عمرو سلامة يوجه رسالة لجمهور «الشيخ جاكسون»

وجه المخرج عمرو سلامة رسالة للجهور لتشجيعهم على انتظار طرح فيلمه الجديد «الشيخ جاكسون» والمقرر طرحه خلال الفترة المقبلة.
وكتب سلامة عبر حسابه الرسمى قائلا « أنا بحب المشاريع -أفلام أو غيرها- اللي بتوصلك إنك بتنام بتحلم بيها، بتخاف تموت قبل ما تخلصها، بتقتنع إن مافيش حد في الدنيا هايحكيها زيك، بتخلي عندك هدف في الحياة تصحى علشانه، بتحبها كأنها ابنك أو بنتك، بتبقى خايف من اليوم اللي هاتطلع فيه للنور وتديها للناس وماتعرفش تعدل فيها أو تشتغل عليها ثاني وتستسلم لسنة الحياة وتبدأ تحب مشروع جديد» وتابع قائلا « كل مشروع من دول بياخد سنين، علاقتك بيه بتبقى كأنه حبيت واحدة، لأنك بتقضي فيه سنين بتشوفه وتفكر فيه وتحلم بيه كل يوم، لحد ما في يوم بتسلمه لقاعات العرض ويتحول لقصة قديمة، مهما شفت فيه أخطاء أو اشتغلت على مشروع ثاني بتحب أيامه وتحنلها، كل ما المشروع يبقى شخصي كل ما تحسه جزء من شخصيتك، بيقول حاجة مؤمن بيها، بيسأل سؤال شاغلك، بيطبطب على حد أو بيصرخ صرخة مش عارف تطلعها، والأهم بيأرخ حياتك وبيبقى جزء من طريقك وتجربتك الإنسانية» وأضاف « في كاتب سيناريو أمريكي شهير مرة قال لو المنتجين عرفوا إحنا بنحب شغلنا قد إيه مش هايدونا فلوس..أينعم أنا محتاج فلوس علشان آكل وأعيش -ويا ريت يكونوا كثير لإن نفسي أعيش أحسن-، لكن في نفس الوقت إكتشفت إني إنسان صعب يعرف يشتغل على مشروع مش حاسس بيه أو ماحركش حاجة جوايا، أو ماسخنيش أثبت حاجة أو أقول حاجة أو أتعلم حاجة، وعادة نتائج إني أشتغل للمادة بس بتكون مش سعيدة»واختتم حديثه قائلا « مش لازم مشروعك يغير الكون أو المجتمع، لإن في الحقيقة ده دور أكبر من دور الفنان لوحده، ممكن يكون بيتكلم بس عن جرح عيشته، أو بيطرح جدل يحرك حاجة، أو بيعبر عن فكرة جاتلك وإنت بتستحمى أو حتى في تحدي تقني نفسك تعرف تنجزه وتنجح فيه وتتعلم حاجة جديدة تطورك، أقدر أقول إني دلوقتي بعمل مشروع فيه كل العوامل ديه، وحتى المشاريع اللي في خطتي أعملها بعده متأكد إن فيها العوامل اللي بتصحيني وتحسسني إني عايش، وحاسس إني محظوظ إني عندي كثير عايز أحكيه وأسأله وأصرخه وأقوله وكمان فوق كل ده أمتع الناس بيه.. انتظروا "الشيخ جاكسون" فيلمي القادم لو كان ليا عمر، لإن أنا شخصيا بعد اللحظات اللي أشوفه على الشاشة، لإن نفسي جدا أعمله، علشان نفسي جدا.. أتفرج عليه».