بعفوية شديدة سألني فرد الأمن بالعمارة.. هو فيه إيا يا أستاذ.. الناس بتتخانق ليه في الاهلي والزمالك وبيراميدز.. هو كل ده عشان فريق يأخذ الدوري.. هايذبحوا بعضهم والجماهير مش كلهم ولكن اللي بيلعبوا الفيس بوك دول قلالات أدب قوي يا أستاذ.. ألفاظ وشتائم وعصبية أصلهم ما تربوش كويس.. والناس اللي مسئولة عن الأندية بيطلعوا فيديوهات تخلي الناس الغلبانة تولع وتشتم وتحرق.. هما الناس الكبار دول يا فندم مش بيتعظوا من القتلي وشهداء الملاعب بتوع الأهلي والزمالك وبورسعيد.. دول هما المسئولين عن تلك المجازر لأنهم شجعلوا الشباب الصغير علي التعصب ومفيش بصراحة حد من الكبار بيقولهم عيب. والله صدقت كلامك في الصميم وحقيقي والله. قال بعفوية شديدة مرة أخري.. طيب يا فندم عندي حل.. هو الأهلي عنده كام بطولة دوري في ال112 سنة.. والزمالك كام دوري أيضا والله تقريبا الاهلي 40 دوري والزمالك 12 دوري. خلاص تاهت ولقيناها يا فندم.. الاهلي يقعد كام سنة ما يأخدش الدوري والزمالك والفرق الأخري تأخذه والأهلاوية مش هايخسروا حاجة والزملكاوية ينبسطوا والمزاج يبقي عال العال وبكده مش هانشتم ونكون قلالات أدب.. ياه يا فندم ايه رأيك. والله لولا انك فرد أمن لرشحتك لادارة الكرة في هذا البلد.. كلام بسيط وعفوي اعلم أنك لا تقصد المعني ولكن ما ورائه من أفكار وتلقائية تدعو إلي السكينة بدلا من هذه المعارك والبطولات الزائفة لأشخاص ابتلي بها الوسط الرياضي وبدلا من أن تكون أيادي بناء للرياضة أصبحت معاول هدم للأخلاق قبل الكرة والرياضة.. معاني بسيطة لرجل الشارع الفاهم والقرفان من الباشوات قليلي الأدب هنا وهناك. معلهش يا نجم مصر.. أسفين يا بوصلاح.. يا فاكهة الكرة العربية والمصرية.. كتبت كمصري حر تنتقد بعض الظواهر الفريدة من نوعها بين جماهير الكرة في وطنك الذي تحبه وكانت النتيجة أن خرج علينا أصحاب الصوت العالي ومخترع السفالة لينال من شخصك المحترم.. وأنا أعلم أنك مش زعلان لأنك تعلم قيمة المتطاولين عليك من أقزام العهر الرياضي.. السماح يا أبوصلاح!!