سامح لطف الله يكتب.. نجم

الأولة أحمد
والحمد لله
حامدين لرب السما
حتى فى ليل الآه
شرقاوى وشال محنته
فوق الكتاف ولا تاه
والتانيه فؤاد الروح
وجوه الفؤاد أحباب
قلبه الجسور مقروح
لحم ودم وروح
وما يشفى العليل ودواه
إلا حبيب الروح
والتالتة نجم ف سماه
والنجم كان مكشوف
اضرب يا صاحبى الودع
واقرا الكفوف وشوف
راجل وأجدع جدع
فوق الجبين دى حروف
فى أم الكتاب انكتب
قبل التاريخ بألوف
هرم بناه الزمن
طوبة من فوق طوبة
وحل ضهره الوهن
والعضم طاله رطوبة
من سجن مرة لسجن
والدنيا ليه منكوبة
لولا العصب ناشف
والمِشْ كان بالويبة
وعقل يوزن بلد
ضد الفجور والعيبة
عدى البحور جداف
للشر ماسك طوبة
عمره يا عينى ما خاف
ضَرَب الرصاص بحروف
اترصت الكلمات
أحلى المعانى صفوف
وتسمع الأبيات
تصقف عقول وكفوف
يا عمى ليك بانحنى
واضرب السلامات
إنت اللى علمتنى
لصاحب الكلام مقامات
غنى إمام كلمتك
واطرب المقامات
بص يا صاحبى لطرة
لما انخسف مقامات
افرح يا نجم السما
ربك دا ليه علامات
ودع حياة الشقى
والراية مرفوعة
يكفيك يا نجم السما
الكلمة مسموعة
بنيت قصور فى السما
والأرض مفزوعة
ونزلت ف المقبرة
صدقة وممنوعة
مكتوب عليك الشقى
والجثة مصروعة