الرئيس السيسي في الكلية الحربية: سنتجاوز كل الأمور الصعبة

وجه الرئيس عبدالفتاح السيسي، رسالة طمأنة للشعب المصري، خلال تفقده الكلية الحربية، وقال: مفيش مجال أبدا والله للخوف والقلق، إحنا بخير وسلام الحمد لله، وكل الأمور موجودة، والأمور هتبقى أحسن من كده إن شاء الله.. صحيح بنمر بظروف صعبة جدا زى ما كل الدول تقريبا بتمر بده.. وده أمر مصنعنهوش بأنفسنا.. وقلت إن إحنا مدخلناش فى حروب واقتتال ضيعنا فيه قدرات الدولة المصرية ومستقبلها.. لا.. معملناش كده.. إحنا كنا حريصين فى كل ردود أفعالنا أن تتسم بالتوازن والحكمة فى التعامل مع كل المشاكل اللى بتقابلنا».
وأضاف الرئيس السيسى: «حتى موضوع الإرهاب فُرض علينا فرضا، وحرصنا من أول يوم فى 2013 و2014 إنه ميحصلش أى شكل من أشكال الصراع والاقتتال لكن كان لازم نجابه هذا الاختيار».
تامر عبد الفتاح
شدد الرئيس السيسى على أن الدولة تبذل جهدا كبيرا جدا للحفاظ على قدراتها، معلقا: «نقدر كلنا بالصبر.. ولازم نفهم أن ما نحن فيه هو نتاج ظروف إحنا مش سبب فيها، ولكنها ظروف دولية صعبة لها تداعيات كبيرة جدا على العالم كله، وأثرت كتير جدا على تكلفة الحياة سواء طاقة وسلع أساسية ومستلزمات إنتاج، والأسعار كلها ارتفعت فى الدنيا كلها».
وتابع: «عندما يتساوى دخل الدولة من الدولار ومصروفها من الدولار الأمور هتبقا أحسن من كده، وده جهد بنبذله وقلت محتاجين نتحرك بسرعة ميبقاش عندنا حجم أكبر من اللى إحنا محتاجينه.. حجم الصادرات 50 مليار دولار طيب ده كفاية؟ لا مش كفاية.. بقول للشعب المصرى كله.. بنعانى.. لكن الحمد لله عايشين وهنقدر نعيش وياما مرت على مصر ظروف أصعب من كده والشعب المصرى بعزيمته وصبره وفهمه قدر يتجاوز الظروف دى وإن شاء الله هنتجاوزها».
وقال الرئيس السيسى، إن ما تحقق خلال العشر سنوات الماضية أمر عظيم جدا ونفتخر به جميعا، مضيفا: «نشكر بيه ربنا سبحانه وتعالى أنه حققلنا النجاح ده.. يا ترى ده حافز لينا؟.. نعم ودافع لينا نكون جاهزين أكثر لحماية بلدنا»
أضاف: «كل ما القوات المسلحة ومؤسسات الدولة المصرية قوية هتقدر تجابه التحديات المختلفة، وإذا فرض عليها التحدى لا بقدراتها تمنع التحدى من الأصل.. فعندما تكون قادرا قويا مستعدا صدقونى ده تمن كبير قوى لمنع الصراع من أصله لأن العملية حسابية فإذا كانت الدولة قوية وقادرة فده بيمنع كتير من الشرور».
وتحدث الرئيس السيسى، عن أزمة الدولار قائلا: «كان فيه مشكلة كبيرة فى الدولار خلال ال 3 أشهر الماضية، لكن بقول للناس وعدنا أنه خلال شهرين هننهى تكدس البضائع فى الموانئ، وأنهينا جزءا كبيرا منها ومعندناش مشكلة فى الدولار».
وأضاف الرئيس السيسى: «القوات المسلحة بتقوم بدور مهم جدا فى الفترة الصعبة دى للتخفيف على الناس البسيطة واللى ظروفها صعبة والأسعار قاسية عليها بتوزع 3 ملايين كرتونة لغاية شهر رمضان للتخفيف ما أمكن عن كاهل المواطنين».
وتابع الرئيس السيسي: «الأمور الحمد لله رغم إنها صعبة لكن مسيطرين عليها وهنقدر نتجاوزها ومع بعض كلنا على قلب رجل واحد كل المصريين هنقدر نتغلب ونتجاوز الفترة دي.. كل ظروف صعبة بتمر على أى دولة هو اختبار لقدرة الدولة وبتبقا اختبارات لكشف المعادن على كل المستويات الداخلية والخارجية ومعادن الدنيا كلها بتظهر فى الأزمة وفرصة نتعرف على قدراتنا فى التحمل».
وقال الرئيس السيسي: «كل محنة بتمر علينا بفضل الله بتتحول إلى منحة بالإرادة والعمل والأمل إن احنا نقدر نتجاوز أى مسألة بفضل الله سبحانه وتعالى».
وأضاف أن القوات المسلحة بالتعاون مع الشرطة تحقق نجاحا كبيرا فى تأمين الدولة المصرية بما فيها المنطقة اللى بذلنا فيها تضحيات كبيرة جدا خلال 9 سنين، شهداء سقطوا وحماة للدولة المصرية وللشعب المصرى».
وأكد الرئيس: «حققنا نجاحا كبيرا قويا وقريبا بفضل الله سبحانه وتعالى نعلن أن الموجة اللى قابلتها مصر خلال العشر سنين الأخيرة تم الانتهاء منها والسيطرة عليها».
وتابع: «اوعى تفتكر إن النجاح بيجى من غير عمل وصبر وتضحية مفيش حاجة كده.. خلال السنوات الماضية قدمت الدولة المصرية من خلال أبنائها من الجيش والشرطة والمدنيين تضحيات كبيرة جدا سواء من شهداء ومصابين وتكلفة مالية».
وأكد الرئيس السيسى حرص القوات المسلحة على اكتساب طلبة الكليات والأكاديميات العسكرية للقيم الراقية. وأضاف أن الأكاديمية تعلم الطلبة قيما راقية جدا وسامية تشمل الشرف والاحترام والانضباط والالتزام، بالإضافة للتضحية ونكران الذات.
ورحب الرئيس السيسى بالطلبة الجدد، معربا عن خالص تقديره واحترامه لهم لانضمامهم للقوات المسلحة المصرية، مؤكدا أنها مهمة عظيمة جدا.
وصرح المتحدث باسم رئاسة الجمهورية السفير بسام راضى بأن الرئيس شارك طلبة الكلية خلال تنفيذهم عددًا من الأنشطة والتدريبات التى يتم تدريب الطلبة المستجدين بالأكاديمية والكليات العسكرية عليها بشكل يومى بمقر الكلية الحربية، حيث اشتملت الأنشطة على عدد من التمارين الرياضية التى يتم تنفيذها بطابور اللياقة لمختلف الألعاب التى تسهم فى الحفاظ على معدلات اللياقة البدنية للطلبة فى أعلى مستوياتها.
كما شاهد الرئيس السيسى عددا من الأنشطة الخاصة بالتأهيل العسكرى للطلبة التى يتم تنفيذها وفقًا لأحدث نظم الإعداد والتأهيل المتطورة والتى أظهرت مدى ما يتمتع به الطلبة المستجدون من ثقة بالنفس ومستوى انضباط راق خلال فترة الإعداد العسكرى.
كما قام الرئيس السيسى بتفقد عدد من مناطق تدريب الطلبة شملت المرور على حمام السباحة التعليمي، وميادين اللياقة المطورة، وميدان الإعداد البدنى المفتوح، وميدان محاكى المعركة الذى شاهد خلاله تنفيذ الطلبة لتمرين الرماية بمحاكى الرماية الذى يحقق الواقعية فى تنفيذ التمرين وكذا المرور على ميادين (التحدى / كروس فيت)، وقسم الفروسية وميدان التحميل.
وأشاد الرئيس السيسى بما لمسه خلال الزيارة من مستوى الإعداد الراقى للطلبة المستجدين، كما طالبهم بالحفاظ على لياقتهم واستعدادهم البدنى والذهنى المرتفع، والتحلى بالقيم العسكرية الرفيعة والنبيلة التى طالما تميزت بها مؤسسة القوات المسلحة المصرية العريقة.