أقف على رجليك.. وابدأ تانى

حضرتك وأنت بتأسس شركتك وشغلك الخاص بتمر بمراحل صعود وازدهار ومراحل تراجع وانهيار..دى مراحل طبيعية.. لازم تكون قوى عشان تقدر تستمر وتقف على رجليك تانى.
واحد من أصدقائى المقاولين مر فعلا بالمرحلة دى.. الراجل كان مقاول بيمسك توصيلات الميه والصرف الصحى للمدن الجديدة وبياخد الشغل من خلال مناقصات من شركه الميه..الطبيعى إنه بياخد أمر التنفيذ ويجيب العمال والمعدات ويشتغل والفلوس بياخدها وفقا لأذونات صرف بتصرف من الشركة دى.. الراجل كان شغال وتمام لحد ما تجاوزت حقوقه فى شركه الميه المليون جنيه وبدأت السيولة إلى فاتح بيها بيته ومدور بيها شغله تقل.. والشركة تقوله ما فيش ميزانيه واستنى السنه المالية الجديدة.. الراجل فعلا كان بيمر بمراحل صعبه وتضييق شديد فى مصاريفه لحد ما ربنا كرمه وفعلا بدأت السيولة تتوفر شويه شويه.. رجعت شركته لازدهارها.. تعالوا سوا نقول مجموعه نقط حضرتك ممكن تواجهها خلال رحله إعادة الحياه لشغلك :
مهم إنك تعرف إن غيابك عن السوق للتراجع ده ممكن يطمع موظفين سابقين عندك أو حتى موردين أو شركاء إنهم يقدموا نفس خدماتك ويقوموا بدورك عشان يستحوذوا على نصيبك فى السوق..دا غير طبعا المنافسين إلى هيحارب عشان ياكل نصيبك.
وده هيطلب منك ساعات شغل اكتر وأفكار اكتر تسويقية وإنك تعمل مجهود اكبر عشان تستعيد دايره معارفك القوية واعرف إن اسهل حل فى الدنيا إنك تقفل وتستسلم بس الأبقى ليك ولشغلك إنك تحارب لغاية ما تستعيد مكانتك.
أولى الخطوات إنك قبل ما تعمل أى حاجة تفضى دماغك تماما من صراعات ومنافسين الماضى لأنك دلوقتى داخل على وضع جديد وخريطة منافسين جديدة..اقعد مع نفسك ورتب افكارك وحط خطه قويه الهدف الرئيسى منها إنك تستعيد مكانتك مش إنك تضرب حد أو تاخد مكان حد ركز فى نفسك بس.. اجتهد واعرف إن ربنا زى ما اسمه الرزاق فهو برضه اسمه الكريم.
مش مشكله ابدا لو حضرتك عامل دراسات مضبوطة عن شغلك إنك تاخد قرض من البنك وتلتزم بسداد اقساطه زى مبقول دايما الرزق فى الريسك يعنى الرزق فى المخاطرة.
تانى خطوة إنك تظهر للناس.. عمر ما حد هيدور عليك..لازم تظهر وتعمل حمله إعلانات وحمله اجتماعيات عشان الناس تفتكرك وتظهر إن الراجل إلى فاهم الشغل كويس عشان شغلك وخبراتك السابقة وده هيساعدك إنك تقدم خدمات متطورة عن اى حد تانى.. فى النقطة دى ما تعتمدش على السوشيال ميديا بس.. فى ناس ما بيثقوش فيها.. اظهر بنفسك وخلى الناس تشوفك وتعرفك
ثالثا: بالنسبة للمصاريف والعمالة..مهم إنك ما تتوسعش فى النقط هدى.. القرش هيفرق معاك.. مهم إنك تكون زكى جدا جدا فى الاستفادة من الموارد بتاعتك
آخر حاجة: لازم تعرف إنك عشان ترجع لمكانتك دا مش هيحصل فى يوم..دى رحله هتمر فيها بمواقف وهتكسب خبرات بس اتأكد إن فى الآخر ربنا هيكرمك.