خليك صفر على اليمين

فكرت تكون إيجابيا.. فكرت بدل ما تلعن وتشتم تكون إيجابيا ولو مرة فى حياتك، وغير اللى قرفك فى عيشتك ومضايقك جدا.. فكرت تكون صفر على اليمين بدل ما أنت صفر بس على الشمال.. الصفر مش حاجة وحشة.. الصفر اللى على اليمين عشان أكون دقيقة هو اللى مش حاجة وحشة.. الصفر اللى على اليمين دا اللى بيحول الجنيه لعشرة ومئة وألف.
Cairo Runners.. أول ناس فى مصر بتنزل كل جمعة تجرى.. من 4 كيلو جرى والهدف 22 كيلو جرى.. مش بس بيجروا والهدف مش بس رياضة وصحة.. دا فى هدف خيرى لل22 كيلو ماراثون.
الزمالك وهيليوبوليس والمعادى والدقى وشيراتون والجيزة والتجمع ومدينة نصر.. دى الأماكن اللى راح فيها Cairo Runners قبل كدا.
أول مرة ينزلوا الشارع بدأوا ب10 أشخاص، وانتهت ب70 إنسانا بيجروا.. ولما وصل عدد الناس اللى بيجروا ل1000 بس هما كانوا فرحانين ب70 ضحكوا على نفسهم.. ومش بس شباب بيجرى دا فى عواجيز بيصحوا بدرى وينزلوا يجروا.. ولما الدنيا بتمطر كل واحد بيعيش الحلم وبيجرى فى المطر.. وفى يوم عيد الام اللى هو بالصدفة كان جمعة، وكمان عرفناه أن اليوم دا هو اليوم العالمى لمتلازمة داون نزل يجرى ناس عندهم Dawn Syndrome .. الناس ردود أفعالها كانت مختلفة بس كل الناس مؤيدين مش معارضين عساكر وناس بالعربيات ركنت العربية ونزلت تجرى..وبدل قعدة الكنبة والصحة اللى فى النازل.. انزل وخليك صفر على اليمين واجرى.
امشى فى حارتك.. وبدل ما تكره السواقة فى مصر وتشتم وتلعن فى الناس اللى بتسوق وخناقات يومية.. نزل شوية شباب وقالوا لازم نعلم الناس تمشى فى حارتها.. ونزلوا ب banners ...بدل ما تشتم وتلعن خليك صفر على اليمين ووجه الناس للصح.
من الأخر كل حركة من دول وغيرهم كتيير أوى بدأوا بس بفكرة صغيرة فى دماغ إنسان قرر يكون صفر على اليمين.. ونشر الفكرة مع أقرب الناس ليه.. والفكرة كبرت أكبر وأكبر، ووصلت للناس كلها...خليك صفر على اليمين).