من مواطن مصرى إلى الفريق السيسى

رسالة حب برسلها
للى يحب مصر بجد
للى يخاف على ترابها
ولا عمره يبعيه لحد
للى لو حكم فيها يوفيها
ويرسم ليها أجمل غد
رسالة حب بهديها
لحاكم عدل يجى فيها
يخليها
متحتاجش فى يوم لحد
يا بلدى يا شمس كان نورها
معبى الكون
يا أجمل أم فى الدنيا
يا حضن حنون
بحسك كل ما بمشى على الشاطئ وأنا مهموم
تنادينى وفى صوتك دفئ دفانى فى أصعب يوم
تقول لى اصبر كمان أصبر يا ولد النيل
أنا أمك, وآنا همك, ولا يهمك سحابة ليل
وأنا ع الشط كان صوتها صداه فى النيل
تداعبه الموجة والنسمة ينسينى مرار الويل
يفكرنى بأصول أمى وإنى عربى حر أصيل
سمعتك يا حبيبتى بجد
نسيت همى وأحزانى نسيت الكد
نسيت اللى فى يوم باعنى
بمعاهدة إنى أرخص حد
نسيت أنه عمل منى
بضاعة فى كل سوق تتمد
جواز سفرى صبح شبكة
ختوم الدنيا فيه تتعد
تعبت يا أمى من الترحال
وبحلف لك ما زيك حد
يا أجمل شمس دفينى فى عز البرد
يا نهر حنان مروينى بطعم الشهد
بعاهدك إنه صبرى يطول
لأنى بحب بلدى بجد
ونفسى فى أب يكون إنسان
رئيس مخلص وعنده إيمان
يحس بغربتى والجوع
يحسسنى إنى ليا كيان
يشيل هم اللى مات محروق
على السكة فى قطر جبان
يربى طفل وطفلة أيتام
أبوهم مات فى يوم غرقان
ونشعر أن لينا أب
يعالج طفل من السرطان
يحبك زى ما بحبك
ساعتها الدنيا تبقى أمان
وأحس بأنى مصرى صحيح
تعود هيبتى فى كل مكان
رسالة حب برسلها لأب لمصر
مش لحاكم ولا سلطان
قبل ما يمضى عقد الحكم
يمضى عهد للرحمن
بأنه يكون علينا أب
ولا يظلم فى يوم إنسان