الارتجال هايل يا سيادة الرئيس

كلمة الرئيس السيسي في إطلاق استراتيجية التنمية "رؤية مصر ٢٠٣٠"... أول كلمة أحس فيها بالارتجال... كنت دايما بحس بال"input" بتاع صحفيين زي محمد حسنين هيكل أو غيره... المرة دي حسيت إن الراجل بيتكلم من قلبه من غير تحضير قوي ودي أكتر حاجة عجبتني في الكلمة. أنا مش شخص مؤيد للنظام وبقالي فترة قافل من إني أسمع الرئيس بيقول إيه، بس المرة دي بعيدًا عن كل التريقة والإفيهات لبيع الرئيس والتصبيح على مصر، بس الكلمة فيها حاجات كتير كويسة.
فى البداية الرئيس ابتدي يخوف المصريين من التفتت ويظهر أهمية اتحاد فئات المجتمع والحفاظ على الدولة... وده كلام سمعناه قبل كده.. بس المرة دي التفاصيل هي اللى فرقت... كلامه عن البنية الأساسية فى ال٢٠ شهر اللى فاتوا وتعويض النقص... وإن على آخر السنة دي هيكون في "٥٠٠٠ كيلو طرق خالصة" و"١٣٣ كوبري في ٢٠ شهر" وهيتكلفوا ٥٠ مليار جنيه وإن مشكلة الطاقة اتحلت وخلصت فى سنة، واتكلفت ١٥٠ مليار جنيه، يعني كده طرق وطاقة ٢٠٠ مليار جنيه... وذكر الأرقام مفيد جدا، فالفقرة دي وبالتواريخ والأرقام علشان نعرف نفهم الشغل الكتير اللى بيتقال إنه بيتعمل نفهم شغال في إيه... وده بيطمن المستثمرين ولما الناس تشوف إن فيه دولة بتتحرك وبالأرقام حاجة مفيدة... وكلمة "ماتسمعوش كلام حد غيري" مش غلط بالعكس إحنا لو هتطلع تكلمنا بالأرقام إحنا هنسمعك... إحنا عايزين البلد تقوم ومش شايفين إن البلد تستحمل ثورة كمان اقتصاديا أو سياسيا.
بعد الأرقام ابتدي السيسي يهدد "اللى هيقرب من مصر" وتكراره لكلمة "إنتو مين" الكلمة دي غريبة شوية بس لإنها كلمة مرتجلة فتكرارها واستخدامها جزء من عدم التحضير... وفكرني بلما كنا زمان نبقي بنعمل "presentation" فى الجامعة ومش محضر بس أنا كنت شغال جامد... ولما ابتدي يذكر وزراء زي الدكتور شاكر اللى أنا عارف شخصيا إنه شخص شاطر ومضحي بشغل شخصي كتير علشان الوزارة، بيوصل للناس إنه قريب من الوزراء ودي حاجة هايلة... وتحليله لعلاج نقص الغاز وذكر "الشر وأهله" غريب شوية، بس جايز هو شايف حاجة إحنا مش شايفينها، ما هو لو أنا فاهم اللى بيقوله كان زماني رئيس جمهورية... وذكره أن مشكلة الغاز خلصت فى نوفمبر حاجة كويسة جدا ... والاهتمام بالمواني والمطارات هايل، بس ياريت نشغل السياحة زي زمان والشحن يزيد علشان نرد فلوس قناة السويس المتأثرة سلبيًّا بانخفاض أسعار النفط، فلازم نتصرف في القصة دي فى وجود مواني زيادة مفيد جدًّا.
تحليل السيسي لمشكلة سد النهضة ماعجبنيش أوي علشان كلمة "تعالالي وأنا أقولك" دي حاجة صعبة شوية... أنا مثلا لو عايز أسأل سيادة الرئيس حاجة أوصله إزاي؟.... وده بيسبنا قلقانين من مشكلة المياه... بس في اللحظة دي حسيت إن أنا فى مجلس إدارة وإن رئيس شركة بيعرض أرقام وخطة، ودي أول مرة أحس إننا من حقنا "نحاسب الشخص اللى سايق البلد"... وكلامه عن معالجة الفساد بقوة هايل... بس المشكلة إن الفساد لسه موجود وبقوة وموقف الحكومة من هشام جنينة أفسد فكرة إن الحكومة بتحارب الفساد عند الشعب، وهتحتاج وقت عشان الشعب يثق في الحكومة تاني فمحاربة الفساد... لازم "نتدخل في التفاصيل علشان نمنع الفساد".
والتحدث عن "المليون شقة" اللى هتتكلف ١٦٥ مليار جنيه ده رقم كبير جدا بس خبراء الإسكان ممكن يحللوها...
الرئيس شكر الخليج والمساندات بعد ٣٠/٦ ودي حاجة صح جدا... ذكر أن خلال سنتين ونصف مصر استهلكت وقود ب٥٣٥ مليار جنيه... وإن الرقم ده من إنتاجنا يتكلف ٣٨٤ مليار جنيه وإن الخليج ساعدنا ف٥١ مليار جنيه، وإن إحنا بنشتري الوقود بالأجل ودي كانت حاجة مفيدة إننا نفهمها، علشان ماكناش فاهمين فلوس الخليج رايحة فين في مصر... وربط السيسي لضرب السياحة بأنه مخطط وأنه "افتعال محنة"... أنا شايف إن السياحة هتقوم بإننا نخلي خدمتنا وأسعارنا منافسة ومش شايفة مخطط بس برضه هو الرئيس وهو اللى شايف أكيد فاهم عننا... السياحة جزء مهم جدا من الموازنة بتاعتنا اللى هي "٨٥٠ مليار جنيه"... والسيسي ذكر أن العجز في "٢٥٠ مليار جنيه" دول اللي بنستلفهم والدعم "٢٥٠ مليار جنيه" على الأقل في السنة وده فرق أسعار، في الطاقة والغاز والسلع والخدمات... و٢٥٠ مليار جنيه خدمة الدين اللى هو زي "الفوايد"... اللى هي فوايد ال٢ تريليون جنيه دين داخلي تقريبًا... وده دليل إن السنين الجاية صعبة جدا علشان الدنيا تظبط إحنا هنتعب جامد...
ذكر أن المرتبات للدولة زادت من ٧٠ مليار لأكتر من ٢٠٠ مليار عشان الطلبات بعد الثورة... حاجة توضح الضغط اللى هو فيه والحكومة فيه... وطبعا مشاكل سينا حاجة وحشة جدا وإحنا عارفين إن فيه حرب في سيناء... واعتراف السيسي بالتجاوزات حاجة هايلة وإنه شايف إنها غلط شيء ممتاز وإنه بيحاول ينقي الحكومة عندي عليها تعقيبات، بس الاعتراف بيها خطوة أولى تكفي...
نروح للحاجتين اللى عملوا شغل جامد على السوشيال ميديا اللى هما "التصبيح على مصر" و"لو لازم أبيع نفسي أبيع"... أول واحدة أنا مش شايفها حاجة غلط لو ده من الحلول مافيش مشكلة نصبح يا باشا، بس لمدة قد إيه وهنستفيد إيه لما نصبح.... وفقرة البيع دي "فقرة emotional" جدا... وهو أكيد ماكنش متوقع إن فيه ناس هتحط صورته على "ebay" وأنا شايف إن فيه مبالغة رهيبة في الحركة دي، بس في ناس بتحب تهرج والإسفاف موجود بقوة في ظل الإحباط... وكلامنا على الحاجتين دول ماينسناش ذكر السيسي للأخطاء والعقاب وإن الداخلية فيها ناس وحشة وطبعًا التحية للمصريين في الآخر اللى بتحسب مع ناس كتير... وفى الآخر حط الورقة فى جيب البدلة اللى إنت شايف إنه كان ممكن يطلع من غيرها باستثناء شوية الأرقام... وطبعًا كلمة "تحيا مصر" اللي هي ال"branding" بتاع مصر بعد ٣٠/٦.
الخلاصة:
أنا كنت مستني أربع حاجات من الرئيس في الخطبة:
١- أرقام لكل القطاعات وتواريخ بانتهاء المشاريع.
٢- تحليل عن مشاكل الداخلية.
٣- حلول للسياحة والتعليم والصحة.
٤- كنت متوقع فقرة emotional ودي بتفرق جدا مع الناس الكبار في السن وستات كتير.
هو قال كله إلا خطة التعليم والصحة ودول من أهم الحاجات وأنا شايف تطور في الكلام والأرقام، وهو أظهر إنه فاهم الشباب شايفة إيه بذكره لتفاصيل زي "وقوع الطيارة" و"السجادة الحمراء" و"مشكلة إيطاليا" و"الروح المعنوية" و"الإحباط".. وده علاجه صعب بس علاج إحباط الشباب جزء كبير جدا من "علاج الدولة".
هيبان.