول يوم فى امتحانات الثانوية العامة"؟
وقالت سارة محمد 27 سنة "انا من الناس اللى بيتقال عليهم جِبلة ومش بقلق من الامتحانات، بس اللى عمرى ما بنساها إن ماما كانت صاحية من بدرى أوى وكانت مرعوبة بشكل غريب وفضلت تأكلنى موز وعسل أبيض كتير أوى ولما سألتها ليه قالتلى عشان تقوى ذاكرتك ومتنسيش حاجة، ولما روحت الامتحان فيه حاجات نسيتها عادى، وكمان بطنى كانت وجعانى جداً".
أما رشا أحمد 29 سنة فكان لها ذكرى مع أول أيام امتحانات الثانوية العامة لم تنساها طوال عمرها وقالت "انا دخلت اللجنة متأجرة، ولاقيت مراقبة شكلها غريب قالتلى على فكرة انا دارسة علم نفس وهعرف لو غشيتى، وفضلت تبصلى بصات غريبة، المهم إن البنت اللى كانت قدامى بدلت ورقة إجابتى معاها وفضلت تكتبلى أكتر من ربع ساعة لحد ما خلصتلى اللى انا عاوزاه، وبعد ما خلصنا الامتحان روحت للمراقبة قولتلها انتى دارسة علم نفس بس ولا بتفهمى حاجة، وانا بقى دارسة ازاى أضحك على الناس اللى زيك، قالتلى انا هراقب عليكى، المادة التانية روحت تانى مادة قولت لمدير الدور إنها بتاخد فلوس عشان تغشش ومشوها من اللجنة".
بينما قال خالد مصطفى 29 سنة "أنا كنت نايم وماما نامت على السرير جنبى عشان تصحينى بدرى، وفجأة ماما قامت مفزوعة ولاقتنى بسمٌع نصوص العربى وقواعد النحو، من كتر الخوف اللى انا كنت فيه، وأنا رايح الامتحان كانت رجلى بتقف مش بقدر أمشى والحمد لله مش عاوز أفتكر الأيام دى".
وقال حسام شورى 21 سنة "أنا يكفينى إنى أقول انى من الدفعة اللى جالها فى أول امتحان جمع كلمة وحى، وطبعاً زى كل الطلبة حليتها غلط، وبقيت قاعد فى اللجنة بشاكل فى دبان وشى، وسامع دوشة حواليا ومش طايق أبص فى الورقة".
وقالت ياسمين مصطفى 24 سنة "أنا كانت عندى مشكلة فظيعة إنى لازم قبل الامتحان بتجيلى حالة غثيان وقىء وبفضل كدة لمدة نص ساعة، بس فى أول امتحان دراعى اليمين وقف وكان باقيلى التعبير والامتحان باقى عليه ربع ساعة ويخلص، وفضلت كدة لحد ما المراقبة فضلت تقرأ لى قرآن وتقولى اهدى والحمد لله عدت".
موضوعات متعلقة:
- اليوم.. "التعليم" تجرى مزايدة على حق إعلان نتيجة الثانوية العامة والدبلومات
- بالصور.. الغضب يجتاح مراقبى الثانوية العامة غير الراغبين فى العمل بعد رفض اعتذاراتهم.. معلم: "من 8 الصبح وإحنا واقفين فى الشمس ومحدش معبرنا".. وأخرى تجلس على كرسى متحرك: "رافضين يقبلوا اعتذارى"