15 نصيحة لتوفير الوقود بعد زيادة الأسعار

تداول نشطاء مواقع التواصل الاجتماعي "فيس بوك وتويتر" 15 نصيحة لتوفير الوقود بعد زيادة الأسعار التي أقرتها الحكومة صباح اليوم الخميس.
وأكد نشطاء مواقع التواصل الاجتماعي أهمية المحافظة على بنزين السيارة بعدد من النصائح أهمها:
أولًا: متشغلش التكييف.
ثانيًا: ممنوع تحرق على الغيار.
ثالثًا: بطل العربية وانت نازل تشترى حاجة حتى لو 20 ثانية.
رابعا: بطل العربية في الإشارات.
خامسا: متسافرش بالعربية بعد كده.
سادسًا: لو السكة زحمة اركن على جنب لغاية ما تسلك.
سابعًا: لو في أكتر من عربية في الأسرة انصحك بالاستغناء عن واحدة إن لم يكن كلها.
ثامنًا: شغل التيربو والديفيل وفلتر هواء الرياضى ده تنزل تشيله وتولع فيه وقتى.
تاسعًا: القيادة فوق 100 كيلو متر في الساعة إسراف وتبذير ربنا حيحاسبك عليه.
عاشرًا: المشوار اللى اكتر من 20 دقيقة قيادة متروحش بالعربية.
حادي عشر: أي حاجة بتزود في حرق البنزين صلحها من دلوقتى أحسنلك.
ثاني عشر: اتعلم تسوق موتوسيكل أو عجلة حتحتاجهم قريب.
ثالث عشر: لو عربيتك قديمة شوية استعمل بنزين 80.
رابع عشر: تسخين العربية ميزدش عن 30 ثانية كحد أقصى.
خامس عشر: متفولش العربية عشان العداد حيغريك انك تمشى اكتر حط 10 لتر بس.
وعلق محمد فريل قائلا: "على فكرة لو مشغل التكييف أوفر متفتح الزجاج وانت ماشى".
وقال شريف وهبة: "الاحتراق اللى بيحصل عند تشغيل الموتور بيحتاج كمية من البنزين اكتر من اللى بتستهلكها العربية وهي دايرة في فترة الإشارة أو عند شراء حاجة".
ورد أحمد محمود سليمان: "التكييف على الطرق السريعة أوفر بكتير من فتح الشباك وده لسبب مقاومة الهواء عند فتح الشباك.. أما داخل المدينة والزحام فتح الشباك أوفر".
يذكر أن مجلس الوزراء أقر زيادة في أسعار المنتجات البترولية والغاز الطبيعي اعتبارًا من صباح اليوم الخميس، وذلك على النحو التالي:
-البنزين 80 من 2.35 إلى 3.65 جنيهات/لتر.
- البنزين 92 من 3.5 إلى 5 جنيهات/لتر.
-السولار من 2.35 إلى 3.65 جنيهات/لتر.
- البوتاجاز من 15 إلى 30 جنيها/اسطوانة.