رسالة إلى صديقى العبقرى الراحل «أحمد زكى»

ياااه فات 8 سنين على رحيل عبقرى الفنانين الأسطورة صديقى النجم العبقرى «أحمد زكى» اللى بقوله يا زكاوة انت وحشتنا ورغم رحيلك إلا إنك عايش وسطنا وفى قلبنا عايش بفنك وأعمالك اللى أسعدتنا بيها كلنا
إلى صديقى الفنان العبقرى «أحمد زكى» أرسلك رسالة وأقولك فيها: انت ربنا بيحبك ورحمك إنك ماعشتش وما شفتش حكم مرسى وعصابته الإخوان الشياطين اللى ربنا سبحانه وتعالى ابتلى بيهم المصريين الفاشلين اللى لم ينجحوا فى حاجة إلا فى تقسيم المصريين وتكفير المصريين المعارضين باسم الدين وقاموا بتوقيع المصريين فى المصريين وخللوا المصرى يموت أخوه المصرى وخللوا المصرى المسلم يكفر أخوه المصرى المسلم ويقتله كمان. صديقى العبقرى زكى انت ربنا بيحبك لأنه خلاك ماعشتش وماشفتش أسوأ رئيس فى تاريخ جمهورية مصر العربية وهو الرئيس محمد مرسى اللى كان من سنتين فى السجن وهرب منه وخرج منه ليجد نفسه رئيسًا للمصريين فى أعجب وأغرب شىء فى تاريخ المصريين، واحد هارب من السجن وبدل ما يرجع السجن اللى هرب منه وتتم محاكمته تقوم عصابة الشياطين الإخوان باختياره ليكون رئيس للمصريين. صديقى العبقرى زكاوة انت ربنا بيحبك لأنه نجاك من نحس الرئيس مرسى الشهير بمرسى شرارة أو مرسى نحس أو مرسى فقر اللى فقر المصريين بنحسه من ساعة ما حكمهم. صديقى العبقرى أحمد زكى أنا متأكد إنك لو كنت عايش كنت مش حتفوت ابتلاء مصر وكنت حاتعملنا فيلم سياسى كوميدى عن الرئيس الكوميدى محمد مرسى الشهير بمرسى النحس أو مرسى رئيس الصوابع، الرئيس اللى سايب كل حاجة وكل بلاوى البلد مصر ومركز بس مع الصوابع اللى بتلعب فى مصر. صديقى زكاوة فى النهاية أنا عارف إنك انت والعندليب العظيم عبدالحليم حافظ فى جنة الخالدين لأن ربنا بيحبكم واللى ربنا يحبه ينعم عليه بحب خلقه. يا صديقى زكى ويا عبدالحليم انتم الاتنين إن شاء الله فى جنة الخالدين لأنكم بفنكم أسعدتم ملايين المصريين اللى بيحبوكم وبيترحموا عليكم وبيدعولكم بالرحمة والغفران. أرجوكم اقرأوا الفاتحة للعبقريين الراحلين عبدالحليم وأحمد زكى وجميع أموات المسلمين.. آمين يارب العالمين
نشر بتاريخ 1/4/2013 اللعدد 642