نشطاء يطالبون بإعادة لاعب الرماية «حمادة طلعت» عقب رفع علم السعودية.. إسلام: كان في الشركة السعودية بيجيب لحاف.. هاني: اتولد في تيران كمصري ولما وصل البرازيل لقى نفسه سعودي.. وسعوديون: «بطلوا تلزيق»

حالة من الغضب انتابت نشطاء مواقع التواصل الاجتماعي "فيس بوك" و"تويتر" لرفع لاعب الرماية المصري حمادة طلعت، لاعب المنتخب الوطني للرماية، علم السعودية في افتتاح أولمبياد ريو دي جانيرو بالبرازيل "ريو 2016".
ودشن المصريون هاشتاج "رجعوا حمادة"، الذي حقق مركزا متقدما ب"تويتر"، للمطالبة بإعادة حمادة طلعت، فيما تساءل البعض ماذا لو فاز بالمسابقة أي سلام وطني سيعزف له، وسخر بعض النشطاء من السعودية قائلين: "عايز عقد عمل".
علم السعودية
وقال خالد تليمة: "اللى اسمه حمادة طلعت‬ اللى رفع علم السعودية ده غالبا هيطلع هو صاحب الجملة الخالدة اللى بتقول "شلّوت سيادتك دفعة للأمام يا افندم والله".
وأضاف إسلام: "هقلكو القصة حمادة كان في الشركة السعودية بيجيب لحاف عليه نجفة هدية وعلم السعودية و26 جنيه بدل علم مصري ضاع رجعوا حمادة".
وعلق روز: "رجعوا حمادة يا أخي دة اللاعيبة اللي قطر مجنساهم مرفعوش علم بلدهم ورفعوا علم البلد اللي هيلعبوا باسمها! إلا إذا أنت مش هتلعب باسم مصر بقي!".
ورد رامي العمري: "رجعوا حمادة.. معنديش مشكلة تحب السعودية، لكن ميكونش ده على حساب كرامتنا اللى صرف عليك وخلاك تلعب في الأولمبياد.. مصر مش السعودية".
وتابع أحمد مدحت: "واحد إسكندراني في الأولمبياد المفروض يشيل علم مين؟! السعودية طبعا.. حمادة طلعت‬ طال عمرك".
إيه ناقص
وقالت إيمان عامر الشريف: "حمادة طلعت‬ من البعثة الرياضية المشاركة في الأولمبياد.. حمادة طلعت لاعب رماية مصري رفع علم السعودية مع علم مصر في افتتاح الدورة الأوليمبية في ريودى جانيرو.. الموقف ده تلخيص لحالة ومكانة مصر يشارك بجنسيتين مصرية وأخري سعودية.. لكي الله يا مصر طيب هل العقل يسمح بذلك؟ خاصة في المنافسات والمسابقات".
وأضاف محمد حافظ: "لاعب الرماية حمادة طلعت‬ يرفع علم السعودية أثناء دخول البعثة المصرية لملعب ماركانا في افتتاح دورة الألعاب الأوليمبية.. مش هتكلم عن درجة رداءة الزي.. ومش هستغرب لو محدش حاسب اللاعب الأبله إلى رافع علم غير علم بلده ولا إن مسئول أكبر يحاسب من اختاروا الزي.. إيه إللي ناقص تاني ممكن نبيعه؟!.. مهو لو في مشرف حضانة حتى بينظمهم وبيهتم بشغله وبيراعي ربنا في البلد كان راجع عليهم.. وللأسف دلوقتي محدش هيحاسب.. عموما أفضل عقاب ليه هو المشاركة في الأولمبياد والخسارة أمام الأبطال الحقيقيين".
وعلقت أشجان أحمد :"بس فعلا اشمعني السعودية ولو لقاه زي ما بيقول كان حطه في إيده مرفعهوش بس ايه المغزي يعني؟.. مش فاهمة".
وتابع هاني محمود: "أصل حمادة طلعت‬ اتولد في تيران كمصري ولما وصل البرازيل لقي نفسه سعودي... ولو خدت ميدالية وده طبعًا مستحيل ها تطلب يعزفولك سلام المملكة ولا السلام الوطني".
حمادة تاني
وقال أي رفلة: "قالك ده رافع لا إله إلا الله.. طب ماحدش بيرفع علم العراق ليه ما هو مكتوب عليه الله أكبر".
وأضاف ابن زمورة: "اللاعب ‫حمادة طلعت‬ اللي رفع علم السعودية بيقول: إنه لقي العلم مرمى على الأرض فرفعه عشان مكتوب عليه لا إله إلا الله.. الغريب والمضحك والمبكي في نفس الوقت أن وفد السعودية دخل بعد وفد مصر".
وعلق طاهر جميعي: "حمادة طلعت‬ لو فاز بجائزة هايرفع علم مين؟ علم مين يا حمادة يا جامد".
ورد ناصر هيرو: "رجعوا حمادة فعلا كل اللي فات حمادة.. وهذا حمادة تاني خالص".
وتابع قاسم ويذ: "أعمل إيه وياك يا حمادة ؟؟ اللي عملته ده أسوأ عادة".
سخرية السعوديين
فيما سخر بعض نشطاء السعودية، فقالت باسمة: "دايم تتلزقون فينا يع.. رجعوا حماده"، وأضاف علام الهندي "مصري داش وشايل علم السعودية.. الأخ يبغي عقد عمل"، وعلق يوسف الراشد: "يبغي إقامة"، وتابع تركي العتيبي: "عاوز بنزين".