رباعية الأهلى تحطم الزمالك وتقهر شعار «رابعة» الإخوانى

كتبت - مروة مظلوم
«شعب الكرة هى الحاجة الوحيدة اللى بتفرحه».. حقيقة ما قبل الثورة وما بعدها.. توقف دورى كرة القدم تسبب فى أزمة وعودة الدورى تسببت فى سعادة غامرة لعشاق قطبى الكرة المصرية الأهلى والزمالك.. ومع لقاء العودة التفت الجماهير لمتابعة الحدث بشغف.. وبفوز النادى الأهلى 4/ 2 انهمر سيل التعليقات الساخرة على مواقع التواصل الاجتماعى معلنة أن «مصر بخير» والأوضاع بها لم تتغير فلازال يفوز على الزمالك فى أسوأ حالاته.. وتنوعت التعليقات على النحو التالى:
مرتضى منصور مسك الزمالك إنهار.. دافع عن مبارك.. اتخلع نزل فى موقعة الجمل فشلت.. وقف مع شفيق خسر.. ظهر ع الفراعين.. اتقفلت أبوس إيدك ماتركزش مع السيسى.
كمان ماتشين بين الأهلى والزمالك والشعب هينسى الثورة ويتكلم فى الكورة بس.. شعب واقف فى الأوفسايد طول عمره كل ما يعمل ثوره تطلع تسلل.
هو مينفعش يكون فيه نص فى الدستور الجديد يقضى بحق الزمالك ف الفوز مرة واحدة على الأهلى كل سنة ؟ أصل ده يعتبر صورة من صور العدالة الاجتماعية.
أنا مش فاهم إزاى بتلوموا ناس مقتنعة أن مرسى هيرجع وسايبين ناس مقتنعة أن الزمالك قادم، مع أن الأولانيه أهون بكتير!
عاوز الزمالك يكسب الاهلى ؟! صعبة شوية.. روح البنك.. اسحب فلوس كتير.. سفرهم معسكر بره.. لعبهم ماتشات وديه.. منفعش؟ روح البنك تانى.. اسحب فلوس كتير.. اشترى لعيبة جديدة.. سفرهم معسكر بره.. منفعش؟! فكرهم بالدورى اللى خدتوه من 10 سنين هينعنشوا هيفرفشوا.. هيقلوا أدبهم.. وهيتكبروا عليك.. مشيهم.. وهات لعيبة تانيه سفرهم اسبانيا والمانيا وايطاليا .. (حلوة ايطاليا دى) لعبهم ماتشات ودية.. خسروا؟ مش مهم.. سرح الفريق اشترى لعيبه جديدة خسروا بردوا؟ مش مهم سرح الفريق تانى وروح البنك اسحب فلوس كتير افتح كشك سجاير واشرب كوباية شاى بس كده من الأهلى للزمالك.