مفيش إنجليزى.. مفيش شغل

يبدأ الحوار كالتالى:
س: عايز اشتغل..
ج: عندى شركة طالبة موظفين لكن على المتقدم إتقان اللغة الإنجليزية.
س: طب اعمل إيه؟ مش عندى فلوس علشان أخذ كورس تدريبى.
ج: ومين قال أنك محتاج فلوس علشان تتعلم اللغات.. أنا عندى حل بسيط وسهل ومش محتاج فلوس.
طريقتى هى 9 خطوات أعتقد أننا كلنا قادرون على الاستفادة منها:
1- اشترك بأحد مواقع تعليم الإنجليزى:
يوجد عدد كبير جداً من المواقع الإلكترونية لتعليم اللغة الإنجليزية، المطلوب منك هو الاشتراك وكل يوم سيصلك رسالة على بريدك الإلكترونى بموضوع جديد وكلمات جديدة.. فى كل مرة تستقبل فيها الرسائل ستتعلم موضوعا ومفردات جديدة تستخدمها ومع كل رسالة جديدة، وكل يوم ستجد أن مستواك فى اللغة يتحسن عن اليوم الذى يسبقه.
2- اسمع أغانى:
دى طريقة لطيفة جداً لتعلم اللغة الإنجليزية، اختار المغنيين المفضلين لديك واختار مجموعة الأغانى أيضا المفضلة لك وبعملية بحث على Google بسيطة ابحث عن Lyrics "مثلا أنا أحب أغنية ماريا كارى I give my all المطلوب إنى أبحث عن I give my all lyrics "، وبكده هيكون عندى كل كلمات الأغنية اقرأ الكلمات وبكده هيكون سهل إنى أردد كلمات الأغانى كل ما اسمعها، الطريقة دى سهل جدا تنفيذها لأنك تستغل استمتاعك بسماع الأغنية فى أنك تعود لسانك على الكلام بالإنجليزية.. وكل الناس على موبايلها ممكن تسجل الأغانى وتسمعها فى أى وقت.
3- حب الإنجليزية:
لو أى واحد فينا عنده هواية يأخذ وقتا طويلا جدا ليثقل الهواية أو يتعلمها.. خلى هوايتك الإنجليزى واعتبر أن الوقت اللى بتقضية مش غصب واقتدار ومذاكرة وحاجة سخيفة، لكن دى هواية وأنا أمارسها مثلها مثل أى هواية أخرى زى اللى يحب يلعب كرة أو يعزف موسيقى.. إلخ.
4- اقلب حياتك إنجليزى:
غير كل حاجة حولك واقلبها إنجليزى "إعدادات موبايلك – حساباتك على شبكات التواصل الإجتماعى – إعدادات برامج الكمبيوتر.. إلخ"، وبكده عينك هتتعود تشوف إنجليزى كثير وبمرور الوقت مش هتعرف تتعامل غير بالإنجليزى أصلا.
5- خصص وقت للتعلم:
حدد مع نفسك وقت تكون فيه هادى ورايق وخصص الوقت دا للتعلم، مش مطلوب منك أكثر من 30 دقيقة كل يوم تخصصهم للتعلم واعتقد أن 30 دقيقة مش وقت طويل.
6- استغل شبكات التواصل الاجتماعى
استغل وجودك على Face Book وTwitter وأى شبكة أخرى وتعرف على جنسيات أخرى، وبكده هتقضى وقت ظريف وتتعرف على ناس جديدة وثقافات أخرى وتمارس اللغة.. "أرجوك لا تخف أو تخشى الخطأ.. نحن أحيانا نخطئ فى العربى الذى هو أصلا لغتنا".
7- دون الكلمات الجديدة:
اجعل معك أجندة صغيرة وكلما تعلمت كلمة جديدة اكتبها فى هذه الأجندة، كل فترة ارجع للأجندة وراجع على كل الكلمات الجديدة التى تعلمتها، اللغة الإنجليزية تعتمد فى المقام الأول على الكلمات وكلما كان عندك حصيلة كلمات كبيرة كلما تحدثت أفضل.
8- اقرأ:
اقرأ إنجليزى، اشترى الجريدة أو كتاب أو قصة.. المهم أنك تقرأ.
9- شاهد أفلام ومسلسلات إنجليزى "غير مترجمة":
استغل الYouTube فى أنك تشاهد مسلسلات وأفلام إنجليزى غير مترجمة، لأنك فى هذه الحالة سيكون تركيزك كله فى محاولة أنك تسمع الحوار بين الممثلين وتحاول أن تفهم، وبالتعود ستجد نفسك فاهم كل حاجة خد بالك أنت تتعلم بدون ضغط على أعصابك.
تعلم اللغات ليس بالشىء الصعب ولا المستحيل، ولكن الموضوع ببساطة مش محتاج منك غير أنك يكون عندك رغبة حقيقية فى تعلم اللغة وعندك استعداد، من وجهة نظرى تعلم اللغة بالضبط مثل رجيم الأكل، لو التزمت به ومشيت عليه صح هتوصل للوزن المثالى.. أما لو مشيت على سطر وسيبت سطر مش هتوصل لحاجة أبداً!