قصيدة: التحرش.. أصله عادي

التحرش.. طبع عادي
والسفالة.. بردو عادي
والدياثة.. والتياسة
والقرون فوق السياسة
والارايل والنجاسة
بردو عادي
****************
امتى نزعل ؟؟
لما يبقى فينا نخوة نبقى نزعل
لو فضل ذرة رجولة نبقى نزعل
بس لما نشوف بناتنا والشباب يتحرش بيها
واللي يضرب واللي يمسك واللي بيشد فإيديها
واحنا من كتر الرجولة جبنا كل اللوم عليها
فايبقى عادي
*************** *
وبردو عادي
لما تسمع ان اختك وقفوها
شدو شنطتها وحجابها وف الشوارع بهدلوها
واستغاثت باللي واقف
واللي واقف قال دا عادي
اوعى تزعل
ليه هتزعل ؟
مانت مزعلتش على البنت الي فاتت
اللي قدامك خدوها وكنت ساكت
واعتراضك كان يادوب على شكلها
لابسة ديق لابسة واسع والقضية فلبسها
ومدام هتخرج في الطريق بالشكل دا
تستاهل الي حصلها
وقلت عادي
ووقفت جنب المغتصب وشرحت وضعه
عنده كبت معذبة هو الي واجعه
هي استفزت شهوته وجسمه وصوابعه
فايبقى عادي
***************
اه يازمن فيك الدكر اصبح ولية
الضحية يغلطوها
والوسخ هو الضحية
ومش قضية
اننا نرجع ذكورة ولا نسترجل شوية
القضية.. ازاي نبرر عجزنا
بالحجج والاثباتات المنطقية
فاكرين حكاية المعتصم بالله في عصره ؟
لما جاتله رسالة واتذاعت في قصره
جلجلت كل الحرس والناس في ثانية
ان ست استنجدت بالمعتصم من دولة تانية
وان واحد من كلاب الروم دايقها
مد ايده او عاكسها او يكون عطل طريقها
مسألش طب دي بنت مين او ماشية ليه
ولا لابسة ايه
ولا ايه الي نزلها الساعدي
ومقالش عادي
ولا قال خلاص مش مشكلة حبة عيال
ارسل خطابه بكل قوة ونخوة قال
من امير المؤمنين المعتصم..
ليك ياكلب الروم ياعايش في الجبال
الواد يجيني وهي يرجع حقها
لبعت جيوش توصل لغاية عندها
والحرب عادي
***********************
ادي الرجولة الي احنا بندور عليها
وادي الشهامة الي اشتهرنا بجد بيها
دلوقتي لابسين الطرح عاملين فرح
على بنت مهتوك عرضها
قاعدين نحلل فين اخوها في ابوها وامها
والوضع عادي
الفاتحة ع النخوة الي فاتت
ع الرجولة الي اختفت في القلب ماتت
ع الي شايف عرض بنت بينتهك قدامعيونه
بشكل عادي!
بقلم: محمد عبد العليم يونس